فضفضه لاتتحمل التأجيل وابي وقفتكم 😭

           
                       السلام عليكم ورحمة الله وبركاته 

خواتي في منتدى حواء احبكم فالله ارجوا من الله ان تكونون في خير وسعاده 

انا يا اخواتي هاديه ولله الحمد بعد سنتين من زواجي ومع كثرة المشاكل وتصرفات زوجي اللي تذبح المشاعر تغيرت وصرة  نكديه ولساني طويل وصوتي عالي ابي اخذ حقي منه ليش هو يصرخ ويستفز وانا عبده عند اللي خلفوه لغااااااية ماصارت مشكله قررت بعدها اروح لاهلي وانا مافي راسي الا الانفصال لاني ماشفت فيه شي زين ينصبر عليه والعكس صحيح الرجال مصلي بار بوالدينه حنون مع بنته كريم مع الناس بس انا يستكثر علي الريال مالكم بالطويله رحت لاهلي وحلو الاشكاليه وابوي سمعها كلام قوي وهدده لو جيته زعلانه ماعاد ارجعها لك ابدا (الله يخليه لي ويطول بعمره )رجعت له وانا ابكي ولاتكلمني وانا اكرهك وما ابغاك انت جبت لي حاله نفسيه اذا انت مريض روح عالج نفسك بعيد عني ولاتفكر اني بكون زوجه لك لأ خلاص زمن التضيحات واني بنت ناس ومتربيه خلاص مايفيد معاك .......  

👆بنات الله يوفقك ما ابيكم تتصرفون بجونون مثل تصرفي لا خلوكم عاقلات مو كل رجال يتحمل ويجاريك وشاريك ..(ماشاءالله تبارك الله ) اللهم لك الحمد حتى يبلغ الحمد منتهاه 


 المهم بعد المعمعه هذي والكلام القوي اللي قلته له كأني فوقته وصحيته جلسنا اسبوع او اكثر او اقل ما اتذكر بصراحه لانها ايام ودي امحيها من حياتي بس الحمد لله على كل حال ماحسيت اني عروس زوجها فرحان فيها كان يعاملني بغلظه وجفاوه ...

المهم مالكم بالطويله مرة فتره ما اذكر كم وجاني وقال ممكن اتكلم معاك وتسمعيني للآخر قلت ما ابي اسمعك سمعتك كثير وماتغير شي ريح نفسك ووفر كلامك لك قال معليه سمعتيني كثير اسمعيني هالمره جلس يحكي عن تصرفاته وانو مجنون وانو غبي وانو انت ماتستاهلين اللي سويته فيك انا دايم اراضيك بس مافيه شي من جواتي يتغير هالمره انا فعلا محتقر نفسي انا خربت حياتي بيدي انت ماقصرتي انا جاهل وفعلا ابي اتغير وحلف ان يعوضني وينسيني كل اللي صار والعبره مش فالبدايه العبره فالنهايه انت عطيني فرص كثيره وانت الآن مو طايقتني عطيني هالفرصه تكفين انا فعلا ودي اغير حياتي واتغير واسعدك واعيش بسلام مثل كل انسان مبسوط بزوجته وعياله (عشان اكون صادقه تغير خلال هالسنتين ولان بس كان فيه صفه كانت هي اللي كنت بهدم بيتي بسببها واللي هي انو يتشكى واذا زعل ماعنده مشكله يطلع برى الشقه ويتكلم ويهاوش وهو بالدرج )➡️وهذي هي الصفه اللي خلتني اقول لأ خلاص لحد هينا وبس ضيعت من عمري كثير لكن تدخل الوالد وعمي الله يخليهم لي ويحفظهم وكل قارئ خلاه يفوق لنفسه ويعرف انو لو سواه مره ثانيه بيفضحونه ويشرشحونه وهذي ماهي من صفات الرجل العاقل ...

طبعا خواتي والاهم عندي (حروف ساكنه )وكل وحده عصبيه  لماكنت هاديه وما أرادده ماكان ينفعل بصراخ ويطلع برى البيت وهو يهاوش بس لما صرت اعصب صار يسوي كذا يعني ما استفدت شي من المرادد بالعكس انفضحت بالجيران وكل الناس 

طيب اكيد تقولون ايش تبغين توصلين له انا كنت مع كل هالمشاكل ما اخلي الوتر ودايم ادعي بالخيره وتسخيره لي ولي سنتين الحمدلله محافظه عالاستغفار وطبعا لي سنتين مبسوووووطه بحياتي الله يديم نعمته ولايغير علي يارب  

حبيباتي زبده ⬆️هذا كله انو امس وقبل لاننام ولاني مجهده نمت او مانمت بس متسطحه وهلكاااانه صار زوجي يسمعني كلام يسم البدن وكلام جارح (طبعا جارح فالحياه الزوجيه )مو كلام بذيئ او لعن او سب لا والله بس انت مقصره وانت وانت وانت تخيلو هالكلام وانت بفراشك زهقانه تعبانه تبين ترتاحين لان وراك بعد الفجر شغله بتاخذ منك اقل شي ساعتين مارديت الا انو انا ماني مقصره معك في شي قال انت مو مقصره حتى بعد مو مقصر معك تدرون وش كان ردي ؟؟؟؟
قلت فعلا انت مو مقصر وانا بعد مو مقصره وجلس يبرربر وبعدها سكت بنات انا كنت اردد في نفسي 
         استغفر الله الذي لا إله الاهو الحي القيوم واتوب اليه (3)مرات 
         لا إله إلا انت سبحانك اني كنت من الظالمين 
         لا إله إلا الله ولا منجى من الله إلا اليه
         يارب هدي باله واشرح صدره 
         اللهم اني مغلوب فانتصر (ابي النصره مش في ضرر له لأ بس في انو يرجع لعقله ويدحض الشيطان )
          اللهم رده لي رداً جميلا ......
        بنات تخيلوا ماخلصت هالادعيه الا هو يحب على راسي وسامحيني وانا اسف وانت مافي زيك وانا اللي ادور مشاكل والا انت والله ماقصرتي !!!!!
بنااااات انا هنا على طول قمت اتحمدالله واشكره قام سألني ليش تقولين كذا 
قلت لاني الحمدلله ما انهيت دعائي الا انت مراجع نفسك ومتعوذ من الشيطان 





بنااااات علقوا انفسكم بالله التزموا الهدوء وطولة البال اكثروا الا ستغفار صلوا الوتر وادعوا باللي في خاطركم واذا ربي تأخر في استجابة دعائكم لاتيأسون تأكدوا إن الله حاب يسمع مناجاتكم كل ليل ويمتحن صبركم  


          طولت عليكم بس حبيت اقولكم عن اشياء انا بنفسي عايشتها 
         ولأني احبكم فالله ابيكم تاخذون منها اللي يفيدكم وتجتنبون 
         اخطائي ... 
اللهم ربي ارح قلب كل مهموم وردنا اليك ولاتعلق قلوبنا بسواك ربي ارضنا عنا وتب علينا وتولنا ولا تولي علينا من لا يخافك فينا ولا يرحمنا 

 وطبتم سالمين والى ربكم منيبين 💐