فشلني قدام حريم اخواني

السلام
والله ولدي الوحيد عمره ٧ سنوات هو عاقل والله بس اخته تلعوذه ويتهاوش معها
المهم كانو حريم اخواني واخواتي عندي وكانو يتهاوشون بالحوش ولد زوجي عنده سيكل فخم مربطه بجنزير وهو زيارة عند امه وولدي يبغى يفكه وياخذ السيكل واخته رافضة وكل ماقرب تطرده ودخل زوجي على البيت قاله يمين بالله اسمع صوت منك غير تنطق اليوم الولد عقل لانه يخاف من ابوه
زوجي كان بغرفته تروش وغير ملابسه وكان طالع مع اخوه مشوار ورجعو تهاوشو مرة ثانية طلع معصب وقعد يشوفهم قلت لهم ياقرود خلاص مدري كيف طلعت مني استغفر الله استغفر الله
ولا زوجي يقولي بتهكم اذا عيالك قرود انتي شمبانزي ولا غوريلا شوفي لي يناسبك قالها بصوت عالي والطامة انه الصوت وصل عند الحريم وسمعوه وانا توضيت باللبن كيف يقولي كذا
زوجة اخوي مفلوتة صارت تضحك كل شوي تضحك حتى وهي تشرب العصير تضحك والعصير طلع من خشمها سلامات الله يهديه بس الحقير هو لي احرجني وطلع للحين مارجع ولا ودي امسح فيه الارض دقيت عليه كثير ما رد رد مرة وحدة قالي اقول ماني فاضي لك عندي شغل مع ناس وقفل بوجهي
والله منظري مدري كيف صار قدامهم وهم يضحكون علي بسبته مدري كيف سمعو صوته يمكن لانه كان بالحوش جنب الخيمة وهم سمعوه بوضوح وهو ما انتبه
صدق الموقف محرج ولا كيف والله ما اكذب بشي بس انحرجت ما اكتب السالفة نكتة او طقطقة والله زعلانة منه على هالفشيلة هذي