مبارك عليكم الشهر جميع
حياكم الله على فطورنا اللي كان دجاج بالزبده مع رز بالزعفران نفس مطعم شيزان بس احلى منه >>> وااااثقه :)
طريقة الدجاج بالزبده
تحتاجين: قطعتين صدور دجاج او ممكن دجاجة مسلوقه ومنزوعة العظم ومقطع اللحم الى مكعبات
بصل مقطع جوانح
نص اصبع زبده
قرن زنجبيل مبشور منه قد ملعقة صغيرة
فصين الى ثلاثة ثوم مهروس
فلفل رومي حبة متوسطة
حبة طماطم متوسطة وحمراء
كزبرة خضراء قد كاسة مقطعة انصاف فقط ومايكون مفروم
ورق غار اربع او خمس ورقات
كاس زبادي
كاس حليب جوز هند وممكن لو مافيه تحطين علبة قشطة
ملعقة صلصة طماطم او ممكن تحطين كاتشب
سكر بني قد ملعقتين وممكن تزيدين او تقللين حسب الذوق
ملح ، فلفل احمر مطحون ، كزبرة،كاري اوكركم او براس الملعقة صفار الزعفران
الطريقة:
نسلق الدجاج بطريقتك المعتادة و يقطع مكعبات وبعدها نحط في الخلاط الزبادي وحليب جوز الهند والطماطم والصلصة والكركم او الكاري او صبغى الزعفران ونخلط لين يتجانس
بعدها نحط الثوم والزنجبيل مع الزبده على النار ثم جوانح البصل وورق الغار وبعده نحط مكعبات الدجاج ونحرك شوي لين ياخذ الدجاج النكهه وبعده نصب خليط الزبادي عليهم ونحرك لين يختلط الجميع بعدها حطي مكعبات الفلفل الرومي ونحط البهار والسكر وباقي البهارات ونحركهم ونتذوق ونضبط الملح ونخليهم يتسبكون شوي بس لازن نحركهم كل شوي
وفي الاخير وقبل التقديم بقليل حطي الكزبره المقطعة وحركي شوي عشان ماتفقد نكهتها الحلوة..
وبس هذا طبقنا الاول
الثاني الرز بالزعفران
تحتاجين: كاسين رز بسمتي
بصلة كبيرة مفرومة ناعم
خمس ملاعق زيت
نص ملعقة صغيرة زعفران واذا مافيه ممكن صبغة زعفران و نص بيالة موية ورد واذا مافيه ممكن موية عادية
الطريقة:
نقعي خيوط الزعفران مع نص بيالة موية ورد او الموية العادية
اغلي على النار ثلاث كاسات ونص ماء (المهم ان ارتفاع الماء يكون 2سم عن سطح الرز) مع ملعقتين زيت وقليل ملح وعلى ماتغلي حمري البصل على النار مع ثلاث ملاعق زيت لين يصير لون البصل برتقالي محمر بعدها سكري النار عليه وبعد ماتغلي موية الرز حطي الرز عليها وحركيها وخليها لين يبداء الرز يتشرب الماء وبس يختفي الماء تحت الرز صبي عليه خليط البصل المحمر مع الزيت وحركي لين يتوزع البصل على كل الرز بعدها خففي النارعلى الاخر وغطيه وخليه يستوي على راحته حوالي عشر دقايق وبعدها وزعي على الوجه خليط الزعفران وغطيه لمدة 10 دقايق ثانية وممكن تغطين الوجه بقصدير عشان تكتمين البخار وبعدها تمتعي بأحلى رز بالزعفران...
صحة وعافيه على قلوبكم ...