فلانه الخبله

فلانه خبله

والثانيه تقول

فلانه ماعليك منها ماعندها سالفه

فلانه ماتدري وين ربي حاطها

نسمع احيان هالجمل عن بعض النساء وللاسف من ناس كثير
احيان احنا نقول هالجمل
شي يعور القلب
انا يضيق صدري على هالفلانه وافكر بتصرفاتها

وغالبا تكون فلانه هذي طيبه واخلاقها عاليه ولاتحب تأذي احد ولاتتعرض لااحد
واحيان الناس تغلط عليها تقوم تسامح وتقول الله يكتب لي الاجر

وعشان مانكون زي فلانه الخبله شوفي هالشغلات بقولها لك

1- لاتعطين احد اكبر من حجمه حطي في بداية قائمتك انا ثم انا ثم انا
وبعدين الناس باختلاف اهميتهم بحياتي زوجي او صديقاتي او اهلي او اي احد بالدنيا
طبعا هذا في حال ماتكوني ام وماعندك اطفال بس اذا عندك اطفال بتختلف الحسبه شوي

2-مدح الناس
وهذي قضيه مهمه بشكل مو طبيعي
انا مااقولك لاتمدحي احد بالعكس امدحي لكن الشخص اللي يستحق المدح
بعمرك لاتمدحي شخص عشان تكسبي مودته او تتملقيه
بعمرك لاتمدحي شخص يأذيك عشان يكف اذاه عنك (وهذي الاحظها كثير من بعض البنات تقول امدحي اهل زوجك حتى لو يأذونك عشان يتعدلون ):42:
تدرين وش نتيجة هالمدح
الناس تحسبك خبله ماتفرقين بين الطيب والشين والكل يستهين فيك ويعاملك معامله شينه لأنك ماتفهمين
اهل زوجك يفرحوون ويحسبونك ميته عليهم ويحسبونك كنتي تلقين معامله اسوأ عند اهلك عشان كذا فرحانه بمعاملتهم

3- الضحك وكثرة المزاح
طبعا خفة الدم حلوه بس رجاء لاتزيد عن حدها لما يقولون الناس فلانه خبله بس تضحك

4- اذا احد اخطأ عليك تعاملي بحزم وصرامه واعطيه نظره قويه او كلمه في العظم وسكري السالفه ولاتحكين نهائيا لحد مايعتذر منك
واذا مااعتذر منك تعاملي معاه برسميه شديده الى مايحس بحجم الخطأ اللي ارتكبه
وبها الحركه صدقيني حافظتي على احترامك والكل يشيل هم زعلتك

5-النقاش في اي موضوع
اذا كنتي في جلسه وانفتح نقاش من اي نوع لاتتدخلين ابدا اذا كان مايعينك الموضوع
وبالذات اذا كان نقاش سخيف
واذا مره اعجبك النقاش وماقدرتي تسكتين ادلي برأيك بهدوء وثقه واتركي الحديث للاخرين
لاتتعصبي ولاترفعي صوتك ولاتحقري رأي احد مهما كان غلط

6-التسامح
وهذي يابنات تكفون احسها بتجلطني احيان
التسامح شي رائع وحث عليه الاسلام بس مايعني ان اللي تغلط علي اخذها بالاحضان في كل مجلس عشان اعلمها اني سامحتها
(لايلدغ المؤمن من جحر مرتين )
الللي يغلط عليك لازم يعرف انه غلط
سامحيه لكن حطي بينك وبينه حدود وتعاملي معاه برسميه ولاتعطينه وجه بزياده ولاتعطينه اسرارك
وطبعا كلن على حسب خطأه

7-لاتذكري عيوب الناس ابد لاتذمي انسان مهما شفتي من عيوبه
الناس لها عيون وتشوف وتدري وش عيب كل انسان
لكن انتي لاتتكلمي
حتى لو تكلمو قدامك عن اي احد لاتردين وقولي بصرامه
(ماعلينا من احد كلنا فينا عيوب )

8-اذا كنتي متزوجه لاتخلين كل سالفه في حياتك زوجك
واذا كنتي ام لاتخلين كل سالفه عيالك
واذا كنتي موظفه لاتصير كل سالفه وظيفتك
واذا كنتي طالبه لاتخلين كل سالفه دراستك
الناس تطفش وتمل من السالفه اللي ماتتغير
لاتحصرين نفسك في دور معين ادوارك كثير وتقدرين تكونين مناقشه جيده في كل موضوع

9-يمكن بعضكم يعتبر الموضوع سخافه وخرابيط ولكن انا احزن ولله اذا شفت في زمنا هذا بعض النساء ماتعرف تتعامل ولاتعرف تتكلم والناس من ظهرها يستغبونها ويتكلمون فيها
ودائما اتمنى اننا مانكون بها المواقف