فضفضتي لكم لاتبخلون بالدعا

السلام عليكم يااخوات يعلم الله اني احبكم في الله ودايماً متابعه لكم ولكن اليوم قررت اسجل بحساب ثاني عشان اقدراعرض عليكم مشكلتي وهي من سنه حاولت قد مااقدراتحملها لكن الله يقويني واتحمل بعد
سالفتي يابنات اني عمري 25 و انخطبت مثل اي بنت وبما ان الوالد متوفي ماعندي الا اخواني وقلت الشور شوركم وقالوا سئلنا عنه ورجال خلوق ودين وطيب ووافقنا عليه نبي رايك قلت موافقه وردوا لاهله اني وافقت وكانوا يبغون يملكون بس صارت اشغال من الطرفين وقالوا نئجل الملكه الئ موعد الزواج ومر شهرين وبعده صرت اسمع اخبار مو كويسه عن الرجال وانه صاحب سفريات وبنات وكنت ادعي ربي واستخير بيني وبين نفسي وقلت لامي ماابغاه قالت كيف تردين كلمت اخوانك قلت من الكلام اللي اسمعه عنه كرهته قالت لا صعب يرجعون بكلامهم وعيب عند الرجال ومن هالكلام والرجال يتغير بعد الزواج ويعقل عن خرابيطه
المهم برمضان وصلني خبر ان الرجال مسافر المغرب ويحلفون انه من شهور مايصلي انا هنا مت حسره كيف اخواني ماسئلوا عنه زين وكيف برتبط في واحد كذا لكن للاسف العرف صعب يتراجعون وكنت ادعي بسجودي وبكل وقت واستخير عنه واطلب ربي يبطل هالزواج والحمدلله قبل ينتهي رمضان اتصلوا اهله وقالوا ان ولدهم عليه ديون ولايقدر يتزوج هالفتره وصعب يعلقني كم سنه انا هنا انبسطت لان ثقتي بربي وانه استجاب دعائي لكن مادريت ان الموضوع راح يكون غم علي من بعدها واهلي انواع التجريح كل ماقلت شي قالوا اسكتي لوفيك خير كان نصيبك مشي مثل بنات الناس واللي يقول اكيد انك مسويه شي بالدنيا عشان كذا ربي ماتمم زواجك وامي دايماً تقولي الله العالم بنيتك ولاماكان تكنسل زواجك واذا سمعت ان وحده تزوجت ع طول تقولي ماشا الله مو مثل نصيبك ومرات تقول اللي اصغر منك تزوجوا مو مثلك وخواتي المتزوجات من خمس شهور دايماً يحسسوني اني انا الغلط في اني ماتزوجت وخاصه في الواتس لما نسولف مثل اي خوات واشاركهم يقولون اكيد نيتك فيها شي عشان كذا ماتم زواجك مع العلم وربي كلهم يعرفون سوالف الرجال ولما قلت لهم انسان مايصلي كيف اتزوجه كانو ساكتين وتوقعتهم مؤيديني مادريت انهم بعد فتره راح يتشمتون فيني
ومع كل هاذا انا قايمه في امي وعارفه انه واجب علي مو متفضله في شي لاسمح الله لكن ودي مايكون اسلوبها كذا لاني طول الوقت معاها خواتي المتزوجات اتحملهم لانهم مو عندنا دايماً
احتاج اني اسولف مع امي مثل اي بنت وامها الحين مااقدر اقول لاحد اني متحمله الكلام الجارح من سنه والله اني اتحمل الكلام طول اليوم وادخل غرفتي واصيح ومرات اتمنئ اتزوج اي شخص بس عشان ارتاح من الكلام والعام كنت اطلب اخوي نحج وامي تقول ماعندي فلوس واقولهم ورثي من ابوي فيه تكفون ابي احج(لاني حريصه احج لي عشان اقدر بعدين احج لابوي الله يرحمه) وامي ترد علي تقول ماتحجين مع اخوانك اذا تزوجتي تحجين مع زوجك واذا ماتزوجتي مولازم تحجين وشوي ترفع السماعه ع اختي متزوجه تقول وش رايك تحجين اذا زوجك موقادر اخوك رايح روحي معاه واتركي العيال عند الشغاله (انا يسموني مرات الشغاله لان البيت قايم علي واخوي الله يهديه دايماً يقول قدام زوجته وبوجود خواتي واخواني ان امي ماتحتاج شغاله وهاذي فيه يقصدني ويجلسون يضحكون) والله يصلح الحال امي اذا جوها ضيوف واقدم لهم شي تقول اول مره تسويه ولاهي ماتشيل شي بس نايمه وانا انحرج ومره بنت جيراننا تقولي بصارحك بشي امك ماتحبك دايماً تتكلم فيك انك لاتنفعينها ولاشي والله انحرجت وقلت صادقه فيني خمول والبنت اعطتني نظره حسيت انها عرفت اني كذبت عليها بس ماتبغئ تحرجني..وش الحل يابنات تعبت قسم بالله تدرون اني قبل انام اتدهن بفقس من وجع ظهري ورجلي تتعب اذا وقفت كثير وتسهرني بالليل من الالم وطول اليوم اركض من جهه حريم اخواني ينزلون عيالهم وشقين مره ويتهاوشون مع بعض وياويلي اذا واحد من عيالهم الصغار طاح ع طول يجي ابوه يهاوشني ومن جهه البيت كبير ولازم انظف بسرعه غير اني اسمع الكلام الجارح مع العلم اني مومهتمه بموضوع الزواج لان ثقتي اذا الله كاتب لي شي باخذه لكن مدري ليش يجرحوني وكاني حمل عليهم ...هاذي معاناتي لكن طلبتكم لاتدعون ع احد اهلي احبهم وصعب اطلع من جميلهم علي لكن تغيروا علي من سنه واللي ماعندها حل ترفع الموضوع بدعوه لامي ان الله يطول في عمرها ع طاعته