فزع لي الله يكثر من أمثالة

السلام عليكم ورحمة الله وبركاتة
اليوم يأخواتي صار لي موقف بسوق غرناطة بالرياض,,, وأبذكر لكم الحدث على أساس الواحد يطالب بحقه ومايرضى بالظلم أو بالإستحقار من قبل الآخرين,

اليوم أنا وأختي رحنا لسوق غرناطة للترفهي عن أطفالنا نلعبهم ونعشيهم بحكم أن يوم السبت أقل زحمه,,
المهم جينا نلعبهم عند لعبه أسمها (( التكسي المجنون)) وسعر العبه 12 ريال للشخص الواحد,, طبعا هم أربعه أخذ عليهم 48 ريال,, جاء بعدنا واحد مصري معاه بنتين دفع لوحده والثانية مجانا ,, ثم جاء واحد شامي معه بنت وولد البنت أخذ عليها والولد لا ثم جاء هنود ولدين ولا اخذ عليهم شيء نهائيا لانهم ربعه ويعرفهم,,,
بصراحه حسيت بالقهرررر ليه احنا يأخذ على اطفالنا كلهم وهذولا لا؟!!!

قلت ليه ما أخذت عليهم ((تكت)) قال لا هم عندهم مجانا:37:
الصراحه زاد قهري أكثر :mad:يستغفلني شايفني((بقره)) :mad:

قلت زين .. وأروح للسكيورتي حقين الألعاب,, وهم شباب سعوديين الله لايخلينا,, قلت أنا أبغى المدير المسؤول عن منطقة الألعاب

قال لي فيه 3 مدراء وعددهم لي ,, قلت ابغى المدير المسؤول عن الموظفين الي يشغلون الألعاب قالوا لي فلبيني قلت نادوه لي.. جزاه الله خير فزع لي وجاء مسؤول هندي قلت ابغى المدير قال وش المشكله قلت المشكله كذا كذا قام تكلم مع السكيورتي لكن السكيروتي السعودي راح وجاب لي مسؤول سعودي ,, وكان لابس بنطلون وقميص..

قلت أنت سعودي:cool:
قال أيه أمري,, قلت الله يجزاك خير القصة كذا وكذا وأنا والله حسيت بالقهر في ديرتي وأنهان علشان أنا سعوديه يأخذ مني فلوس والي غير سعودي يخفض له والي نفس جنسيته ببلاش والله قهر:06:

قال تعالي وريني اياه وأنا أجي وأشر عليه وكل العمال تجمعوا بيشوفون وش فيه ويناديه ويرسله للإداره,,
ويجي عند الألعاب الأكترونيه ويقول للعامل لعب هذولا العيال بقيمة 50 ريال مجانا:2thmup:
ويقوم العمال يدور مع عيالنا وش تبغون هذي وإلا هذي الين خلصت الـ 50 ريال:)

وبعدين صار الشاب السعودي صار متواجد في صالة الألعاب الله يراقب الوضع الله يجزاه خير ولايحرمه أجر الفزعه يارب ويكثر من أمثاله

يمكن البعض منكم يقول مايسوى الموقف بس والله العظيم ذيك الحظه حسيت بالقهر والأهانه وعيني عينك قدامنا يركبهم ببلاش واحنا لا يعدهم واحد واحد ((ويشخط التكت))

الي أردته من الموضوع لاتسمحوا لهؤلاء بالتعدي علينا وأحتقارنا وأذلالنا طالب بحقك مهما صغر وبتلقى أمثال هذا الشاب يفزع لك

دعائي لهذا الشاب بأن يفتح الله عليه أبواب نعمه ويرزقه من حيث لايحتسب ويكثر من أمثاله.

والله العظيم يوم قال لي اشري على العامل حسيت بالعزه

وسلامتكم:smheart: