مشكورين ياحياتى ما قصرتم يا(سارونه22)و(نوسه7070)بس عندى استفسار بسيط وين مكان شارع الحب ومجمع الواحه وشنو احسن صيدليه ومطاعم كبائن بس راقيه .

سويت لك بحث بقوقل بما اني ماعرف اوصف اسماء شوارع وكذا وطلعت لي هالقائمه :)

تفضلي واتمنى تفيدك

اليوم جايبه لكم نبذه عن اسواق و محلات ومطاعم .. الخ .. اللي بالدمام والخبر .. للناس اللي ما تعرف كثير فيها .. او الناس اللي من بره الشرقيه

الأسواق

الخبر

مجمع الظهران - جيان

انا يعجبني هالمجمع .. مجمع مريح .. هاديء .. خصوصا ً ايام الأسبوع .. فيه اغلب المحلات المشهوره .. مطاعمه حلوه .. وفيه كوفي شوبات منوعه و جلساتهم حلوه ومو مسكره

مجمع الراشد

يوازي مجمع الظهران بالشهره او الاقبال الشديد عليه .. فيه اغلب المحلات المشهوره بعد .. بس يمتاز انه فيه السواني ومحلاته ..

فؤاد سنتر

امممم المجمع موقعه حلو .. على كورنيش الخبر .. بس المحلات اللي فيه قليله .. ومو مره حلوه .. يمتاز انه فيه فدركرز و التوي تاون للي عندهم بيبيات

الجمعه سنتر

مجمع يقع بالقرب من المريديان بالخبر .. يمتاز بوجود محلات فساتين سهره كثيره .. مطاعمه كريهه ومو حلوه ..

شارع السويكت

سوق مو مسقف .. و يمتاز اكثر شي بوجود محلات العبايات .. يعني اي احد يبي يسويله عبايه يروح السويكت .. محلات كثيره واختيارات متنوعه واسعار متفاوته .. ايضا َ يمتاز بوجود محلات الأقمشه ..

الخبر بلازا

مجمع صغنونو في وسط شارع السويكت .. محلات متنوعه عاديه مو ماركات ..

الخبر مول

مجمع يقع في حي الحزام الذهبي على الشارع الرئيسي .. يمتاز بوجود محلات الأقمشه المتنوعه

مجمع التركي

مجمع صغنونو مره على كورنيش الخبر بس مافيه شي مميز

شارع الملك فهد + شارع الملك خالد

يمتاز بوجود الاماكن المتعدده للأجهزه بجميع انواعها والتنوع فيها وبأسعار متفاوته

الدمام

الشاطئ مول

يقع على كورنيش الدمام .. صحيح محلاته قليله نسبة لمجمع الظهران او الراشد .. بس حلو نوعاً ما .. فيه عدة اماكن " مانجو .. بو كنان .. ديفورييس .. ناين ويست .. أولدو .. " .. يميزه انه فيه صالة تزلج كبيره لأطفال .. و مطاعمه حلوه بعد

مارينا مول

قريب من الشاطئ مول .. بكورنيش الدمام .. محلاته اغلبها مو مشهوره .. بس فيه السواني بس مره فاشل ! .. ويتميز بوجود محلات فساتين سهره جاهزه وأقشمه .. مطاعمه حلوه بعد وجلساتهم تطل على البحر

مجمع الواحه

مجمع قديم نوعاً ما .. يقع بالقرب من الاستاد الرياضي بالدمام .. محلاته منوعه بين المشهوره والعاديه .. يتميز بأنه هاديء نوعاً ما ..

سوق الدمام - يعرف بسوق الحب

يقع عند امارة الدمام .. سوق شعبي نوعا ً ما .. يعني وانتوا تمشون تشوفون بسطات بالأرض .. تلقوون اشياء واجد ما تلقونها بالمجمعات .. يعني الخرابيط القديمه وكذا .. يتميز بوجود محلات الأقمشه وبأسعار مناسبه .. و يتميز بوجود " ابو ريالينات " >> لووووووول .. ويتميز بوجود الجلابيات والذهب والمكياج بأنواعه والأشياء هذي

الحياه بلازا

خذولكم تكسي وقولوله وين الحياه بلازا لأني ما ادري وين وبأي شارع .. سوق وده يصير مجمع ووده يصير سوق عادي كبير مره مره .. وكله محلات عاديه .. سماء .. رامز .. وهذي الشغلات .. احسه ينفع اكثر شي لربات البيوت .. يعني اواني وهالشغلات

ابن خلدون بلازا

مجمع ضغنونو بالنسبه لمجمع الظهران او الراشد .. يجمع بين المحلات المشهوره والعاديه .. مش بطال

مجمع الشرقيه النسائي

مجمع نسائي . . مغلق .. يمنع دخول الرجال فيه .. يحتوي على اماكن متنوعه بسيطه .. ومطاعم قليله غير متنوعه .. يقع بكورنيش الدمام .. لا انصح بالذهاب اليه

المطاعم

الخبر

ابو نواس

يقع عند كورنيش الخبر .. مطعم لبناني .. يقدم جميع المأكولات اللبنانيه والعربيه .. يمتاز بجوه العائلي واكلاته الشهيه .. و ابو شنب اللي يقدم القهوه .. اسعاره معتدله

بيت التنور

مطعم يجمع بين كل شي .. الأكل المميز والمتنوع الأضناف " لبناني - ايراني - هندي " .. لا تفوتكم الاطباق الايرانيه وبرياني الدجاج اهم شي << صايمه .. الأسعار الجيده .. الجلسات المريحه و المتعدده بين البارتيشن والمفتوح .. الجو العائلي الرائع .. الخدمه الجيده .. الديكور الرائع .. بصراحه من احلى المطاعم اللي رحتها .. له فرعين .. بس صراحه وللأسف ما اعرف اسماء الشوارع .. بس لا يطوفكم

كوبر شندني

مطعم هندي يقع في شارع الببسي بالخبر .. ستايله هندي مره حلوو .. ويقدم اكلات هنديه .. وعندهم فرع بالدمام .. ما رحتله الا مره وحده .. بس حلوو .. وعائلي .. بس جلساته تخنق شوي

تشيليز

يقع في كورنيش الخبر .. طبعاً غني عن التعريف .. مطعم امريكي .. يقدم جميع المأكولات الامريكيه " الدسمه " ! .. يصلح اكثر شي لجمعات البنات .. لامتيازه بالجو الوناسي من ستايل ومأكولات و ديكور .. يتميز بأكلاته اللذيذه والغير تقليديه ..

آبل بيز

يقع على كورنيش الخبر .. مطعم امريكي .. ويقدم المأكولات الأمريكيه بأنواعها .. ديكوره أحلى من أكله ! .. ما عجبني اكلهم صراحه .. بس ما يمنع تجربونه ..

موندو

مطعم ايطالي .. يمتاز بتقديم العصائر المميزه واللذيذه

جاندولا

مطعم ايطالي ايضاَ .. يمتاز بتقديم انواع متعدده من الباستا الشهيه

ستيك هاوس

مطعم امريكي .. يتميز بتقديم انواع متعدده من الستيك والمأكولات الأمريكيه البحته

اصفهاني

مطعم ايراني يقع خلف شارع الكورنش بالقرب من القلعه .. مطعم ايراني يقدم المأكولات الايرانيه الشهيه بجميع انواعها .. ويتميز بجوه العائلي

امبراطور المانجو

محل عصيرات يقع في شارع السويكت بالخبر .. يتميز ببيعه انواع منعشه و بارده و لذيذه من العصيرات .. والخلطات المميزه ايضاَ مضاف معها قطع الفاكهه والعديد من الاختيارات

الدمام

القريه الشعبيه

صراحه ما مره رحته .. ولا ادري عنه .. بس هو عند كورنيش الدمام .. يتميز بستايله الشعبي وتقديمه للأكلات الشعبيه البحته .. من كبسات و منديات وهريس وجريش وهالشغلات

الشحرور

امتداد الشارع الأول بالدمام قبل الشيراتون .. يمتاز بأكله اللذيذ .. مشويات .. مقبلات .. سندويشات .. ما مره جربت الجلسات حقتهم

البحار

يقع عند المخازن الكبرى بحي الجامعيين بالدمام .. و فرع ثاني بامتداد الشارع الأول .. يتميز بتقديمه للمأكولات البحريه الشهيه .. خصوصاً الروبيان .. بس انه فاشل بالأشياء الثانيه ! خصوصا ً الأرز .. والورق عنب والمقبلات

كرسبي ميل

له عدة فروع .. بالدمام والخبر .. مطعم للمأكولات السريعه .. يتميز بتقديم سندويشات شهيه .. و البروستد حقه مره لذيذ ..

مطعم الناعوره

مطعم يمتاز بتعدد فروعه بالدمام والراكه وغيرها .. يمتاز بتقديم جميع انواع الفطائر الساخنه الشهيه والفريش

دارين

مطعم يقدم المأكولات البحريه .. ما مره جربته بس يقولون حلو .. يقع عند كورنيش الدمام

مطعم ليالينا

ما مره جربته .. يقع على كورنيش الدمام .. بس شكله حلو

شاهيناز

مطعم ايراني يتميز بتقديم الاطعمه الايرانيه المتنوعه بأصنافها الرائعه وجلساته الجميله والمريحه .. يقع عند الجميح بالشارع الأول

ركن الفراوله

محل عصيرات .. يتميز ببيع العصيرات المتنوعه اللذيذه والطازجه .. والخلطات المميزه من العصيرات البارده والمنعشه .. يقع في حي عبدالله فؤاد مقابل الاسكان

وتنورين الشرقيه .. وياهلا فيك

أرق تحيه

يا حياتى ما قصرتى يعطيك العافيه بسألك عن محلات تقليد الساعات درجه أولى وين احصلهم ويعطيكى العافيه ياعمرى.

بالنسبه لمحل العبايات

لمسه وفاشن توب بالراشد
بدون اسم بفؤاد سنتر والواحه والراشد والظهران مول اممم هذا اللي اذكرهم
السلطانه ورا مجمع التركي
( اللي فوق اسعارهم العاديه من 300 وطالع واللي مره حلوه 800 و 1000 وفوق )
بو كنان بالواحه والظهران مول والراشد والحب ومدري افرعه كثييييره
محل شمس بالسويكت
محل الصقر الذهبي بالسويكت تقاطع 8
وخويتي تمدح عبايات الصالح انا اعرف له فرع بالجبيل "الفناتير مول" بالدمام والله ماعندي فكره ..


انا اتعامل مع بدون اسم وبو كنان اسعارهم متفاوته العاديه تحصلينها من 250 وطالع
واللي مره توب 800 وفوق

عن الساعات اسمحيلي ماعندي اي فكره

اشتري من محل سواتش عمليه واحبها واسعارها ماتتعدى 400 من 300 الى 400 اظن
.. والكوهجي بسوق الحب بس اسعاره 900 وطالع

التقليد ماعندي فكره ..


ان شاء الله البنات يفيدونك اكثر

بالتوفيق يالغاليه