فضفضه واستشاره

السلام عليكم ورحمة الله وبركاته



بنات لاول مره بكتب موضوع افضفض وبنفس الوقت استشير فيه وابغاكم توجهوني
الحمدلله حياتي الزوجيه تعتبر مستقره وخاليه من المشاكل انا وزوجي مسالمين وهادين ومانحب كثر المشاحنات والمشاكل


لكن عندي مشكله عقدتني زوجي دايم يشتكي اني مادلعه ولا اهتم فيه اذا سالته وش تقصد بالاهتمام يعني ليالي حمرا وسهرات يقول لا ابغى احس بخوفك علي نفس بداية زواجنا اهتمامك كان واضح فيني ابغاك تمزحين معي تداعبيني تسولفين علي العمر يمشي واذا مادلعتيني الحين متى بتدلعيني


مع اني احس انا تغيرت شخصيتي عشانه يعني كنت كتومه صامته ولما تزوجت صرت اتكلم معه واسولف وحتى هو تاثر فيني وصار يسولف ويتكلم عن كل شي حتى عن اصحابه والعمل
صرت احضنه وابوسه باي وقت واذا كان برى ارسل له رسايل والكلام الحلو اقوله لكن لما اقوله ينظر بنظره انه مو مصدقني ولما اقوله كيف تبغاني اقولك كلام حلو وانت تكذبني يقول لاني احسه مو طالع من قلبك




مشكلتي مو قادره افهم هو وش يبغى بالضبط ولا قادره اطبق اللي يبغاه كيف دلع مو فاهمه وبعد عندي مشكله يمكن اغلبكم عارفها اني تعبت بعد ولادتي الثانيه قبل8سنوات ولازلت اعاني وهالشي اثر علي من جميع النواحي خصوصا مشاعري تجاه زوجي واطفالي ويخليني بس اتمنى يومي يعدي على خير بدون خوف وساوس ورعب هذي اكبر نعمه فهو لما يطلب مني هالشي يزيد توتري فوق مافكر بحالتي اجلس افكر كيف اسوي واخاف يطفش ويمل وكم مره قالها انه من كثر ماتكلم خلاص مل وماراح يعيد ولايتكلم بالموضوع


مع انه حتى انا احس بهالشي يعني افتقد تعامله معي بداية الزواج وافتقد لدلع صح هو يداعبني طول اليوم يعني لما يمر من جنبي يسوي حركه او يبوسني او يغمز لكن ماحس بخوفه واهتمامه فيني مثل قبل


احس اني ضايعه ماني عارفه كيف اسوي يعني هو يحس بنقص وانا احس بنقص وحياتنا مافيها ولا مشكله يعني مشكلتنا الوحيده هي المشاعر
خصوصا انا المشاعر عندي ميته من8سنوات ترجع بين فتره وفتره واحاول اعوض واتقرب منه لكن اذا ماتت ماحس حتى بنفسي الله المستعان


ومشكلتي ماعرف امثل يعني اذا كنت تعبانه ماعرف امثل اني مبسوطه ومستانسه


ادري كلامي ملخبط ومتداخل لكن مجرد الكلام بهالموضوع يوترني مادري ليش
يمكن لانه هو الشي الوحيد اللي احسه راح يدمر علاقتي بزوجي لو استمر مع اننا طول السنه عايشين ومانشتكي من شي واذا سالت زوجي انا مقصره بشي يقول بالعكس انا مستحي منك انا اللي مقصر معك كثير ياليت تقولون لي وش اسوي لاني تعبت من التفكير