فضفضه=مابيدي حيله عشان كذا افضفض

صباح الخير
ما احب اكتب مواضيع ولا احب اكتب خصوصيات تخصني او تخص غيري
بس مجبوره و معصبه وما حولي احد افضفض له


الزبده:
هذي بنت اختي عمرها 15 سنه في ثاني متوسط.ماعندها اشقاء وحيده
ابوها وامها اللي هي اختي منفصلين وعندها 3 اخوات من ابوها
امها متزوجه وسعيده جداً بزواجها والحمدلله زوج امها انسان اتعب اقول طيب وحنون
موفرلها كل وسائل الراحه طيب يعاملها وكانها بنته
لكن مشكلتها انها عايشه ومستقره عند ابوها وزوجة ابوها من خلال ما استنتجته من
مواقف تحكيها بنت اختي لامها..عرفت انها انسانه نذله نذله نذله
كل همها تطفش البنت من بيت ابوها !
كيف ؟
رنا اللي هي بنت اختي دائماً كل جلستها ف غرفتها تقضي غالب وقتها ف غرفتها
القرار الاخير:
نقل الغرفه الخاصه ب رنا من الطابق العلوي ل الطابق السفلي
السبب/ غرفة بناتها 2 صغرت عليهم وحابه تعطيهم الجناح الاكبر من باقي الغرف!
الغرفه التحتيه اللي بتاخذها رنا
عباره عن مستودع قديم داخل البيت+ مافيه داخله حمام عزكم الله يعني لازم تطلع وتقطع
مسافه عشان توصل ل دورة المياه! هذا غير انو فكرة انها تنام هي لحالها تحت والباقي فوق
بحد ذاتها مرعبه..حتى الخدامات ينامون فوق!
قرار اخر:
تقسيم المستودع اللي هو غرفة رنا لقسم اخر < لانه كبير جداً ويحطون داخله غرفة الالعاب
خاص لبناتها..ما كفاهم الجناح اللي فوق!
مواقف:
تكون رنا جالسه ف الصاله ومعها ريموت التليفزيون وجالسه بامان الله
تجي اختها وهي صغيره عمرها 8 سنوات ماينشره عليها وتقول ابي المحطه الفلانيه
وترفض بحجة انها تبي برنامج معين تجي زوجة ابوها تاخذ الريموت وتحط ع القناة اللي تبيها
بنتها! او تعطي بنتها الريموت اذا رنا فكرت بس انها تطالب بحقها ^ الموقف هذا دائماً يحصل!
-
تستاذن رنا من ابوها تبي تطلع مع السواق ل مشوار يخصها سوق او مكتبه او سوبر ماركت
تروح معها زوجة ابوها ومو هنا المشكله اساساً لازم تروح معها
المشكله انها تقضي مشاويرها اهي و تتجاهل مشوار رنا بكل برووووود اعصاب و اخر شي
تعطيها فتره زمنيه قصيره جداً ل مشوار هالضعيفه!
مثلاً رنا ف ذاك اليوم تبي المول تقوم زوجة ابوها تروح تمر اختها وتلطعها ساعه عند الباب !
-
مره ابو رنا قال لها المره الجايه بقلل مصروفك انا عندي ثلاث بنات وزادت مسؤلياتي بعطيك اقل من مصروفك ... عن الطريق الضحك يقولها
بعدها بكم يوم عطاها اقل من المعتاد!
ابوها لا هو ضغيف ماديا ولا هو فقير رجال عنده خير لو يجيب عشر عيالي ماراح يضره لانو هو اساساً بخير ودخله ممتااز
^ الموقف هذا ما نقدر نجزم ان كانت زوجة ابوها وراه لكن نقول اغلب الظن هي من تكيد لها
-
قتاة فتافيت قناة طبخ ..صح ولا انا غلطانه قناة طبخ ولا انا مضروب على راسي:frown:
تموت عليها ودايم تحط عليها وتحب تتفنن بالحلويات والكب كيك واشكالها ..انحذفت!
السبب
فيها مسخره ورقص و موسيقى وحريم واجد :ohmy:
-
عمليات التطفيش ما زالت مستمره بحركات ودسائس حريميه بحته لكن مع مين مع بنت
عمرها ما. يتجاوز 15 سنه؟!
وابوها عباره عن ( ) لا يسمع لا يتكلم
ترسل اختي له بنتك نفسيتها تعبانه ..بنتك تقول تبي تموت ..بنتك كل وقتها صياح
لا ردولا فيه ادنا احساس > لكن يقولون الاحساس نعمه جميله
هو خالي منها للاسف
شخصيته من زمان هدوووء على كميه لا باس بها من السلبيه..يعني مو شي جديد
احنا عاجزين عن الحل ما في حل الا ان الله يكفيها شر زوجة ابوها المشكله شرها
من النوع الهادي اللي مو مبين يعني يقهر وبنفس الوقت يكون الواحد عاجز عن مواجهته


انا اللي خلاني اكتب واطلع اللي بداخلي اليوم تشتكي لامها تقول ودي اموت وتبكي من قلب
طبعاً هي تشتكي لامها وتطلع اللي بداخلها اذا كانو لحالهم واحياناً ما تقدر ينفرط الكلام منها
وتبكي بس ابداً ابداً مو من النوع الشكاي تشتكي لامها وبس وياالله بعد

لكن حسبي الله ونعم الوكيل في كل من ما يخاف ربه ويستقوي ع الاضعف منه

لكل زوجة اب طالما عيال زوجك امهم منفصله عن ابوهم او امهم متوفيه خافي الله ف عيال زوجك اذا كانو معك بالبيت لا تعاملينهم مثل عيالك ع الاقل عامليهم بما يرضي الله ولا تكيدين لهم

دائماً دعوة بنت اختي عليها ( الله يضيق عليها حياتها..الله يضيق عليها حياتها )
قايمه قاعده < هذي دعوتها .