غلطت غلطة حياتي

السلام عليكم
بنات حاولت ما اكتب لكم من العصر لكن ماعاد اقدر اتحمل ابدا
اليوم غلطت غلطة حياتي وسببت مشكله ثانيه بغبائي
طليقي من امس يتصل فيني وما ارد انا ماغيرت شريحتي المهم يتصل وانا طناش لان لو يبغى شي بخصوص الاطفال كان كلم بنتي او واحد من اهلي مع ان بخاطري ارد اشوف وش يبغى بس والله مارديت ولا حتى عطيته مشغول خليته يرن يرن يرن لين يقفل من نفسه وهكذا
اليوم قلت لاخوي وش صار على بناتي وولدي مدارسهم ماكلمتوه ينقلهم قال اخوي مفروض هو يسويها من نفسه من غير مانقول له قمت انا بكل عفويه قلت هو من امس يتصل فيني الا اخوي يرفع عيونه فيني ويطيرها لفوق رديتي عليه قلت لا والله مارديت اتصل ولا رديت وقال هاتي جوالك ويشوفه الا مكالمات منه لم يرد عليه قال اقسم بالله لو ادري انك راده عليه ومكلمته من ورانا لا ادفنك وانتي حيه
قلت ارتاح وتطمن مو انا اللي اسوي شي من وراكم وقام اخوي علم اخوي الكبير ويجي اخوي الكبير وياخذ جواله ويتصل بطليقي ويقول ليه تتصل بام فلان ( يقصدني ) بنتك ماعندها جوال ولا مضيع رقم بنتك وش تبي لاعاد تتصل وان اتصلت بتشوف شي مايسرك
وقاله اخوي بعدين تعال انت ماتدري ان المدارس بكره ولا سويت لاطفالك نقل
ذاك طليقي شكله يعاند اخوي ويقول متى مانقلتهم نقلتهم واخوي يتوعد فيه ويتهدد وقال اسبوع فقط والقاك مرتب امورهم
وطبعا يسبه وذاك يعاند فيه واخر شي حلف انه ماينقلهم واخوي حلف ان مر اسبوع ومانقلهم ماراح يشوف شي طيب
والحين زاد همي هم خايفه ماينقلهم او يتاخرون ما يروحون للمدرسه ولا اعرف شي عن نظام النقل وكذا ما اعرف شي بالانظمه كلها
نفسيتي تعبت كل ماقلت بتنفرج وانسى واعيش واكمل وافتح صفحه جديده الا يجي شي يعكر حياتي من مشاكل او تفكير
دعواتكم