فعلاً : الراتب لا يكفي الحاجه !!

مالقيت اعمق من هالعباره اللي تعبر عن وضعي الحالي ، من بداية زواجي وصارت مشكله لزوجي وبسبب هالمشكله تم ايقاف خدماته
كان يستلم راتب بمبلغ 4050 ريال وصار يستلم 2400 فقط والباقي موقف مايقدر ياخذه ، زبدة الكلام انه يجيب الراتب ويعطيني اياه بحجة انه "يطيّر الفلوس" ومستحيل تجلس معه اسبوع ..
فيقول خليها معك وسددي منها البقاله والمطعم والكهرب والباقي خليه معك لآخر الشهر يكفينا .. وانا يابنات والله ما افهم بسوالف الاقتصاد والحرص على الفلوس وكذا ..

اعطيكم مثال : الشهر اللي طاف البقاله كانت تبي مننا 945 ريال ، والمطعم 150 ريال والكهرب 200 ريال اشتراك النت كل شهر 300 .. باقي الفلوس مدري وين طارت

انا زيه احب افسفس الفلوس على خرابيط بس ماسكه نفسي ومانعتها من اشياء واااجد والله حتى كريم اليدين اتردد قبل لا اشتريه :(
وحطوا في بالكم ان زوجي مدخن يبي فلوس للدخان ويبي فلوس للبنزين ، واللي ابيه منكم قسموا لي الراتب بشكل مبسط يصير احافظ عليه قدر الامكان
كل وحده تحط نفسها مكاني وتعطيني رايها
وادعوا لنا ان الله يفرجها علينا ويرزقنا الرزق الحلال