فضفضه ، بيتنا والناس

السلام عليكم ورحمة الله 
صباح الخير 
موضوعي مجرد فضفضه وابي نصايحكم لي يعني خففو علي ، عشان نفسيتي وكذا 




بدخل بالموضوع مباشره 
احنا ساكنين بمدينه هالمدينه مافيها احد من اهلنا ، انولدت فيها 




واهلنا وجماعتنا ساكنين بمدينه تبعد عنا تقريبا مسافة ساعه بالسياره وهالمدينه انا جامعتي فيها وادرس هناك ويوميا اداوم فيها 




المهم قبل 3 سنوات بنت عمي تزوجت وسكنت بمدينتنا ومره فرحت انو صار فيه بنت تقرب لنا ساكنه قريب بيننا وبينها شارعين بس بالسياره اقل من 5 دقايق 
وكنت ادق وارسلها واشوف اخبارها واعزمها عندنا ع القهوه ولا عشاء 
واطلع لها انا واخواتي 




يعني بالشهر نشوفها 3 مرات 




واذا بنطلع نتمشى ندق عليها ونقولها اذا تبي تطلع معنا وهي كانت كذا تدق وتقول قابلوني بالمكان الفلاني 
ومرات اقولها تطلع معي السوق 




واذا سافرت اتطمن عليها ( مثلا توصلين بالسلامه ، هاه وصلتي وكذا ) بس اسأل مره وحده مو انشب ، من باب انه اسوي الواجب وكصلة رحم وبس 




المهم انا يوم شفتها ماتسإل صرت اطنشها وماعاد اكلمها ابداً 
وهي ابد ماتسأل ولا شيء 
والمشكله تجلس تحش وتتنقد باللي ماتسأل عن اهلها 
( ترا ابوي يصير عمها وامي  تصير خالتها اخت امها ) 




ايام كان زوجها يروح دوام بعيد تجي الصباح تنام عندنا وامي تقوم من عز النوم تفتح لها الباب يوميا 
اخر مره زارتنا برمضان ، وبعدها سافرت واحنا سافرنا 
ورجعت قبلنا واحنا بعدها ولا سألت ولا دقت ع امي ابدا 
ومره قاطعه ويوم قابلناها ببيت جدتي كانت هي واهلها شايفين نفسهم علينا 
وماتسولف معي وراحت تسولف مع بنات عمي 
وتسأل عنهم وتدق عليهم دايما 
واهل عمي ساكنين بالمدينه اللي جامعتي فيها 
وتروح لهم دايمااً مع انهم ابعد !!! 
واختها واخوها مايجون عندنا زمان كانو يجون بس الحين لا يجون بالسنه مره عشان الشرهات 




انا ماحب كذا وودي علاقتنا تكون حلوه ليه ينفرون منا وش السبب ؟! 




معقوله لاني رفضت اخوهم يوم خطبني معقوله فيه ناس بهالتفكير ؟! 




ايه واهلنا بالمدينه اللي انا ادرس فيها مايجون عندنا كثير نفس الشيء بالسنه مره بحجت انها بعيده 
وارد واقولهم يووووه اجل انا وش اقول كل يوم رايحه جايه مع هالخط 
عشان ابين لهم انها مو بعيده مره كلها 70 كيلو 




ويابنات احنا ماعندنا جيران 




ساكنين بعماره فيها 4 شقق 
شقه فيها عائله بس رسميين مره مايجون الا بعزيمه مافيه ميانه 
وشقه فيها عائله هنديه
وشقه كانت فيها عائله ماشاء الله بالاسبوع مرتين تزورنا امهم
وبنتهم تجي تلعب مع اخواتي 
ودايمااً زيارات بس نقلو قبل 3 سنوات لديرتهم 
و جو بدالهم عائله مايحبون يزورون احد الا من اهلهم وجماعتهم وعيال عمهم وبسسس 
فهمتو علي ؟ 
ولسوء الحظ البيوت اللي بجنبنا كلها لنفس هالعائله ومايزورونا ابدا 




بس اول ماسكنا بشقتنا جو يرحبون فينا 
وامي راحت لهم واكثر من مره تروح تسلم ع امهم الكبيره بالسن بعدين صارت خلاص ماتروح 
برمضان نذوقهم ويذوقونا من الفطور 




وصديقاتي بالمدرسه اللي تزوجت واللي سافرت 
وماعندي صديقات هنا لان دراستي بالمدينه الثانيه 
وعندي صديقات ومتواصلين معي مررررره 
واذا بطلع مكان يقابلوني بالمدينه اللي هم فيها اذا رحت ابي السوق ادق عليهم ونتقابل ويقولون ياليتك ساكنه هنا ونزورك وكذا 




يعني انا الحمد لله اجتماعيه واسولف وبشوشه ومااحب السوالف اللي فيها حش ونقل كلام واخبار الناس 




ولد خالي كان يجي يزورنا هو وزوجته دايما 
وبعدين ماعاد زاورنا ابداً 
الا بعد ماتوفت جدتي جو يعزونا وسهرو معنا 
( بعد العزاء باسبوع عشان كذا سهرو ) 




وامي تعرف حريم لكن مايجون كثير 




يابنات انا اتضايق بيتنا يقعد بالشهر والشهرين والثلاثه مايجون عندنا ضيوف 
ولا جيران كويسين 
والله اني احزززن واتضايق مره مره 




بالعيد ولد خالي كان زاير منطقتنا هو وزوجته واخوه وزوجته 




وحده من حريم اولاد خالي مرتين زوجها يقول بنزوركم ويوعدنا ويقول بتجي زوجتي معي 
ولا تجي يدق ويعتذر يقول تعبت
وهو مسكين يجي عند امي 
بس هي ماتجي مدري ليه !! مع انه ماقد صار بيننا شيء اصلا ماقد شفناها الا مرتين وكنت اسولف معها وامي وهي تسولف ومبسوطه بس مدري ليه ماكانت تبي تجينا 
او يمكن تعبانه فعلااً 
وزوجة ولد خالي الثاني ، جات عندنا من منطقه ثانيه مخصوص هي وزوجها يسلموو علينا ، 








مرات افكر واقول ليه الناس مايحبوننا ؟ 
وشفيه وش اللي غيرهم 
قبل 3 سنوات بيتنا كان دايما ضيوف 
احب الناس واكره الروتين اللي صاير ببيتنا 
مره مضايقني واحس بحزن ، 
افكر يمكن فيه سبب مخلي الناس مايجون 
والله دايما مشغلين القران بالبيت
ومرات اقراء البقره بالبيت بصوت جهوري 








حاليا متضايقه انه مافيه جيران 
ونفسي لو ننقل للمدينه الثانيه قريب من صديقاتي واعرفهم ع اهلي ، و نصير قريب من جماعتنا 




وبنت عمي متجاهلتها تماماً ماتهمني ابداً 
لكن ابي اعرف ليه معنا كذا 
تخيلو بس تكلمني بالواتس اذا تبي تعرف شيء 
مثلا من وين بلوزتك
ابي محل عبايات حلو 
ابي عنوان المشغل الفلاني 
الصحن الفلاني بكم ومن اي محل 
من وين تشترين ملابس العيد 
وانا والله اعلمها وما ابخل عليها بشيء 








وشلون اتعرف ع ناس بنفس مدينتي ونزور بعض ؟ 
فيه احد كذا ولا بس احنا ؟ 




يابنات اشوف ماشاء الله بنت عمي 
اهل زوجها هم من جماعتنا بس من بعيد ويصيرون عيال عمه يزورونها ويتجمعون عندها وتروح لهم دايما كذا ماشاء الله 




انا ابي كذا ، ابي بيتنا يرجع زي قبل