فصيلة الدم هل تؤثر في اختيار نوع حليب الطفل ؟؟؟!!!

السلام عليكم ورحمة الله وبركاته
كيفكم ياحلوات ،،، هذا اول موضوع ليا في هذا المنتدى الأكثر من رائع وحابه انو الكل يفيد و يستفيد
أنا من شهر صرت ام لبنوته ربي يحفظها ويحميها ليا وبنتي يادوبك رضعت من صدري كم يوم في البدايه وبعدها صارت ترفض انها ترضع من صدري طبعاً انا اتأزمت نفسيتي وحاولت بكل الطرق اني ارضعها طبيعي لدرجة صرت اشفط لها بالجهاز عشان ارضعها ولا في فايده حتى صدري ماصار يدر حليب ومن هنا بدأت معايا مشكلة اختيار الحليب الصناعي المناسب لبنتي وطبعاً الكل عارف انو مو كل حليب يناسب كل الأطفال في انواع تناسب اطفال واطفال تبهذلهم وتجيب لهم اما مغص وغازات او امساك او اسهال الله يكرمكم وعاد مشاكل الحليب الصناعي كثيره عشان كذا قعدت افكر وجات في بالي حاجه وبإذن الله إنها تفيدني وتفيدكم لأني حكون من المجربات زيي زيكم،،،
طبعاً اللي جاء في بالي انو ممكن يكون السبب في إن بعض انواع الحليب تناسب اطفال واطفال ماتناسبهم هوا اختلاف فصايل الدم لأنو زي ما لكل فصيله من فصايل الدم انواع اكل تناسبها وانواع ماتناسبها فممكن يكون نوعية الحليب تأثر بالإيجاب او السلب على الأطفال بسبب اختلاف فصايل دمهم عشان كذا انا حابه انكم تشاركوني وتعاونوني عشان اقدر اتأكد من صحة الفكره اللي جاتني ولو طلعت صحيحه وضبطت معناها حنكون ساعدنا كثير امهات انو مايحتارو في اختيار الحليب المناسب لأطفالهم بحسب فصيلة دمهم ونساعد الأطفال انو مايصيرو حقل تجارب لأمهاتهم >> هههههه
واللي ابغاه منكم انو كل ام جربت حليب وفاد مع طفلها وماسبب له اي مشاكل تكتب اسم الحليب وفصيلة دم الطفل وانا راح اشوف لبنتي حليب من تجارب اطفالكم اللي بنفس فصيلتها وحجرب معاها ولو ناسبها كمان راح اكتب لكم نتيجة تجربتي فنفس الموضوع
واتمنى من الكل المصداقيه والتأكد من اسم الحليب وفصيلة الدم وهل فعلاً ناسب الطفل او لا قبل ما تكتبوا اي شي لأنو لو كتبتوا اي حاجه ومنتو متأكدين منها ممكن اي ام تجرب لطفلها الحليب و بدل ماتفيدو الأطفال تضروهم والله يجزاكم بالخير مقدماً وسامحوني لو طولت عليكم