فضفضه ابي منكم طبطبه وجبر خاطر 😪 ابقولكم وش صاير معاي

السلام عليكم.
توي مسجله في المنتدى واول موضوع اطرحه. الصراحه سجلت في المنتدى لاني مكبوته نفسي افضفض واطلع اللي في خاطري. وودي الاقي ناس تفهمني وتساعدني وتطبطب علي. انا عارفه ان محد فينا يخلى من الهم والكدر. هذه هي الحياه.
سالفتي اني بنت عمري ٣٣ سنه جامعيه. مو متزوجه والحمد الله راضيه بالقضاء والقدر
احس اموري متعسره عمري راح وانا انتظر الوظيفه والزواج. حياتي كلها من حفره لدحديره. بحثت عن وظايف مو لاقيه مدري وش اسوي. حياتي فاضيه مافيها شي. نفسي انشغل والزواج كمان مو راضي يتيسر انخطبت مرتين واهلي رفضوا ولهم اسبابهم.
ابدخل بالزبده وهذه السالفه اللي متعبتني نفسيا حاليا. احس اني ابي اصيح. ابي افضفض مكبوته يابنات
المهم ان الفتره الاخيره كلمتني وحده من صحباتي ان في ناس يدورون عروس لولدهم ودلتهم علي ووافقوا. ولدهم اعزب ماسبق له الزواج. وهذا الشي اللي فرحني مره. لاني كبيره مو صغيره وزين ان فيه اعزب بيتقدملي قالتلي ام الرجال كلمتها وقالت ماعندهم اي شروط غير انها تكون بيضا او بشرتها فاتحه. بس. وقالتلها عن شكلي ووصفتني وقلت خبريها ان ملامحي عاديه مو جميله. وخبريها عن كل شي. حتى طولي ووزني. وطول شعري وكل شي ووافقت وطلبت رقم امي. مره فرحت وعلمت اهلي. قالوا تمام واستقبلناهم. كنت على اعصابي طول الفتره. لين جا اليوم اللي جونا فيه. جات الام وبنتها. استقبلناهم وخرجت لهم. كنت فرحانه مره ذاك اليوم. مبسوطه ان فيه احد معبرني وجاي عشاني
المهم الام وبنتها مايتكلمون كثير. خرجت لهم وجلست. طالعت فيني وقالت كيفك قلت الحمد الله عرفت من نظرتها اني ماعجبتها. حتى بنتها تطالع فيني كذا. مو عاجبتها
قعدوا شوي و راحوا.
كنت فرحانه وفي نفس الوقت متوتره من نظراتهم. كلمت البنت اللي دلتهم علينا. قالت ماعليك هي اكيد بتوافق لانها ماشرطت شي في البدايه غير انها تكون بيضا. وانتي بيضا.
البارح. الا البنت ترسلي تقول كلموا ولدهم ورفض. قلت وش السبب قالت يبي بيضا مرره وشعرها طويل.
قلت ليش ماقالت من البدايه. ماكنت خبرت اهلي وجونا وانا قلت كل شي عني قبل تجي ووافقت.
حلفت البنت انه كان ذا شرطهم الوحيد البشره الفاتحه بس.
انا جمالي عادي مو شينه ولا حلوه وشعري ناعم. بس قصير واصل لكتفي. يعني ممكن تقولون. اكيد اني شينه مره عشان كذا رفضوا
الزبده انه حزت في خاطري حركتها مررره☹️ يعني لو قالت شرطها من البدايه ماكان صار اللي صار. احترت كيف اقول لاهلي انهم رفضوني انحرجت مرره. كيف اقولهم ماعجبتهم وماني طلب ولدهم. وانا من النوع اللي مااحب احد يحزن علي او ينظرلي نظرة شفقه. اتعب زياده. دم اني قويه قدام اهلي واضحك. وانا داخلي بركان. ماقلت لاعلي شي في البدايه. لين خفت الصدمه عني شوي واستهديت بالله. بعدها قلت باقول اني انا اللي رافضه مو هم اللي رفضوني عشان شكلي قدام اخواني وامي قلت انه تشرط علي شروط وانا رفضت هذا الكلام صار البارح اتكلم قدامهم وانا قويه وواثقه من نفسي واروح بعيد عنهم وابكي. ماتتصورون كيف نفسي مكسوره واحس بشي ثقيل على صدري. حتى صديقاتي مااحب افضفضلهم.
لكن الحمد الله على كل حال في النهايه خيره من الله والامور ذي قسمه ونصيب. لكن نفسيتي تعباااانه مره من ذا الموضوع. ولاني قادره ابين لاحد وافضفض. عشان كذا سجلت في المنتدى. ابي احد يواسيني. يقولي كلمه طيبه. انا لو صغيره كانت الصدمه بتكون اخف. واقول بتجيني فرصه ثانيه. قلبي متعلق بالزواج يابنات. نفسي في بيت وزوج واسره. او ختى وظيفه تلهيني. واصرف على نفسي تعبت.
رغم اني مؤمنه بالقضاء والقدر. ومتأكده ان ربي بيجبر بخاطري. لكني تعباااانه لا تبخلون علي تكفووون 😭😭😭😭الكلمه الطيبه صدقه