غلطه قبل سنه ونص وللحين ماني قادره اتجاوزها 💔

مساء الخيرات ياحلى حوائيات
بنات انا قبل سنه ونص بالضبط اعترف فيها اني كنت غلطانه 100% بالتصرف
السالفه اني كنت جالسه بغرفه الجلوس عند ناس بنات عمتي وطلعت الحوش باكلم ورجعت هم مانتبهوا اني رجعت وكانوا قاعدين بالصاله مانتبهوا اني فتحت الباب الرئيسي وسمعت اسمي بحديثهم وقعدت اتسمعهم يحشون فيني اني غثيثه وسكت وماقلت شي ولا علقت وبعدها عزمونا مره ثانيه وانا تعمدت اروح عشان افاتحهم بالموضوع واقول اني سمعتكم تتكلمون بي لاني خلاص انقهرت انهم يحشون فيني وفعلا رحت وتناقشنا بالموضوع وقالوا مانقصد من هالكلام وركبوني الغلط اني اتسمع عليهم
وصرنا رسميين مع بعض تقريبا شهرين بعدين رجعنا نسولف مع بعض بس انا خاطري شايل عليهم انصدمت ان هالناس تهرج بظهري مع اني انا احيانا اهرج فيهم مع خواتي بس مدري ليه انصدمت بقوه وتوقعت انهم مايعيبوني ابداً مرت سنه ونص وانا كارهتهم وهم متحسفين ع كلامهم مرضت امهم اللي هي تصير عمتي بالسرطان وانا قلت بارافق لها ماهو عشان سواد عينهم لانها عمتي وماجاني شي منها بس رفضوا وقالت بنتهم انا باخذ اجازه وارافق
طلعت عمتي من المستشفى والامور تمام بعدها حسيت يتلطفون لي بزياده ويحاولون يكسبوني باي طريقه لدرجه كنا مره نسولف عن الشناط وكذا وانا قلت اني لقيت شنطه قوتشي بموقع بس ماطلبتها لانها غاليه مادريت الا وحده من بناتهم طالبتها لي جايبتها وقالت اعتبريها هديه
للامانه هم اخدموني خدمه حتى خواتي مايسونها وانا كنت مره معهم وعلاقتنا قويه وحلوه عشان كذا انصدمت وللحين شايله عليهم وبزواجي بالتجهيز كانوا اخواني احيانا يتعذرون باشغالهم هم يرسلون سواقهم لين عند الباب
عشان توضح لك الصوره والله يابنات انا شخصتي وكتبت قبل الحمدلله اشوف لي قبول كبيييير من كل الفئات ومن قلب يعني ابدا ماني زي ماقالوا
بس وقتها كانت اختهم توها متطلقه وعمتي اعزمتنا اتا وامي ورحنا لهم وحنا وش يعرفنا انهم منفسين
عجزت اتجاوز هالشي اقول ليتني ماتسمعت كيف اتجاوز كلامهم كل ماشفوهم يتلطفون لي اتذكر كلامهم عني