مقدمه
كثير مننا يحب التغيير في شكله .. ويحب يبتكر اشياء جديده وحلوه يكون مميز فيها واحنا لما نرجع لطبيعتنا العربيه نحصلها مليانه بحاجات مره حلوه ومميزه بس كل الي علينا انو احنا نضيف عليها لمساتنا الخاصه عشان نطلع بنتيجه حلوه منها .. واحلى هالحاجات هو الحناءوالرسم فيه.. على اليدين والرجول وباقي اجزاء الجسم ، ففكرت اني اعطيكم افكار عن كيف الواحد يقدر يرسم على يدينه او يدين احد من الصغار عنده ويفرحهم او يفرح فيها هوا كمان من باب التجديد والتغيير في الشكل .. والشغل مايبيلها تعب ولا حاجات كثيره طبعا ..بس يبغالها تركيز .. فتعالوا معايا نشوف الحنا وكيف نقدر نستخدمها في الرسم ..
مصدر الحناء
تستخرج الحناء من شجرة صغيرة الحجم مايتعدى طولها متر واحد وتعيش في واحات الصحاري .. اوراقها لها لونين الاصفر والاحمر .. تنقطف بعدين تتجفف كويس بعدين تتكدس فوق بعض علشان تنطحن بعدين تتحول لرماد يستعمل كمستحضر تجميل مثل الي
راح احكي عنه
كيف نجهز الحناء للرسم ؟
الحين اغالب مراكز التجميل يعتبرون الحناء مستحضر تجميلي مهم بالنسبه للبنات اكثر حاجه وحتى انه طالع موضه عند الاجانب زي ماشفنا ( مادونا ) وهيا راسمه يدينها وطبعا فيه خلطات كثيره الواحد ممكن يعملها بنفسه :
- ملعقتين حناء .
- كاسه صغيره مويه .
- ملعقة صغيره عصير ليمون .
بعدين نخلطهم مع بعض علشان يطلع معانا عجينة لينه ونقدر بعدها نعمل الرسم على اليدين .. وبعد مانخلص من الرسم نخليه علينا لمده ساعتين تقريبا او لحد ما نحس انو لونه تغير ونغسله عشان نحصل اللون الي نبغاه
فين نرسم الحناء ؟
ممكن نرسمها باي مكان احنا نبغاه مثل اليدين والرجول وكمان ممكن نعملها كتاتو في الكتف او الرقبه او حتى على المعصم ونرسمها على الشكل الي احنا نحبه >> واحسن حاجه اننا نستخدم الرسمات الجاهزه في النقش بالحناء علشان تطلع النتيجه مضبوطه ويطلع الرسم احلى خصوصاً لما تكون الرسمات صعبه وكثيره وهذي بعض الرسومات وكيف تكون اشكالها :
هذي لليدين
وهذي للمعصم
وهذي الي ممكن نستخدمها كتاتو في اي مكان نبغاه
لون الحناء
الوان الحناء الطبيعيه تختلف بين البرتكاني الغامق والبني الفاتح .. لكنها تتغير على حسب لون البشره وعلى حسب العرق نفسه ولا الجفاف بهالبشره ، ولون الحناء بالغالب يكون غامق على البشره الحاره او ( ذات الدم الحار ) زي مايسمونها اكثر من البشره البارده ( ذات الدم البارد ) واللون يتغير كمان مع الوقت فهوا ممكن يصير فاتح ويخف بالتدريج لحد مايختفي بعد اسبوعين او ثلاثه بالكثير .
الحناء السوداء
ممكن احد يقول والحناء السوداء او احد يقترح عليك بانك تعملينها بس الاطباء محذرين منها لأنها مش طبيعيه وممزوجه بمواد كيميائيه ملونه خالطينها مع بودرة الحناء عشان تطلع سوداء .. وممكن مع الوقت تسبب حساسيه للبشره .
انواع الرسومات او النقشات
- النقشة العربية :
يستخدم فيها الكف من جوا وتملى بالورود المتشابكه في اتجاهات مختلفة وتختلف اشكال الورود واحجامها حسب المسافه عن الذراع.
- النقشة الهندية :
وهي نقشة صغيره مره ولا يستخدمون فيها الورود لكن يحطون دوائر ومربعات صغيره ومتشابكه .. يعني اشكال هندسيه بشكل عام .
- النقشة السودانيه :
تكون نقشاتها كبيره واشكالها مختلفه وفي الغالب تكون باللونين الاسود والاحمر .
- النقشة الصينيه :
تتميز برسم الاكواخ الصينية والنجوم والأقمار وهذا النوع هو الي يستخدمونه الاجانب في الغالب مع النقش الهندي .
الحين عرفنا كل حاجه تقريبا عن الحنا فخلونا نشوف بعض الصور للرسومات والاشكال الي انعملت :
اليدين
الذراع والرجول
واخيرا حناء العروس
اعرف انو فيه حاجات كثيره ماحكيت عنها .. بس هذي تاركتها لكم انتو عشان تشاركوني فيها فاذا عندكم زياده على الي انا قلته فالله يحييكم باي حاجه تعرفونها
وبالاخير ما انسى اقول شكراً لجدتي لانو هيا الي اعطتني فكرة الموضوع لما كنت احكي معاها وشافت يديني وقالت لي ليش يدينك بيضاء كذا ليش ماحطيتي فيها حناء بدال ما هيا ماصخه كذا
،وشكراً لصاحبتي هيفاء الي ساعدتني بالصور وتحميلهم<=== ماتعرف حاجه بالتحميل
