فسرولي تصرفات هذا الزوج!!!!

بسم الله الرحمن الرحيم..

السلام عليكم ورحمة الله وبركاته.... أخواتي الغاليات عندي موضوع يهمني وحبيت أطرحه عليكن

يمكن ألقى الحل عندكن...

أمس وأنا بالدوام كلمتني صديقتي عن مشكله لها مع زوجها والله أني أستغربت وعجزت أعلق وأستأذنتها

أني أكتب قصتها في منتداي الحبيب لأني واثقه من آرائكن وحلولكن فوافقت..

القصه من البدايه.... تقول أن زوجها ولله الحمد ملتزم بالصلوات بالمسجد ولا يترك الوتر قبل النوم وأخلاقه

عاليه وتعامله معها ممتاز وحياتهم مستقره فيها الحب والتفاهم وحرص كل طرف على إرضا الآخر...

ومن فتره تقريبا سنه ونصف جاء من الدوام كان معه سي دي وقالها الليله نسهر عليه!!!

لما جا الليل وفتحت السي دي لقته عباره عن قصص مخله بالحياء ( قصص جنسيه ) يصف كاتبها مايحصل

بينه وبين فتاته بكل دقه وبألفاظ صريحه... حاولت معه أنه يكسر السي دي ولا يقراه فرفض .. وكل كم يوم

يجيب معه شريط ثاني من أحد أصحابه في الدوام...وبعد فتره أقتنع أنه يكسر الأشرطه ولا يجيب غيرهم ..

حملت وجابت بنت .. وبعد ماجابت البنت تغير معها من ناحية الفراش يعني مره كل أسبوعين تقريبا ... وإذا جا

هالموضوع وبينت أستغرابها تعذر بالعيال وأنهم ماينامون بدري ويحلف أنه يرغب به بس مشكلته العيال...

هالحين عندها ولد 6 سنين وبنت9 شهور وضعهم ماتغير كل هالفتره وحتى أنها شكت بنفسه قالت يمكن تغيرت بعد

الولاده وخربت لكن هو بنفسه يمدحها ويقول ماشاء الله أنك ماتغيرتي... أما تعامله معها الحمد لله على حاله يبين حبه

لها وحرصه على رضاها.... وقبل تقريبا شهر تفاجأت أن زميله في الدوام أرسله على الأيميل مجموعة قصص وكان

يسهر كل الليل وهو يقراهن وهي تقوم تنام وهوجالس... حاولت معه وذكرته بالله وعقابه وأن اللي يسويه حرام ...

بعد محاولات مسحهن.. وكان يحاول يطلع من البحث بقوقل مواقع محجوبه لكنه مايعرف يفك الحجب عنهن ومره لقته

يبحث عن مواقع زواج عن طريق الرسايل وسألته وقال عادي بس أبي أشوف ولا أنا معقول أتزوج عليك !! ولو بغيت أتزوج مو هذي الطريقه الصح للزواج!!!

وقبل كم يوم كان يكلم واحد من زملاه بالدوام وتقول أستغربت من طريقة كلامه يهمس ماأسمع منه إلا إذا

قال الله يقطع بليسك يافلان .. الله يرجك يافلان ومعه الضحك.. وأنتهت المكالمه مافهمت منه ولا كلمه...

وبعده بكم يوم كلم نفس الشخص وكانت جالسه عنده وضح عليه أن فيه كلام مايقدر يصرح به قدامها وكان

معلي صوت التلفزيون وكان كلامه مبهم كلمات ماتفهم منها شي مثل ( أيه - لا - يمكن - ماأدري......)

وكانت تعبيرات وجهه تبين أنه مرتبك ...هو أنتبه أنها ملاحظته تعذر وقال أكلمك بعدين وصك السماعه..

قالت له وش هالمكالمه الغريبه وش كنت تتكلم عنه كل كلامك رموز مايفهم منك شي ... هو بين نفسه زعلان وقال

بصوت عالي مكالمه عاديه المره الثانيه ماأكلم عندك يالله أفتك منك... زعلت وقالت ترا أصدقائك هذولا

يبون يخربون حياتنا.. ضحك عليها وسكت ... وإلى اليوم وهي زعلانه عليه وماتكلمه ...

هذي قصتها مع زوجها وتصرفاته الغريبه... ياليت تقولون رايكم بشخصية هالزوج وكيف تحل مشكلتها معه..

وش ممكن تكون مكالماته مع صديقه ؟؟ وليش صار يتعذر بالعيال ونومهم علشان ماينام معها ؟؟

أرجوا منكم المساعده وجزاكم الله خير .. وآآآآآآآآسفه على الأطاله..