كل سنة وانتو طيبين عيدكم مبارك الله يعيده علينا وعليكم وعلى الامة الاسلامة بخير ..
ندخل في الموضوع .. اليوم جات بنتي من التمهيدي ومعاها ورقة من الادراة فيها دعوة للاطفال لزيارة واحد من زملائهم في المستشفى تعبان الله يشفيه ويرفع عنه المهم وقالت لي ياماما لازم اخد هدية معايا وانتو تعرفو اخر الشهر والميزانية ماتسمح جلست افكرلها في دي الهدية اللي مو وقتها بس انا طبيعتي مااحب اكسر خاطر بزورتي لو اخترع اي شئ المهم ينبسطو المهم ربي هداني وجمعت بعض الافكار وقرمبع البيت كله الين وصلت لفكرة حلوة وبسيطة شوفوها
اول شئ الاغراض
حلاوة من شوكولاين عندي حقت العيد بقيت منها وكنت رافعتها في الثلاجة شلتها وغلفتها تغليف عشوائي بالسولفان زي منتو شايفين
اعواد خشبية حق الايسكريم رسمت على طرفها فيسات
زينة قلوب
كاسة حمرا بالجوخ اشتريتها لي فترة من مهجة
وهنا شكلها اوضح واشتريت معاها سلة برضو بالجوخ >> السلة مالها دخل في موضوعنا هههه
خيوط خيش
واخيرا لعبة تويتي برضو عندي من زمان
الكاسة حشيتها بالسولفان ودخلت الحلاوة فيها وزينتها بشريطة ووردة في الوسط وغرزت قلبين ع الجنب
هنا جاتني فكرة غير ماحبيت اكتب في كرت واعلقه على الهدية طريقتنا المعتادة قلت خليني اغير وجمعت الاعواد الخشبية ورصيتها وكتبت عبارات بالانجليزي عليهم بس احسن انو الخط مو واضح هههههه
طبعا هنا من ورا حطيت قطعة قماش جوخ عشان تثبت الاعواد وخرمتها وربطت خيط الخيش فيها
يتبع
الكاسة ماكتبت عليها اي عبارة غير كلمة (أرين) اسمها بالانجليزي جبت واحد عود خشبي وكسرت اطرافه وخرمت بالخرامة طرف واحد وعلقته بالخيط على ادن الكاسة وزينته بوردة وشريطة حمرا وهنا واضحة جات مرة نعومة وحلوة
واخيرا مجموعتي الخنفوشارية مع بعض :32:
بنتي للان ماشافتها ان شاء الله لو صحيت تعجبها ويارب تعجبكم افكاري
استودعتكم الله