حي الله الجميــع وفي انتظـــــار ضيفتنا :) ...

السلام عليكم ورحمـــة الله وبركاته

مساؤكم روحانيه
كل عام والجميع بخيـــر ومبارك عليكم الشهر
جعلنا الله من صوامه وقوامه وتقبل منا ومنكم صالح الاعمال ♥
بالبدايه وقبل كل شي اشكرك ريمو على هالكلمات الجميله الله يجعلني خيراً كما تظنون
وأشكرك عالاستضافه وحشني المنتدى وعضواته : (
ثانيا حابه ارحب بالجميلات اللي نوروا المكان
ان شاء الله اكون ضيفه خفيفه في هالفعاليه الجميله



شويات وجايه بالأجوبه

أهلين بالغالية على قلبي نوووشة
مبارك عليك الشهر ،،

اتسائل عن افطاركم«««««وحدة يهمها الاكل :-)
مالاكلات الرمضانية اللي تتميز بها سفرتكم الرمضانية في الغالب
وشكرا،،

س1 / ماذا يعني لكِ شهر رمضان المُبارك ؟

أكيد شهر يختلف عن كــل الشهور
شهر الرحمات يختلف بـ إجواءه وروحانيته يغير كثير بداخلنا , بهذبنا , يقربنا للعبادات أكثر والتزود بالطاعات
الضيف اللي يجينا بالسنه مره له اشتياق خاص وياليت كل السنه رمضان ♥
لكن ضيفنا عجول نسأل الله ان يتسلمه منا وهو راضي عنا وان يتقبل منا الصيام والقيام وسائر الأعمال

س2 / ماشعورك في اول يوم صمتي به في رمضان

من كنت صغيره كانوا والدي الله يطول بعمرهم تدريجيا يعلموني الصيام كان يقولون كلي الى اذان العصر وبعدها صومي كانت تمشي علي هالكلام واصدق لا وكمان افرح لما يأذن وكأني عطشانه واشرب كاس ورا كاس هههههه

بعدهآ خلاص كبرت شوي وتحديت اني هاليوم بصومه كله كنت الاقي التشجيع منهم صحيح كانت تتنرفز مني امي لما كل شوي جايتها اسأل متى يأذن كم باقي بس فرحه صيام اول يوم اكيد ماتنسى

س4 / عادات وتقاليد خاصة بكم في رمضان ؟
ليلة رمضان اكون مجهزه دراعتي الجميله اللي اكون مفصلتها من شهر < انا وحده ماتلبس الدراريع الا بهالمناسبه :) فقط وهي لأجتماع مع بنات العائله الاجتماع يكون بعد التراويح في اول يوم فقط لتهنئه بالشهر
المميز فيها جونا رمضاني مع أمهاتنا الله يطول بعمرهم كل منهم تحضر ومعها طبق أجواء جميله وتنعاد علينا يارب كل سنه ♥


س5 / يومك الرمضاني .. باختصار ؟
هو لسى اليوم الثالث النظام تمام والنوم تمام يارب نستمر كذا لاخر الشهر :tongue:
يومي بإختصار اصحى الظهر اصلي ارجع انام واصحى الساعه 3 اقرا قران لحين صلاة العصر
هالسنه مرتاحه سويت مفرزنات حقت 10 ايام فقط وبعدها ان شاء الله نفرزن حقت العشر اللي بعدها لان الفريزر امتلىء :biggrin2: بس بجد يابنات تكسبين وقت ومايروح عليك كل الوقت بالطبخ الا باشياء خفيفه

احب قبل الاذان بنص ساعه اطلع الحوش اجلس شوي اتأمل بالسماء احس جد برائحه رمضان بالجو ♥

أجهز الفطور وبعد الفطور هنا يجي تفقد الحبايب بالواتس وبالانستقرام
وبعدها اصلي العشاء والتراويح ويختلف نظامي بعدها على حسب اما اكون طالعه لمشوار او بالبيت
اتسحر شي خفيف وأحب اسمع للمغامسي عالقناه الاولى ياربي قد ايش كلامه يريح القلب
وبكذا ينتهي يومي

س6 / هل يؤثر الصيام على " مزاجك " ويجعلك " عصبية " بشكل كبير ؟

لا والله ابداً بالعكس احس نفسي لما اكون صايمه رايقه اغلب الوقت

س 7 / ماهي الاكلة الرمضانية المفضلة لديك ؟
طبعاً ملكة السفره الرمضانيه السمبوسه الشي المحير انا ناكلها بأوقات غير رمضان بس برمضان لها نكهه خاصه
فيه وعصير قمر الدين احبه

س8 / من وجهة نظرك : مالفرق بين رمضان بالماضي ورمضان حالياً ؟

احنا اللي عمرنا في العشرينيات نقول يااه مره اختلف رمضانا وحنا صغار عن رمضان الحين بس كيف لو نسأل كبار السن الجد والجده ايش تغير عليهم رمضان
ممكن احنا حاسين بإختلاف لكن بسيط بس كبار السن يتمنوا ايام اول ترجع ايام اللمه بالبيت الواحد والبساطه
أمي كان تقولنا عن رمضانهم زمان ومن ضمن الحديث ذكرت وانا وفلانه نجهز الفطور قلت لامي لحظه فلانه ايش جابها عندكم ؟ قالت كانوا يصومون معنا كل الشهر متخيلين هالعائله ماشوفهم ابد الا بالاجتماعات الكبيره !
يالله وش كثر كانت النفوس والقلوب وسيعه برغم ضيق البيوت والان برغم ان البيوت وسيعه الا ان النفوس ضيقه : (

9 / توجيهك للعضوات في شهر الخير ..لإاستغلاله بكل مايرضي الله سبحانه وتعالى ..؟

اوصي نفسي قبل ان اوصيكم بالتزود بالطاعات في هذا الشهر شهر المكرمات والرحمات فو الله انه يمر سريعاً حين نودعه وكأنه امس ابتدأ
كلنا مقصرين بس ان يبغلك الله رمضان هذه رحمة عظيمه من الله اهل القبور يتمنون ساعه بل دقيقه او حتى ثانيه يعودون فيها لدنيا لتزود بطاعه واحده او لذكر الله ونحن على الدنيا ولا نعلم هل نتم صيام هذا الشهر او لا فلاتجعلوا نصيبكم فيه الجوع والعطش ولنبتعد عن كل مايغضب الله
وهنا بالمنتدى لنتذكر اننا بالشهر الفضيل ونبتعد عن النقاش الذي لافائده له سوا المشاحنة والبغضاء والتلفظ على اختك المسلمه
بل استغلي وجودك هنا بالتذكير بالسنن المنسيه في رمضان وبالادعيه الصحيحه واالتذكير بأعمال الخير تكسبين اجر كل من عملت بنصيحتك


س10 / شخص تفتقدينه في رمضان .؟؟
هالسنه افتقد شخصين :
أخوي اللي صايم بالغربه : ( الله يرده بالسلامه
وصديقه عزيزه وغاليه ابعدتها الدنيا عني لكنها معي كلما دعوت الله دعوت لها اتمنى تكون بأفضل حال

11 / جزاكِ الله خيراً لمن توجهينها في منتدى عالم حواء ؟

لكل من أعطت ولا زالت تعطي المنتدى الشي الكثير لمن افادت غيرها ولو بشي بسيط جزاكم الله خيراً مشرفات وعضوات

س12 / كلمة اخيرة لك ؟ ( المساحة حــرة ) .
اذا اشتد بكم الجوع وانتم صيام تذكروا ذلك الصبي الذي قال من الصباح ماكلت شي
فلا ننسى الدعاء لاخواننا المسلمين في كل بقاع الارض من يعانون من حرب ومن يعانون من فقر
اللهم انصر اخواننا المسلمين في كل مكان واطعم جائعهم وأسق ظمأنهم واكسوا عاريهم اللهم ارسل لهم مددك وعفوك يارب

وعليكـــم السلام ورحمة الله وبركاته
حياك الله أختي راقيه
علينا وعليك يارب كل عام وانتي واحباب قلبك بخير والى الله اقرب
موقف رمضاني في الذاكره
مره كنت جايه من المدرسه تعبانه وتقولي امي طالعه مشوار قريب انتبهي للي بالفرن انا كنت وحده مايعتمد عليها بشي ابد مدري كيف امي وثقت فيني هههههه والله حاولت اقاوم بس النوم سلطان خذيت غفوه
واللي بالفرن الله يخلف عليه يقولون ان حتى الربيعه عجز يفصل الفطاير عن الصينيه :biggrin: احترقت حرق شنيع بكل وساعة عين جالسه في السفره واقول وين الفطاير اللي من اليوم انا منتبهه لها ليه ماحطيتوها ؟؟ هههههههه

معنى اسم معرفي
اكثر الاسماء الحين من باب التدليع يضاف لها حرف الشين وهو اختصار لإسمي :wink2: