فقدت اغلى واحلى شي حصل لي ،، انا انكسرت

بسم الله الرحمن الرحيم 
اخواتي الغاليات ارجوكم لا تجي وحده وترد برد قاسي 

انا اللي فيني مكفيني .. 

قبل شهر اجهضت بالشهر السابع
والله ماتتصورون وش كثر قلبي يوجعني على طفلي 

ليومكم هذا وانا ابكي دم لو ذكرته
والله شهر 30 يوم بكيت فيه

ادري بتقولون صغير وماشفتيه عشان تتعلقين فيه 

بس والله انا ام وحاسه اني ربيته 
دايما كنت احظن بطني لو تحرك وكنت بالليل لو زادت حركته احط يدي ع بطني و اقرأ الأذكار 

وكنت لو حسيت بحركته احط قنوات الاناشيد 
وبالمطبخ فاتحه الاذاعه ع القرآن عشان اغلب وقتي بالمطبخ  .. صرت ابتسم كثير بعد ما حملت 

والله مو قادره انساه .. دعيت ربي يربط ع قلبي وانساه بس مو قادرة

انا تعلقت فيه تعلق غير طبيعي 
ورب البيت كنت اعد الأيام متى تخلص ويشوف الدنيا حبيبي وليومكم اعد لو ما اجهضت كان باقي 55 يوم ويشوف النور

انا يا بنات ما اطلع من البيت زوجي

أغلب وقته برى البيت او عنده اخويآه

ولما حملت جاهدت عشان احتفظ فيه 

زوجي ما كان يبغاه وقالي اجهضيه
والله طلبته يطلقني لو مايبغى اطفال الحين بس احتفظ بولدي 

فكرت بالأنفصال في سبيل احتفظ بقطعه مني

انا بس كنت ابغى اللي يونسني في وحشتي 

كنت ابغى احد يملي علي البيت 
ما ابي شي بس طفل ياخذ يومي كله

قالوا لي اهلي وحده جلست بالطلق 12 ساعه وانا ربي سهل علي و بسرعه ولدت

أنا والله ابي اتعب ابي اموووت
بس اشوفه 

بشتري ولدي .. راح ابيع كل اللي معي بس اشوفه

حرموني احضنه لصدري وحرموني ابوسه قبل ما يغسلونه وحرموني اتمقل في وجهه حرموا ام من ابنها 

و المغسله اللي غسلوه مارضو اشوفه
زوجي حاول بس قالوا له الولد صغير كيف تبغى تشوفه 

لو.هو كبير كان وافقنا انها تشوفه 
طيب انا ام حرام عليهم 

والله ما اسامحهم حرموني اودعه واستودعه ربي 

كنت ابغى أقرأ سورة الفاتحه بأذنه و اقول الأذآن عشان يطلع من الدنيا وآخر شي يسمعه قبل ما يكفنونه صوت امه 

كان ودي اقوله في أمان الله يا قطعه من قلبي

والله قلبي يوجعني .. ابي اصرخ ابي ارتاح 

لجأت لربي وارتحت .. بس لما اشوف اطفال دموعي تطيح غصب 

حتى لو كنت عند ناس دموعي تطيح لو شفت طفل عمره شهور 

حتى بالتلفزيون لو شفت طفل يبكي تلحقه دموعي 
ودي اضمهم لصدري عشان مايبكون

ماقدرت اشيل ولد سلفتي توها خلصت الأربعين 
مدري ليش ما اقدر .. والله تعبت تعبت

قالوا لي احملي بتنسين اللي راح
وانا زوجي الحين قال جات من عند الله واخذ امانته 

الحين لا تحلمين بحمل الا بعد سنه

انا قلبي محرووووق 
ابي انساه والله ابي انساه


تصدقون دايمآ اطلب زوجي ياخذني للمقبرة 
ابي اسلم عليه من برى 

هو صح امانه وراحت لصاحبها 
بس والله تعبت وانا حامل وكنت اقول يهووون عشان حبيب قلبي

طلبت زوجي ياخذني لمكه ابي اشوف الكعبه 

وابكي عند ربي في بيته المحرم 
يمكن تخف الضيقه وانسى شوي 

بس ما رضى زوجي .. ودايمآ يخاصمني لو بكيت

مع اني ابكي ع الصامت في الليل ومن دون مايشوفني

امانه ادعوا لي ربي يصبرني 
انا قلبي رهيف وحساسه اتفه الأشياء تبكيني 

ما بالكم بطفل حسيت براسه و اكتافه و اصابع رجوله لما نزل 

آه يا قلبي .. نفسي اضمه لصدري وابوسه 
بس يوم واحد اضمه وانومه بحضني بعدين ياخذونه لقبره 

تعبت اتظاهر اني نسيت وانا اذكر كل لحظه 

والله مو عارفة وش اسوي 
زوجي قال .. انا مريضه نفسيآ 

اقترح ياخذني مستشفى الأمراض النفسية بس انا رفضت 

لأن اللي فيني مو مرض فيني حرقة قلب ام ع طفلها

مو راضي يفهم ان الأم مو مثل الأب تحس وتتعلق بسرعه 
مو راضي يفهم اني انكسرت واللي كسرني موت طفلي

الله يرحمه برحمته و يجعل قبره روضه منورة.من رياض الجنه

الله يجمعني فيه يوم القيامه واضمه 
ما ابي شي يوم القيامه غير جنة ربي و احضن طفلي 

والله يصبر قلبي و انساه .. ادعوا لي ربي يجبر بخاطري بطفل سليم ومعافى 

والله يرزق كل محروم ولا احد يشوف اللي شفته