فترة النفاس والزوار .... تعالوا نتكلم بصراحه !

السلام عليكم ورحمة الله وبركاته


انا ودي اتكلم معاكم عن عادة زيارة الوالدة في فترة النفاس في مجتمعنا ..

هو لا شك ان زيارة المريض امر واجب ومحبب والهدف منه ادخال السعادة والراحة النفسية للمريض ..... لكن متى ما اصبحت الزيارة حمل ثقيل على المريض و غثا مثل ما هو صاير الايام هذه عند بعض العوائل فأعتقد انه انتفى الهدف الاساسي من الزيارة .

جدتي قالت لي انهم ايام اول كانوا اذا ولدت وحده يزورونها الجارات والاقارب في وقت معروف وهو عادة فترة الضحى حيث انه الرجال في اعمالهم .. وكل وحده منهم تجيب معها الشاي والا القهوه او مشروب القرفه او الغدا للوالده كمساعده لها ..

الايام هذي انقلب الحال وطلعت علينا بدع وعادات تكاد تكون مزعجه للبعض ..
الزوار يجون الضحى والعصر والمغرب والعشاء على مدار الاسبوع وبعضهم ما يطلعون الا الساعه 11 بالليل وانكان ولادتك برمضان الله يعينك ... طيب متى ارتاح وانا طول الليل سهرانه ؟ متى ادرس عيالي ؟ متى اشوف حالي وحال رضيعي ؟؟؟

والزوار يتوقعون منك تكونين جاهزة ومجهزة الصبابه والشاي والقهوه والعصيرات والمعجنات والشوكولاتات والحلويات ... وطبعا هذا كله مكلف على البعض وخصوصا اذا كان بشكل يومي ، ومتعب في حالة من اللي يجيبه اذا كان من برى ومن اللي يصلحه اذا كان تصليح ! واذا حطيتي لهم شي عادي او متواضع قالوا هذي حاقرتنا .. يصير والا ما يصير ؟؟

واحيانا يصبح منزل ام الوالدة نادي او ملتقى للجارات وبعض الاقاراب فتلاقينهم يجيونك اكثر من مرتين او ثلاث مرات ويعزمون الناس لبيتك بعد !! بحجة ان بنت فلانه والدة وش رايك تجين معنا نتقهوى عندهم !

واصبحت المسألة ليست أمر ديني حثنا علينا الرسول عليه الصلاة والسلام بل اصبحت الدعوه اسلاف وديون ... فلانة ما زارتني ماني زايرتها .... وما رح ازور فلانه عشان ما تزورني !


انا رأيي ان فترة النفاس فترة نقاهه .. فترة راحه .. ويكفينا التعب والارهاق والاكتئاب والطفل


والا انتم وش رأيكم ؟