رجعت لكم من جديد ... وجايبة معايا فستان بنتي تبع العيد .... رغم اني من زمان اشتغل في الكروشيه لكن ما قد سويت لبنتي فستان متكامل كروشيه .... دايم اعمل بلايز .... او تنانير ... والسنة اللي فاتت عملت لها عالعيد فستان صدره كروشيه وتنورته جينز .... هالمرة قلت لازم اعمل لها فستان كامل واشد حيلي ....
الموديل اللي اخترته شفته من زماااااان ... وضرب في راسي .... وحان وقت التنفيذ ..... غيرت في الصدر ومزجت بين موديلين ... وعملت للفستان بطانة رغم اني كنت جداً متخوفة من حكاية البطانة لاني مش مرررة في الخياطة .... وما كان فيه وقت اوديه للخياط ..... وكمان عملت جابون للفستان عشان يشده شوية ويرفعه .... والحمدلله نجحت المهمة .....
وطبعاص لابد من تكملة الفستان بالاكسسوارات .... عملت ربطة شعر وكلفة شراب ... واشتريت لولو اصفر كبير ولولو ابيض صغير ... وجبت الخيوط المطاط وعملت سلسال واسوارة .... واشتريت حلق لولو اصفر ....
خلونا نشوف التفاصيل .....
هنا الطقم مع الاكسسوارات الكروشيه ....
وهنا من الخلف .....
وهنا البطانة ....
وهنا الفستان والجابون ...
نظرة مقربة للصدر والوردة ....
ربطة الشعر ....
كلفة الشراب .... عملتها طبقتين ... كروشيه واللي تحتها دانتيل .....
وهنا الطقم ملبوس مع السلسال والاسوارة ....
اتمنى الطقم يعجبكم .... وانتظروني في اعمال قادمة ان شاء الله ....
في امان الله ....
اول شي الصدر .... اشتغلت بشكل عرضي .... يعني عملت سلاسل تساوي طول الصدر اللي ابغى اسويه ... يعني من فوق لتحت ... بعدين اشتغلت عليه اعمدة لين وصلت لعرض الصدر المطلوب .... قطعت الخيط وحددت وين ابغى احط الحمالات .... وشبكت الخيط في المكان اللي حددته واشتغلت بشكل طولي اعمدة لين وصلت للطول المطلوب للحمالات ... ورحت شبكتها في الخلف ..... نفس الطريقة هذي ....
بعدين اشتغلت قطعة مثلثة لعمل الاكمام .... وزميتها من فوق وركبتها على الاكمام ... واشتغلت الحواف بعدين ركبت عليها خيط مطاط ناعم عشان يزم ويعطي الكشكشة الواضحة بالصور ....
باترون الحواف نفس اللي محددته بالاحمر ....
بعدها اشتغلت التنورة وهذا باترونها .... وطبعاً الغرزة هذي او الباترون هذا الكل مخبول عليه وانا وحدة منهم ..... والصراحة الشغل فيه جداً جداً جداً ممتع ومسلي .....
الشغل اخذ مني حوالي اسبوعين .... واخذ مني حوالي 7 بكرات 50 جرام خيوط ناتشور النحيف ...
كلفة الشراب اخذت طريقتها من نفس باترون التنورة .... آخر 3 اسطر .....
بعدين عقدت احوس شوية في قص وخياطة البطانة .... خخخخخ ... وتركيب الكلفة الدانتيل اسفل الفستان ... وكمان حول فتحة الرقبة ....
ربطة الراس نفس باترون حواف الاكمام لكن كله مو بس اللي داخل الدائرة الحمراء .....
ايوه صح نسيت الوردة ..... هذا باترونها ...
ان شاء الله كده اكون وضحت كل شي عملته في هذا الطقم ....
واي سؤال انا حاضرة .....
دمتم في رعاية الله وحفظه .....