أول أقـول المـوت فينـي ولافيـك
واليوم جعل الموت ياخـذ حياتـك
دامك تبيع انسان بالكـون شاريـك
موتك ولاتوهـم لغيـري صفاتـك
فيني مشاعر كل ماانسـاك تطريـك
تلعن وفاهـا يـوم لاقـت رداتـك
وقف دقايق واذكر اللـي يواسيـك
جفف دموعك قبل تاصـل شفاتـك
تذكر تجيني تبكي الظلـم وابكيـك
واشيل جرحك "اجبرتنـي غلاتـك"
وإن غبت عني كـل مابـي يناديـك
حطمت حلمي ورحت ألبي امنياتـك
ادري الجمال وسود الأهداب كاسيك
لكن حسافه .. عكس وصفك خفاتك
ياما رجيتك ودمع عينـي يحاكيـك
طاوعت نفسك وكلمتي اليوم جاتك
مابيـك انـا بدنيـاي والله مابيـك
رح ياعساك بجرح ينـزف شقاتـك
واول أقول المـوت فينـي ولافيـك
واليوم فرحي " ينولـد فـي وفاتـك
الصفحة الأخيرة
والله اني لاموت ولاانحني راسي
لو رماني زماني وسط..دوامه
العواصف شديده .. والجبل راسي
أنقل الحزن وامشي منتصب قامه
قاسي الوقت .. لكني بعد قاسي
واسمع الحلم يصرخ لحظه اعدامه
رابط الجاش ... ماهز الخبر باسي
عزتي غاليه ..والناس سوامه
قلت ماابيع حتى تقطع انفاسي
زانت ايام عمري .. شانت ايامه
مارجيت العزى من رحمة الناسي
من عجز لايدوس الهم باقدامه
لازم انه مع الايام ينداسي
يندمل جرح القلبٍ ..ماتت احلامه
بس ما اظن يبرى جرح الاحساسي
يوم صارت مابين القلب والهامه
وش ابي بالحياة اليــا انحنى راسي
مساعد الرشيدي