فضفضة ..... ربي لاتذرني فردآ وانت خير الوارثين

السلام عليكم ورحمةالله وبركاته

احس اني مختنقة وضايقة فيني الوسيعة
فرشت سجادتي صليت ركعتين لربي قريت سورة البقرة
رفعت ايديني ودعيت وبجيت ودعيت
فكرت افضفض بس لمنو؟؟؟


اسمي غرام جابر عمري 22 سنة
انا البنت الثانية من 6 خوات
كنت المميزة عند امي وابوي
لاني انولدت بالشهر السادس مع مشاكل كبيرة بالقلب والرئة والتنفس
عذبتهم معاي بطفولتي بس الحمدلله الطفلة اللي اغلب الاطباء توقعوا موتها
تجاوزت مرحلة الخطر بفضل ربي ودعوات امها الصادقة ان ربي يشافي لذة كبدها
كبرت ودخلت المدرسة

ونجحت سنة ورا سنة وانا الأولى على المرحلة
وابوي الي ربي مارزقه بولد ( بهذاك الوقت ) يقول هذي بنتي اللي بترفع راسي
هذي دكتورة العايلة
علمني ابوي القوة والحكمة علمني الطلاقة بالتحدث واحترام الآخرين
علمني التغاضي عن توافه الامور والترفع عنها
علمني المحبة والاحترام والصفح وعلمني عزة النفس والكرامة
علمني اني ماسمح لاحد يتجاهلني او يقلل من قدري
ماذكر اني كنت ابكي على اي شي مثل الاطفال
دمعتي غالية دمعتي درة ماتطيح الا على شي غالي
كنت بنظر البعض مغرورة متكبرة
لكني كنت بنت ابوي

وتخرجت من الثانوية بامتياز
وقدمت على البعثة ونزل اسمي
وكانت المفاجأة ماعندنا بنات يدرسون برا.................
كانت اول الانكسارات في حياتي ، ضغوطات العايلة على والدي
ورفض والدي للانصياع لهم
يومها رحت له وقلتله: كله ولا كلام الناس عليك يالغالي
انا مابي ادرس برا ولا اهد ديرتي واهلي .. قلتها وانا اتصنع القوة
ونزلت دمعة حارة على خدي
بعدها سجلت بكلية بالكويت
تقدملي اكثر من واحد من اهلي بس كنت ارفض
لاني ابي اكمل دراستي
ومابي شي يشغلني
رفضت ناس على قول امي ماتنرفض
ووصل الكلام لمسامعي: هذي ماتحشم احد
هذي مايعجبها احد المغرورة يبيلها من يكسر راسها
وسمعت بعدها: راح تظل بنفسي طول عمري الله لايوفقها
وولدي يبيها ، واخوي ميت عليها من كلامنا عليها

مااقول هذا الكلام ويعني اني ملكة جمال ولكني بنت متوسطة الجمال
ومملوحة ولكن اكثر مايجذب فيني شخصيتي المختلفة عن بنات جيلي

وتقدملي زوجي وغرامي كنت بالسنة الثانية
وهو غريب عن العايلة وبعد الاستخارة وافقت

ثارت ثائرة الجميع على والدي : يعطيها الغريب ويرفض القريب
ولكن اهم شي رايي
وتم الزواج قبل سنتين كنت كالملكة الاسطورية بفستاني الفخم ومكياجي البسيط
وتسريجتي الغريبة
عشت اجمل ايام عمري معاه ، عرفت معنى الحب لاول مرة على يديه
الحب الللي كنت اضحك على رفيجاتي لما يتكلمون عنه
ماتوقعت اني بحبه هالكثر واني بغرق بحبه

ومرت الايام والاشهر وبدأ الحنين للأمومة يدب في اوصالي
وسؤاله المتكرر: ها ماكو شي هالشهر؟
راجعت اكثر من طبيب ورحت لاكثر من حرمة
نفس الكلام تكيس وضعف بالتبويض
سويت عملية منظار وكلي امل احمل بعدها
اخذت كلوميد ، اخذت ابر ، الاستجابة ممتازة ومايحدث حمل سبحان الله

من يومها وانا اشوف
نظرات الحقد والسخرية والشماته من البعض
ونظرات الشفقة والحزن من البعض الآخر
وهمزات ولمزات وكلام مافيها عيال
زين مابلشت ولدي فيها
اللهم لاشماته تستاهل هالمغرورة
ها غرام جنا طولتوا؟
ترى سامعة ان خالتج ( ام ريلي) تدور لولدها مرة تجيب له الولد


وانتقلت العدوى للبيت
خالتي صايرة كبريت معاي تنتظر مني الزلة عشان تناشبني
وحمواتي بس يتسألون ليش؟ وشنو فيج ؟ واشمعنى فلانة ؟

لوما زوجي يحبني وصابر ومتحمل ومتمسك فيني ويدافع عني جان ماصبرت ولاتحملت
من يشوفوني ياربي نبي نشوف ذرية جابر
مدري لمتى نصبر....؟


آآآآآآآآآآآآآآآآآآآآآآآآآآآآآآآآآآآآآآآآه
انا اللي مدري لمتى اصبر الله يعين يارب
جن هالشي بيدي وانا امقصرة
احس اني مكسورة والانكسار مبين بعيوني
حتى ابوي يقول : موهذي بنت ابوها
آه يايبه ....بنت ابوها ،،،،انثى حالها حال غيرها تحلم بالامومة وتحن لطفل يقول لها ماما
تحلم باليوم اللي تشيله فيه وتلبسه وترضعه وتلعبه
وموكافي مشاعرها الفياضة وحنينها الجارف
الناس مو مخليتها بحالها

اول كنت ابين ان الموضوع مو هامني بس ماقدرت اكمل
غرام اللي دمعتها ماتنزل صارت دموعي تغرق مخدتي كل ليلة قبل لا انام
صارت دموعي شلال يتدفق على سجادتي وانا اناجي ربي
مااخفيكم شي دمعتي صارت تنزل قدام اي شخص يسوى ولا مايسوى......



اعتذر على الاطالة
واسفة اذا ضايقتكم
مجرد فضفضة لا اكثر