فلوسه ومو راضية تعطيه!! وعادي عندها لو يشحت

السلام عليكم ورحمة الله وبركاته..


كيفكم بنات ؟:)

انا حابة اعرض مشكلتي لثقتي ان عندكم الرأي السديد

انا متزوجة لي ثلاث شهور, اهل زوجي ناس ميسورين لكن يخبوا النعمة, مثلا: هم اول ماخطبوني قالوا لامي ان لي

الخيار اني اسكن في احد بيوتهم "الملك", هم عندهم بيتين , وهم ساكنين في الدور العلوي لاحد البيتين, اتفقنا انا

وزوجي اننا نسكن في البيت الثاني ,,,وخلاص

طبعا لحد هنا الامور منطقية,,البيوت هي ورث من ابوهم, وهم مأجرين البيتين ويستلموا كمان معاش الوالد " المتوفى"

رحمه الله,,

قريب الزواج امه خرجت المستأجر من البيت الثاني على اساس تفضيه لابنها "زوجي", لكن اللي حصل شي ثاني:(

البيت كان يتطلب تصليحات كثيييير " من وجهة نظر امه" وزوجي قال انه بيصلحه بعد مايسكن فيه مع الوقت,,لكن

مارضوا,,امه جلست تصلح البيت وتقول انها استدانت من الناس وعلوا السور وغيروا البلاط ووووو

طبعا اللي يقرا كلامي بيفكر انه هذا كله عشان ابنها لكن للأسف,,اكتشف زوجي انهم بيأجروا البيت على اساس يسددوا

ديون التصليحات!!!!!!!!!

بعد محاولات ومجادلات "خصوصا ان الزواج قريب " والراتب مايكفي ان نحن نستأجر وصلوا لاتفاق انهم يعطوه

جزء من الايجار على اساس نستأجر بيت ثاني,,وهذا اللي حصل....

استأجرنا بيت في نهاية رمضان وكان المفروض انهم يدفعوا حق شهرين لكن امه اتهربت!!

جا العرس ونحن على الحديدة والمستأجر يطالب بالايجار ويوم الصبحية كلم امه ورفضت تعطيه على اساس انها تسدد

الدين وزعل منها بس كان معانا مبلغ من هدايا العرس دفعناه للايجار:(

الان زوجي مديون بمبلغ كبير بسبب تأثيث البيت وغيره وغيره,,وامه مو راضية تجيب اي ريال,,مع ان الفلوس اللي

يستلموها من الايجارات والمعاش هي الفروض انها من ورث ابوهم,,وهو واخوانه والله عايشين في بيتهم عيشة فقر

وهي بخيلة جدا بشهادة الجميع وعايشة عيشة الفقراء بس عشان توفر..قلت لزوجي بعد تردد ان هذي فلوس ميراثكم

وابوكم تعب واشتغل عشان يوفر لكم وتعيشوا حياة كريمة..

طبعا ماقلت لكم اني موظفة لكن راتبي لاهلي لان مافي احد يصرف عليهم غيري وانا دارية ان امه تريدني اني اصرف

على الايجار,,والله العالم اني ساعدت زوجي من ايام العقد واشتريت الاجهزة والديوان وووو وكله من ورا امي بس

عشان اوقف مع زوجي ووالله ما اقدر اني اساعده اكثر من كدة وطبعا هو لمح لي اني اساعده لكن مو معقولة اني

اشتغل طول اليوم واقتر على اهلي عشان امه تحوش الفلوس!!

ماقلت لكم!!

مرة كنا عندهم في رمضان وامه نادت اختي ودخلتها غرفتها وطلعت مفتاح معلقاه في رقبتها وفتحت الدولاب وخرجت

فلووووووووس اكوام اكوام على اساس انها تاخذ منها خمسمية ريال,,ومادري ليش دخلت اختي معاها كأنها تريد

تغيظني انها معاها فلوس!!

مدري يمكن كلامي ملخبط بس والله من القهر,,والله ماتهنيت بزواجي ونحن شايلين هم الديون وكمان هم الايجار

قلت له يكلم امه لكن اخر مرة كلمها اتنرفز وعصب وهو مايريد يزعل امه!!

طيب ايش الحل؟؟

هل لو كلمت امي يكون شي صح وللا لا؟؟



ساعدوني وقولوا لي ايش حتعملوا لو انتوا مكاني؟؟