خالة سيف @khal_syf
عضوة مميزة
غلطة والثمن غالي....
السلام عليكم ورحمة الله وبركاته
(القصص حقيقيه).....
تزوجت عمرها 22 سنه.... حياتها عاديه....
مثل حياتنا مره فوق ومره تحت.....
كانت تقول لرجلها ....
(اصبر لين اجيب الولد)....
ماكان يهتم لكلامها وش بيصير يعني اذا جابت الولد.....
مع مرور السنين والعشره يبدأ الرجل الطبيعي....
يتساهل شوي مع زوجته والاشياء اللي كانت ممنوعه
ببدايه الزواج تصير مسموحه....
(المهم جاء الشيخ المنتظر)....
فرح ابوه فيه وطار من الفرح خصوصا انه جاء بعد بنات
واهله فرحوا والهدايا والفلوس تكب علي هالولد كب
من حبهم للابو حبو ولده....
فضنت انها بجيبت هالولد سوت شي ماسبقتها
عليه ولا وحده من بنات ادم....
والاخت....
(الحمدلله اللذي عافانا مما ابتلاها فيه وفضلنا علي كثير
ممن خلق تفضيلا)....
انسعرت.... وكان زوجها يا إما يمشيلها او تصير...
مشاكل بينهم والبيت يشب حريقة....
كل هذا وزوجها ناسي كلامها عن الولد....
الحياة بينهم ماشيه بكل مافيها....
الزوج كان سامحلها باشياء كثيره قبل تجيب الولد
بس مسكينه عقلها صورلها ان كل شي حلو يصيرلها
او اي حريه يمنحها لها زوجها....
بسبب انها جابت ولد....
لدرجة كانت تقوله انا حره اروح لاهلي بكيفي
واقعد واذا طاب خاطري رجعت بكيفي...
(اهلها بمنطقة ثانيه)....
قالها جربي اطلعي من غير شوري بتندمين....
في يوم كان فالدوام وامه جايتهم بتعالج واخوه عنده
قاموا وماعينوها لاهي ولا عيالها....
راحت عند اهلها وقعدت كم اسبوع ويوم رجعت....
تبي تفتح الباب طبعا القفل مغير....
حاولت بزوجها... ترجته ....
قالها عودي من المكان اللي جيتي منه....
وخلي ولدك ينفعك انا اصلا مابيك ولا ابيييييه....
عقب العنجهيه والتسلط....
مرسلتله مسج كاتبه.....
(ردني وانا بصير خدامه تحت رجل خدامة اهلك)
كانت غلطة بس الثمن غالي....
تزوجته مطلق وعنده بنت....
شاب جامعي وسيم عاقل منصب...
ماشاءالله لاقوة الا بالله....
وشدت حيلها كل سنه بزر عشان تثقل حمله....
لو تولد... وتقعد كم شهر ماحملت تروح تدور علاجات
وتمرخ عشان تحمل....
يوم حست انها تمكنت بدت بالتمرد تقوله....
(والله لاخضعك مثل ما امي خضعت ابوي)
كانت واثقة انه صعب يلاقي مره بمواصفات
حلوه خصوصا انه متزوج ثنتين وعنده عيال
كان يقولها...
تذكرين يوم خطبتك من ابوك وشقلتله يوم سالني....
ليه ابي اعرس مرة ثانيه...
قلتله انا رجال اتزوج عشان ارتاح....
والاولي ماريحتني وجيت اخطب عندك وعند غيرك
واذا ماعينت الراحة عند بنتك تراني بدور غيرها....
الكلام ماكان يحرك فيها شعره...
لانه يوم يخطبها كان عنده بنت بس الحين
عنده عيال ماشاءالله....
كثرت المشاكل وصار الطلاق....
وكانت واثقة واثقة انه بيرجعها ....
واذا كلمته عشان عياله.... تقوله ليه ماتزوجت للحين....
خطب الرجال وحده تقربله عمرها 18 سنه
تنقط نعومه وحبته بشكل موطبيعي وتغار عليه....
وتطيعة ومريحته....شد عليها فالبدايه
وكان قاسي...بس غصب بطيبتها واسلوبها جابت راسه
وكانت تسال حمواتها واهله عن اغلاط اللي قبلها
الله يكملها بعقلها...عشان ماتقع فيها....
رغم صغرها كانت حكيمه وواعيه
ماشاءالله لاقوة الا بالله....
وعايشين احلي حياة....
وام عياله.... مابقي احد ماترجته عشان يتوسطلها عنده
وهو يوم جرب الراحة....
مايتحمل حتي يسمع طاريها....
تقولي اخته وهي من الثقات عندي .....
انه يقولها والله ماكان عندي نيه للعرس
وكنت راضي فيها واقول نصيبي....
كانت غلطة بس الثمن غالي....
كل ماراحت مع ام زوجها السوق....
حملت من هالمواعين....
والام تدفع وهي فرحانه.... تقول لبيت ولدي
بس الامر زاد عن حده.... قال الولد لامه...
يايمه الله يرضي عليك معاد عندي مكان...
لهالكراتين اللي احملها كل مارجعت شقتي...
قالت تردني ماتبي مني شي...
مسك مرته وحذرها انها معاد تطلب من امه شي
لدرجة منعها معاد تروح السوق مع امه ....
المهم صارت تنجاب المواعين ومايعلمونه...
وهو راجع لبيته.... اذا قال وش كل هالاغراض
كانت ترد عليه مرته اغراضي انا وعيالك....
مرته مدمنه اغاني...وهو رافض الاغاني....
وحذف جميع قنوات الاغاني من تلفزيونه
قالت له ابي مسجل...
قالها ليه...اذا علي القرآن والمحاضرات موجوده فالتلفزيون
انا عارف ليه تبينه عشان الاغاني....
قالت والله يا مثل ما خليتك تشيل المواعين انت بيدك
وتدخلها البيت وانت ماتدري وش شايل ....
لا اخليك تشيل المسجل ...وتدخله انت بيدك وانت ماتدري
ضربها وفقع وجهها...وقال طلعي وش مستغفلتني فيه بعد
وصار يشك فيها ويفتش اغراضها....
ولغة التفاهم بينهم صارت الضرب....
كانت غلطة بس الثمن غالي....
غالياتي... قبل الدخول فالموضوع....
أحب اوضح نقطه المفروض انها تكتب فالاخير
بس انا بكتبها فالبدايه ليسهل تقبل كلامي....
انا يا اخواتي ما ادعي الزوجه لتكون ذليله....
او جاريه عند زوجها...يضربها وتسويله ليالي حمراء وخضراء
انا عندي فكر مختلف وقناعات ثابته.....
انا مقتنعة قناعه تامه ان الزواج والاسره اهم شي فالوجود
فلأن هذي قناعتي انا ابذل كل جهدي لبناء اسره
مستقره سعيده ....من دون ان تمس كرامتي او تهان
وعشان اكون صريحه مع نفسي قبل اي احد....
اعترف ان....
الزوج هو قائد السفينه اللي له الكلمه الفصل
باستمرار الاسره او هدمها....
والخاسر في كل الاحوال الزوجه....
اذا وصلت لهالقناعة المفروض اعرف...
خطوط زوجي الحمراء اللي بالتاكيد تختلف عن اي احد غيره
ليه قلت الخطوط الحمرا....
لان اي مشكله وخلاف بينتهي وبنتصالح...
ونرجع نختلف ونتهاوش وايضا بنرجع سمن علي عسل
الا في حال تجاوزت امور هي عند رب اسرتي
من المحظورات....
فهالوقت بتنقلب
حياتي.....
ركزوا غالياتي حياتي انا....لا حياة امي ولا اختي
ولا اي عضوه فالمنتدي بتشور علي بشور غير مسؤول
الفضفضة فالمنتديات مسموح....
واخذ المشوره مباح والاسلام يحث عليه....
لكن المفروض ان اي راي قبل العمل فيه
اشوف يناسبني... ممكن يتناسب مع شخصيه زوجي
بعض الازواج مايفيد معه الا القوه وهذي حقيقة
كل ماشاف منك لين او ضعف زاد قسوه....
فاذا اشارت عليك وحده بانك تخضعين له وتتوددين
هالشي يزيده تجبر وطغيان وتنهدم اسرتك...
لانه بيزيد بطغيانه عليك وظلمه لك لدرجه بتستحيل العشره معه....
هذا نموذج....
فالمقابل ممكن تشور عليك براي يكون عند زوجها عادي
مثل تقول روحي لاهلك..... وهالشي يكون من الخطوط الحمراء لزوجك فتهدم حياتك...
بعيد عن ان اي تفاصيل تخص القصص ومن الغلطان....
انا بناقش....
النتيجة....
نوع من الرجال....
عنده خط احمر لبعض الامور... قد تبدو انها
امور عاديه عند رجال غيره...
او انها اشياء قد يكون الجدال والاخذ والرد فيها مسموح....
اما هو....
فان اي تعدي لزوجته للمحظورات عنده تلقينه ينقلب انسان ثاني....
بعرض بعض الامثله علي شكل نقاط....
1) البعض عنده خروج مشاكله خارج نطاق البيت خط احمر
2) البعض امه خط احمر مستحيل يرضي علي امه لو نظره
3) نوع عنده ردي علي وتهاوشي معي فالبيت مثل ماتبين
بس بري قدام اهلي والناس خط احمر
4) نوع عنده الكذب خط احمر لو كان علي سبيل التجمل
اذا صاد عليك كذبه غيرته عليك كليا
وقيسوا علي كذا....
يا اخواتي المفروض الزوجه تعرف نوعية زوجها
وخطوطه الحمرا وما تتجاوزها....
اعيدواكرر مو عشان الزوج عشان حياتي انا
ليه اتزوج وانا مزهبه اسلحتي الفاشله براسي
اذا جبت ولد....اذا كثروا عيالي
اذا توظفت... اذا كبروا عيالي....
بسوي بفعل...لييه عسي ماشر
الرجل يبقي رجل وهو بالثمانين والتسعين بعد
امي تقول...
(ام عشره مقلع شجره)....
ودائما اري حكم الوالده تتحقق قدام عيني...
في يوم قبل سنوات سمعت بطلاق ام فالح....
انصدمت وماصدقت اصلا شي مايصدقه عقل
عندها 8 عيال رجال وبنت.....
وفيه من عيالها متزوجين...وهي مرته طول عمره
ما طلقها عشان يتزوج لا راهق علي كبر....
بس الله وحده يعلم السبب....
قعد عزوبي لين مات الله يرحمة ويغفرله....
وهي ماجلست عند ولا واحد من عيالها راحت عند اخوها
الشاهد من القصه يا اخواتي ان المره....
تزوجوا لترتاحوا....وانسفوا كلام الاعلام الهدام
المساوات وراسك براس الرجال....
المره مره والرجل رجل....وهنا الروعه والجمال
واسفة عالاطاله....
بس لعلي اختم بكلام (ممثل عربي)....
وهو ليس بقدوه ولايستحق....
بس الكل يعرف آرائه ومناداته بحقوق المراه...
والانسان ليبرالي حتي النخاع....
يساله مذيع ليه يطلق....
قال ولعل الله انطقه...
اذا كنت تشتغل وهي تشتغل وتسوق وهي تسوق وعندها علاقات كبيره وواسطات....
مساويه لك تماما وتحس انها مهي محتاجه لك نهائي
تقتل بك زهو الرجوله وتحس انك متزوج رجل مثلك
انا ابي انثي تحتاجني بضعفها احس بقوتي....
...........................
اسأل الله ان يرزقني واياكن الحكمه وحسن التدبير
ويسخر لنا ازواجنا ويديم الاستقرار علينا
تم بحمد الله...
151
12K
يلزم عليك تسجيل الدخول أولًا لكتابة تعليق.
زيود الحلو
•
ماشاء الله كلامك درر الله يجزاك خير ع هالنصايح القيمه
جزاك ربي وإيانا جنان الفردوس الأعلى
الله أكبر الله أكبر الله أكبر لا إله إلا الله
أستغفر الله. سبحان الله. الحمد لله. لا لإله إلا الله .الله أكبر
اللهم صل وسلم على نبينا محمد وعلى آله وصحبه أجمعين
اللهم أجعل الفردوس سكن لي ولوالدي ولمن قال آمين
الله أكبر الله أكبر الله أكبر لا إله إلا الله
أستغفر الله. سبحان الله. الحمد لله. لا لإله إلا الله .الله أكبر
اللهم صل وسلم على نبينا محمد وعلى آله وصحبه أجمعين
اللهم أجعل الفردوس سكن لي ولوالدي ولمن قال آمين
الصفحة الأخيرة