بسم الله الرحمن الرحيم
أخواتي الكريمات
بحييكن من أرض الشام المباركة ,
المهم : أول يوم بالعيدالفائت عملت أكلة , أول مرة بعملها , ( و من بنات أفكاري ) , بصراحة أنا كنت من فترة عم فكر أعملها , و قتها , الله يسرلي و اعملتها
هالأكلة : أنا جمعت فيها بين نوعين من الفتات السورية , أول فتة هيي فتة المكدوس ( و ما أدراكم ما فتة المكدوس , يعني بصراحة هالأكلة حبيبة قلبي و قلوب الكل , و هيي فعلآ بتستاهل ) , و الفتة التانية هيي فتة الدجاج , فأنا عملت فتة الدجاج , على طريقة فتة المكدوس
و لإني عم جرب , و ما بعرف كيف بتطلع , فعملت بس صينية صغيرة و بمقادير قليلة , و لكن و الحمد لله طلعت طيبة كتييييييييير و شهية , و أهلي حبوها و أكلوا الصينية عالآخر و قالولي : يا ريت في كمان
راح بنبلش بالطريقة : بسم الله
سلقت فخد دجاج مع بصلة صغيرة و ورق غار و هيل و قرفة و كمون و بهار
( بالنسبة للبهار اللي بستعمله , هوي خلطة بهارات مشكلة , نحن منعملها على إيدنا بالبيت , بس كتير طيبة )
حضرت الصلصة التالية : بصلة صغيرة قطعتها جوانح و حطيتا مع شوية زيت عافية عالنار و تركتها لاستوت , و بعدين حطيت شوية دبس فليفلة , وبندوراية مقطعة ناعم و شوية صوص بندورة , و شوي من مرقة الفخد المسلوق , وظبطت الملح و البهار , و تركتهن , ليعقدوا ( ييتسبكوا ) , منيح
بس للحقيقة هالكمية اللي بالصورة قليلة , كان لازم أعمل الضعف , لأن هاي الصلصة كل ما كانت أكتر كل ما كانت الفتة أطيييب
قطعت بطاطا و بيتنجان مكعبات , و قليتهن مع بعض
حضرت صلصلة لبن رائب مع طحينة و ملح و شوية بهار
( و كترت الطحينة , أطيب )
هلأ : جبت البيركس و حطيت أول طبقة : خبز مقطع و محمص ( أنا بقطع الخبز مربعات صغيرة و بحطه بطنجرة و بدهن قعرها و جنابها بزيت زيتون , و بحط الطنجرة على نار هادية و بحرك الخبز كل شوي و شوي ليتحمص و يقرمش تمام , و هالخبز بستعمله للفتات و الفتوش , بيطلع تحفة ) , أو ممكن ييتحمص بالفرن
حطيت فوق الخبز , شوي من مرقة الفروج ( الدجاج ) و حركتهن لفوق و لتحت
بعدين حطيت صلصة البندورة , و متل ما قلنا : لازم تكون كتيرة شوي , لإنها بتعطي طعمة طيبة للفتة
و حطيت على وجه الصلصة ,مكعبات البطاطا و البتنجان المقلية
, و على وجهن حطيت صلصة اللبن و الطحينة ( حضرتها بإني حطيت كمية من اللبن الزبادي و كمية من الطحينة , تقريبآ الطحينة قد واحد على عشرة من اللبن , و هالكمية إنت بتتحكمي فيها حسب رغبتك , و بتحطي ملح و بتخفقيهن كتييير منيح ليتجانسوا تمام )
و آخر شي حطيت قطع الفخد المسلوق
و زينت بالبقدونس و الصنوبر المقلي
ملاحظة كتييير مهمة : أنا كان لازم حط على الوجه كمان سمنة بلدية مدوبة عالنار , لأن كل الفتة , بدها سمنة على وجهها , و إلا راح يكون ناقصها شي ضروري أكيد , و إذا السمنة مو بلدية , أي سمنة طيبة موجودة عندك , بس أنا بصراحة ما حطيت السمنة , مشان قلل الدسم , و حتى كل أهلي قالولي , طيبة بس كان بدها سمنة على وجهها ,
يا رب تكون عجبتكن , و بتمنى تجربوها , و صحتين و عافية
( حبيباتي أحلى عضوات, عم بستنى آرائكن الغالية متلكن , أكيد بتهمني , لا تبخلوا عليي فيها , و مشكووووووووووووورين سلفآ)
و لكم مني أنا إيثار الشام كل الحب و الود , و باقة ورد
ملاحظة : قبل ما تسألوني على فتة المكدوس و فتة الدجاج , راح تلاقوا شرح كافي و وافي و مفصل عن الفتتين بأول رد , و أحلى تحية و سلام لكل عضواتنا الغالين و الحلوين , و دمتم جميعآ سالمين
فتة المكدوس :
جيبي بيتنجان بحجم صغير , و قشريه خطوط بالطول ( يعني يطلع مخطط أبيض و أسود ) , و جيبي محفارة الكوسا , و شيلي بس عمود واحد من قلب البيتنجانة ,
هلأ بتكوني محضرة لحمة هبرة مفرومة و اقليها ( عصجيها أو كشنيها) مع ملح و كمون و بهار و حطيلها صنوبر مقلي , و إحشي البيتجان المحفور باللحمة و بعدين جيبي العمود يلي شلتيه من قلب البيتتجانة و اقطعي منه قطعة صغيرة , و سدي تم البيتنجانة بهالقطعة , و بعدين إقلي البيتنجان , بالزيت الغزير , ليستوي , و بعدين شيليه و حطيه بمصفاية ليصفي من الزيت
هلأ :
اعملي الصلصة التالية
قطعي بصل جوانح , و اقليهن بزيت عالنار , و بس يستووا حطي فوقهن بندورة , مقطعة ناعم , و شوية رب بندورة , و إذا عندك دبس فليفلة , حطي شوية كتير صغار
و اتركيهن ليغلوا و ييتسبكوا عالنار , و حطيلهن ملح و كمون , و بهار ( إذا عندك خلطة بهار معتمدة للأكل حطي منها ) ,
حطي البيتنجان المحشي و المقلي مع صلصة البندورة و البصل و البهار يلي عالنار و قلبيه بشويش شي عشر دقايق أو ربع ساعة ليستوي مع الصلصة و ياخد طعمتها , و بس يستوي شيليه , و حطيه على جنب
هلأ : حطي الخبز المحمص ( خبز مقطع و محمص مع زيت زيتون بالفرن ) , و فوقه حطي الصلصة الحمرا ( البندورة و البصل ) , و راعي تكون كميتها مناسبة , يعني كتريها شوي مشان الخبز ييتشرب الصلصة و ما يطلع ناشف , و بعدين حطي فوق الصلصة اللبن الزبادي المخفوق مع الطحينة و الملح ( و توم إذا بدك ) ,
و فوق اللبن حطي البيتنجان ( و لا تنسي تشيلي الشقفة يلي حطيناها بتم البيتنجانة ) و حطيه بشكل متناسق , بحيث يعطي شكل هندسي حلو
آخر شي اقدحي سمنة عالنار , و حطيها فوق صينية الفتة
و فيكي تزيني الوجه بالبقدونس المفروم , أو فستق حلبي مبروش ,
أو بالمكسرات المقلية ( لوز , كاجو )
أما فتة الدجاج :
و فيكي تعمليها و بنفس الطريقة كمان باللحمة المسلوقة
اسلقي الدجاج ( أوشقف اللحمة و لازم تكون لحمة من يلي مخصوصة للسلق , نحن منقلها لحمة الموزات , و هيي عبارة عن العضلات المغزلية أو متل ما منقول : كراديش اللحمة ) بالطريقة المعروفة : مع مي و بصلة و ورق غار ( ورق لورا ) و هيل ( حبهان ) و كمون و قرفة و بهار , و بس ييستوي , قطعيه شقف
هلأ : جيبي البيركس ( أو أي صينية عندك , بس أنا بحب أعمل الفتات بالصواني البيركس بحس منظرها أحلى ) و حطي أول شي قطع الخبز المحمص ( فيكي تستعيضي بقطع خبز مقلي ) و سقي الخبز بمرقة الدجاج ( أو اللحمة ) المسلوق و بعدين حطي فوق الخبز صلصة ( اللبن الزبادي مع الطحينة ), و بعدين حطي شقف اللحمة عالوجه , آخر شي دوبي السمنة و طشيها على وجه الصينية و زيني بالمكسرات المقلية