فصفضة لاول مرة

انا متزوجة عمري ٣٦ وزوجي ٤١ عندي اطفال الحمدلله
جميلة ومثقفة وسنعه ونظيفة ومرتبة قايمة بواجباتي وزيادة بعد ومدلله زوجي من كل النواحي وماقصرت معه بشيء طبعي ماحب التقصير بشيء
وصاحبة خلق الحمدلله والجميع يحبن ويحترمن القريب والبعيد واهل زوجي لاني محترمة وماحب ابدا الانتقاد والتجريح بالعكس دايم امدح وادعم واشجع الجميع احب الخير لكل الناس وماعرف القيل والقال يعني اخلاقي ماشاء الله الكل يثني علي.
مشكلتي ضايق صدري من حالي
معاناتي حاليا ماعندي اي دخل مالي ولا اي انجاز ولا حققت اي شيء من طموحي
انا من صغري ذكيه وطموحة
وكان ببالي اني بصير مميزة ولي مستقبل بس من تزوجت للاسف زوجي حطم بي وخرب كل امالي
كنت اطمح اكمل دراستي واتوظف او اسوي بزنس
بس ماقصر منعن من كل شيء
وياليت انه غني ومدللن كان رضيت
هو موظف حكومي راتبة اقل من ٩٠٠٠ ولا عنده طموح ولا ثقافة وغيره على غير سنع
مايبي اشتغل واكلم رجال لو شيء ضروري وهو مايبي يدعمن ويكلم هو
وانا طموحي بزنس يرضي نفسي محل اَو متجر على مستوى ماحب شغل الطبخ ومشاريع اللي اسويها انا بالبيت مااتقبله ابدا عجزت مو قصدي عيب او تقليل من قدره لكن ماتناسب تفكيري وطموحي ابدا
غير كذا مااقدر ماتحمل مسؤولية البيت والاطفال وانا دايم تعبانة ومرهقة من المسؤليات اللي علي.
والشيء الثاني
طبع زوجي كانه شايب مايعرف مطاعم ولا سفر ولا تمشي ولا هدايا ولا اي ترفيه لي ولعيالي
انا من كنت عروس للان
ماحسيت بشبابي معه كاني عجوز مسكر علي واحرمن من كل شيء يسعدن ويجبر خاطري
تزوجت وانا طالبة بالجامعه ونكد علي واصر علي احمل اول الزواج وحملت بعد ٣ شهور من الزواج وانا ادرس ونكد علي دراستي ويخلين اغيب لمين يصير عندي حرمان باغلب المواد ولمين انحاست دراستي وحولت انتساب على اساس اكمل ويعادلون لي المواد بس للاسف قالوا تبدين من جديد وانقهرت ولا كملت لان قسمي صعب
وياليت لو درست انتساب قسم سهل كان كملت ماستر بس كان وقته تفكيري ادرس شيء اهواه والا بلاش
واللحين اعاني ونفسيتي تعبانه
لاني مادرست ولا حققت شيء من طموحي ولا عشت حياة مدلله مع زوجي
اعرف اني بنعم عظيمة واحسن من حال غيري لكن غصب علي مهما حاولت اتعايش مع وضعي وارضى واسكت الا اني تجين اوقات تنهار نفسيتي واتعب
لان تمر علي اوقات اتمنى لو كان عندي فلوس والا زوجي عنده ومايخلين احتاج ولا يخلي بخاطري شيء مثل مراجعة الحمل والولادة اتمنى بمستشفى خاص والا اتمنى شغاله ياما مرضت وتعبت وسويت عمليات ولا عندي خدامه ياما تمنيت اشتري لي شيء وياما تمنيت اهدي احد وياما تمنيت اوجب احد وياما تمنيت اعالج اسناني وغيره ويا ما تمنيت و تمنيت ولا عندي فلوس
وزوجي اذا طلبته يقول تستاهلين بس ماعندي والا مو لازم احيانا اعذره ماعنده ومو من واجباته بس احيانا عنده ويقول مب لازم وتحز بخاطري
زوجي فيه مميزات الحمدلله وادري انه احسن من غيره
اول شيء انه يحبن مره ومايستغني عن وحنون ويشوف جمالي وكثير من ايجابياتي
بس فيه تصرفات تخلين اتعب معه
الانتقاد والتحطيم على حوسة الاطفال والا طريقة التنظيف والترتيب والا ليش مخليه المواعين ماسويتيهن احيانا اتعب والا يصير عندي شغل والا كسلانه واخليهن عندي غسالة مواعين ويعتقد انه مادام عندي مالي عذر بس ولو يبي لهن وقفه ووقت وانا مااخليهن الا لظرف بس مايقدر ومايسال ليش ماسويتهن على طول ينتقد وهو مايعرف السبب مع انه قليل اسوي كذا ممكن مره بالشهر وغير كذا هو مايمدح ولا يشكر على كل اللي اسويه ويشوفه واجب وانه هذا بيتك وذولا عيالك طيب ليش تنتقد اجل وحتى لو فرضنا واجب استاهل المدح والتشجيع
انا اشجعه على اي شيء وامدحة واشكره مااسوي نفس اسلوبه لاني ما ارضى على نفسي
بس هو لا واسلوبه وكلامه جارح صحيح انه دايم يعتذر اذا ضاق صدري وعاتبته والا زعلت ويقول انا ماعرف اعبر وهذا طبعي انتقادي ومو قصدي انتقدك واجرحك بس انا انقهر وانجرح صحيح مو دايم ومو كل شيء ينتقده بس انا من النوع اللي اجتهد واخلص باي شيء اسوية من تنظيف وترتيب وطبخ وتربية وتدريس وماعندي شغاله
وانا اللي متحمله بلحالي شغل البيت والتربية والتدريس
هو النفقه ويودينا ويجيبنا
بالاساسيات مايقصر يجيب طلباتي بس مطاعم سفر طلعات تمشي العاب لعيالي وملاهي وشاليهات كل ذولي مايعترف بهن ويراهن كماليات صح انهن كماليات بس نحتاجهن خاصة ان اللي حولنا ومجتمعنا عندهم هالاشياء وحنا محرومين منه
انا مااقارن حياتي بغيري بس انا احتاج هالاشياء ومو قصدي اكلف عليه شيء فوق طاقته لا بالعكس انا ماحب ابدا اكلفه بشي ودايما اوفره ولا احب اظغط عليه اراعي خاطره مره واحسب للطلب الف حساب لبغيت اطلب
ابيه يدللنا على حسب استطاعته
فيه اشياء تناسب ميزانيتنا بس هو مايهتم
اتمنى يروح بي مطعم يسافر بي
يجيب لي هدية
ماجاب لي لا يوم حملت ولا بعد الولادة ولا بعد النفاس ولا وردة
ومايشتري لي ذهب مع انه ماعندي
لان ذهب زواجي بعته على اساس اسوي مشروع وماتيسر وماقصر اخذ فلوسي قال محتاجهن واذا تيسر لك مشروع او احتجتيهن اعطيك اياهن وللاسف راحن علي ولا عطان اياهن وكل ماقلت له يعصب ويقول لاتقولين لي انا ماعندي اللي عندي اصرفه عليكم وبعده خلاص اسكت مالي خلق المشاكل. هذا الكلام له ٨ سنوات
وحاليا ماعندي فلوس ولا دخل مالي.
ودي اتوظف بس وشلون وانا ماعندي شهادة.
وودي اكمل دراستي بس الجامعات مايقبلون وانا لي اكثر من ١٠ سنوات عن الثانوي
علما اني الحمدلله محافظة على ديني ودائمة الدعاء والصدقة
الله يتقبل، قلت علشان يمكن يرد البعض وينصحن بكذا.