فعلا كل تأخيرة فيها خير شفت بعيوني

السلام عليكم
امس كلمت زوجي عن احتياجي ل بعض الاغراض للبيت
الرجال تجاوب معي وقالي بعد صلاة الجمعة امر عليكي ونروح معاكي ساعة وحدة فقط لاني عندي موعد مع واحد منطلع ل مكان نشوفه
رحنا اتقضينا ووقفنا عالكاشير زحمة جدا والكاشير تعطل وعلى بين مافتحو واحد جديد وحاسبنا وخلصنا ضاع وقت كثير
طلعنا وهو مسرع جدا يبغى يمشي بيرجع لورا بالسيارة واحد وراه وصدم فيه الصدمة كانت خفيفة جدا وقفو عشر دقايق وكل واحد راح بحال سبيله
اشارات طويلة وهو يسابق الزمن والرجال كل خمس دقايق يتصل فيه وهو يقوله دقايق بس وانا اجيك
واحنا ماشيين وقفه شرطي مرور تقولو شق الارض وطلع منها ماندري من وين طلع وقف لنا مخصوص ووقف سيارتنا وقاله ماسك جوال ولا رابط حزام الامان ونزله وخالفه وأخره بزيادة
واحنا نكمل طريقنا بنشر كفر سيارته وهو يحلف ويقول وش هالنهار هذا الكفرات جديدة ونزل غيره ورجع
وهو ماشي بسرعة واحد قدامنا ضرب فرامل فجأة زوجي مالحق يوخر عنه دعم فيه من ورا لما صدم صار يضحك والضربة كانت متوسطة الاضرار الحمدلله اتصل بالرجال وقاله توكل على الله وروح خلاص انا اخلص والحق فيك اذا قدرت
مشاني انا اوبر وقعد مع سيارته على بين ماجاهم المرور
رجعت والمغرب يأذن وهو لحق فيني بعد ساعتين ماقال شي
ولا متصل عليه واحد ثاني خبره انه خويهم سوا حادث فظيع على الخط وانقلبت فيه السيارة وضرب بعامود والحمدلله طلع سليم عدا عن الكسور والرضوض لي صابته
زوجي قعد يضحك قاله خويه اقسم بالله لو في احد راكب جنبه هذا مليون بالمية بيكون ميت بالثلاجة لانه اغلب الضرب جا على كرسي الراكب
قلت سبحان الله العظيم كل هذا التأخير لي صار علينا من البنشر للصدمة للشرطي واحنا نتذمر واتاري رب العباد بلطفه كان منجي زوجي من موت محقق