فضفضه

السلام عليكم خواتي

بدخل بالموضوع على طول و مشكلتي بالمختصر اني وحيده

و بالنشره المفصله

صارلي تقريبا من فتره في مونتريال ...و مشكلتي لاني ما كونت صداقات للحينه ....يعني تعرفت على بعض زوجات اصدقاء زوجي شفتهم يمكن مرتين ...و حتى في المرتين كان كلامي معاهم قليييل ..حاولت اني اتكلم لكن ما عرفت ...و المشكله انهم كلهم ساكنين بعيد عني...علشان جذي ما تحمست اتعرف عليهم وايد لاني ما اقدر التقي وياهم و خاصه وقت الصبح.. وقت الصبح بالنسب لي وقت الملل ...و من الملل لاني اجلس بروحي طول اليوم صرت ما احب اتكلم مع احد حتى اقربائي الي اتواصل معاهم عن طريق المسنجر مليت منهم صرت ما ابي اكلم احد منهم ...ما عندي شي اقوله مافي احداث تصير لي ..حتى اني حظرت كل الناس الى على المسنجر ..بس اخلي المسنجر مفتوح طول اليوم مع اني حاظر الكل . ... فقدت حماسي في التعرف على الناس الى هني ...قبل لا اجي كنت مخطط كيف بحاول اني اعرف بالناس لكن الحينه مالي نفس اتعرف على احد و ما ابي ...

صارت حياتي كلها تلفزيون ماعندي شي اسويه ...حتى شغل البيت مليت منه ......مليت من ترتيب السرير و من تنظيف البيت و المطبخ ..و اكبر همي صار وقت الطبخ ...بصراحه كرهت اكتئب طول اليوم بس بسبب اني ما ابي اطبخ ...الشي الوحيد الي كنت استمتع فيه و انتظر يجي وقت الطبخ علشان اتسلى صرت اكره ...ما احب التفت للمطبخ ...صرت ما ابي اقوم من جدام التلفزيون ..صرت طول الاسبوع انتظر الويك اند بس علشان اروح اشتري اغراض و لوازم الناقصه للبيت و ارجع ...و بصراحه بديت من اسبوعين اضيج بعد من هذي الطلعه ...
حتى اني قبل كنت اول ما اسمع صوت زوجي يفتح الباب اول ما يرجع من الشغل اطير من الفرحه و الابتسامه شافه وجهي ...لكن الحينه صار يفتح الباب و يدخل و يوقف جدامي و انا ما اتحرك حركه وحده يدوبك اشيل نظري من على التلفزيون و اشوفه من غير هلا و لا ابتساما و وجه متملل و اقون احط العشى و الكلمه الى انطقها هي روح غير قبل لا يبرد الاكل ...و اقعد على الطاوله انتظره لين يجي و اكل ...و كلها ساعه و اروح انام ...من الملل والله صرت ابي اليوم يخلص بسرعه ...كنت قبل اقوم اسوي الريوق و التريق مع زوحي ...الحينه صرت ما اتحرك من الفراش و اسوي عمري نايمه و تعبانه بس علشان ما اسوي الفطور مليت من الفطور الى كنت اتفنن فيه كل يوم فطور شكل الحينه حتى الفطور ماشي

صار زوجي قلق على وايد و يصر دايما اني اتصل في بعض الناس الى شفتهم بس انا ما احب التلفون و مالي نفس اتكلم مع احد منهم لاني ما اعرفهم حتى اسمائهم ما اذكرها و انا الى عمري ما نسيت اسم اي شخص اقابله في حياتي ...اعرف ان في عمارتي في خليجيات مره زوجي التقى بخليجي و هو داخل العماره و قال انه في تقريبا يمكن 4 عوائل اذا مب اكثر لكن عمري ما شفت احد منهم و ما اعرف كيف اوصل لهم ...في البدايه كنت افكر كيف اتعرف عليهم و اني ابي اوصل لهم و كنت كل ما اطلع اتمنى و ادعي ان اصادف وحده من الموجودات بالاصنصير ...لكن الحينه صرفت نظر عن الموضوع و كل ما يقول لي زوجي شي او انه يفكر لي بافكار علشان اتعرف على الناس ...اقول له ما ابي افكارك ...انا اشتكيت لك انا راضيه و مقتنعه ما ابي اتعرف على اي انسان

ادري اني طولت عليكم بس شو اسوي ما عندي احد افضفض له و ما ابي اقول لشخص يعرفني علشان ما يقعدون يحاتوني و يقلقون علي ...هل الكل في بدايه غربته كان مثلي و لا انا الوحيده الى كرهت الناس و قررت اني انعزل بنفسي ..

:44: