السلام عليكم و رحمة الله و بركاته....
دخلتن موضوعي لتعرفن فضيحتي صح؟؟؟ اسمعن اقعدن اقعدن احكيلكن شو القصة
و ادي فنجان قهوة يعدل دماغكم صح لحتى تستوعبوني صح
كم منا بتستلم الراتب
و على السوق طيران و بترجع البيت ايد ورا و ايد قدام ما فيش الا كيس من ميسيز او سيفورا و الفلوس بح ما تبقى منها شي و الثلاجة فاضية, يجي زوجك :arb:
هاة يا حرمة شو طبختي لنا اليوم؟؟؟
انتي:
و الله ما بعرف شو حتجيب لنا نتعشى من برة؟؟؟
زوجك:
شو من برة؟؟؟؟ ما فيش شي بالثلاجة؟؟؟ (فتح الثلاجة واو ما فيها غير كم قنينة ماء) اوه لسه ما رحتي اتقضيتي؟؟؟
انتي:
لأ رحت, بس الفلوس ما كفت.
زوجك:
كيف ما كفت؟؟؟؟؟
انتي:
شريت كذا و كذا لي و ما بقى معي غير كم دولار حتى عيني طاحت على الروج الفلاني و ما قدرت اجيبه....
زوجك:
(ما في كلام, وي وي وي وي وي وي وي وي جبتي الاسعاف :icon28:)
موضوعي عبارة عن تجربة يا بتصيب يا بتخيب, ان شاء الله بتصيب لاني بعملها كل اسبوع.
التجربة هي: شهر كامل في تدبير الميزانية, اسبوع ينطح اسبوع, يوم ينطح يوم.
و المبلغ؟؟؟؟ قد يصل الى 800 دولار بالشهر الواحد بس مش اكثر.
او 100 الى 200 دولار بالاسبوع (على حسب ميزانية الاسبوع).
زوجي و انا خصصنا من راتبه كل اسبوع ما بين ال100 و ال200 (بالصيف بتوصل ل300 لكن هلأ شتوية و الميزانية ما بتحمل), ادبر حالي فيهم بالبيت من اكل و شرب و ادوات صحية و بنزين سيارة.
عم دور على كلام اكتبه كمقدمة مش طالع معي حكي ما في الا اكتب و امسح... لهيك بدون مقدمات... الموضوع للفائدة, افيدكم و تفيدوني اذا كنت تايهة عن شي...
و برضه الموضوع اهداء للاخت "ام الامورات" اللي سبق طرحت سؤال تدبير الميزانية ب1000 دولار بالشهر و محتارة فيهم...
و بنصح الجميع يلقي نظرة على موضوع الميزانية لعل احداكن تجد فيه الفائدة
تدبير الميزانيه في الغربه ..شاركي بتجربتك - منتديات عالم حواء
ان شاء الله تستفديوا من الموضوعين و لو بكلمة.
عائلتي 4 اشخاص, 2 كبار و 2 فتافيت...
بالنسبة للطبخ, من يوم الاثنين ليوم الجمعة, اولادي بيفطروا فطور سريع, مع انه المدرسة فيها فطور بس ما بضمن انه بنتي تاكل منه شي خصوصا السيريال <<< كله سكر و حكي فاضي.
غداء ما في غيري بالبيت, و عشاء العيلة بالليلة.
يوم الجمعة: العشاء عند اهلي << مرتاحة من الطبخ يومها لكن بعمل حلويات 80 بالمية من الاوقات.
يوم السبت: فطور بالبيت, غداء بايت, عشاء خارج البيت على حساب زوجي <<< ما اله علاقة بالميزانية.
يوم الاحد: فطور و غداء و عشاء >>> اليوم الوحيد اللي فيه 3 وجبات لكل العيلة سوى.
كل اسبوع اجباري: ملوخية... طبخة ببندورة مثلا بازيلا, بامية, خضار مشكل... صينية سواء دجاج او لحمة... ايا شي بلبن مرة كل اسبوعين (مثلا منسف مطفية معكرونة)... معجنات مرة كل اسبوعين..
بيتز او معكرونة على الاقل مرة بالاسبوع.
والباقي على حسب المزاج و الطلبات... بحاول يوم يكون مخصوص لطلبات الاولاد, يعني ان حبوا تاكوز او سلوبي جوز او بيتزا او ايا شي يخطر ببالهم << بنتي دايما بتطلب منسف ههههههههه
يبدأ اسبوعي بيوم الاحد, اللي كان امبارح...
ميزانية الاسبوع: 160$
اول شي عملته: لفيت البيت خزانة خزانة, حمام حمام (و انتوا بكرامه) اشوف شو ناقص من ادوات صحية... لحتى اجيبها, و سجلتها على النوتة و جلست مع نفسي و النوته احاول اتنبأ اسعار الحاجات و اكتب لنفسي سعر تقريبي AND LIMIT MYSELF و احد نفسي بهالسعر, بمعني احاول ما ادفع ايا نكله زيادة.
اول شي كانت الاغراض اللي من ولمرت <<< مع اني بكره هالمحل لكنه للاسف ارخص محل لهالاشياء.
ملاحظين اني حديت نفسي لولمرت ب31 دولار, و في نفسي قلت يمكن اكون غلطانة شوي بالاسعار فحيكون لحد 35 دولار فقط.
في الصورة الثانية الاغراض اللي محتاجتها من سالي بيوتي سبلاي, VI يعني فيري امبورتانت <<< ضروري ضروري ما في مجال استغني عنه.
و كتبت سعر تخميني للاغراض من ولمرت + اغراض سالي ب56 و براسي قلت ان وصلوا ل60 اوكي <<< بيتبقى معي 100 للاكل صبابا.
و هون كتبت خطة عشاء الليلة
و كان زوجي طالب مني صينية دجاج ببطاطا (ما عندي الاثنين) و نويت اعمل معاها ذرة و حمص (الذرة عندي علبة و نويت اجيب كمان علبة باذن الله)
و باعلى النوتة اتذكرت انه ناقص معجون اسنان و زيت
اتسهلت بطريقي و اول محطة كانت سالي بيوتي سبلاي, لحتى اشوف التخفيض عندهم و يمكن اقدر اوفر دولار هون و لا هون ليش لأ...
لقيت الشامبو و الكونديشنر على التخفيض ال2 ب14 دولار, العلب كبيرة و بتكمل عندي شهر و شوي
هلأ براسي بحسب, صرفت 15 من 60, يعني معي ميزانية ابو 45 دولار لولمرت ممتاز جدا.
رحت ولمرت و بدأت اجيب الاغراض, اتصلوا علي من البيت و قالوا ناقص ماء ما بتستنى لبكرة فجبتها...
و اتذكرت كم شغلة زيادة و برضه اضفتها للعربة (و انا بصور و انا ماشية وقع تلفوني مرتين و اختربت الكميرا و حالة بس عملت ريستارت للتلفون و لقطت صورة و انا بحاسب).
ملاحظين معي شو الزايد؟؟؟؟ اكياس الزيب لوك, محارم الفاين, الباونس, القصدير, الكلوركس للحمامات, ليفة الجلي و الاناناس لبنتي للمدرسة...
في نفس الوقت خففت من الليست, مثلا الصابونة بدل ما اجيب اللي فيها 6 حبات جبت اللي فيها حبتين بس مع انه ام ال6 ب6 دولار و شوية و ام الحبتين ب3 و شوية و طلعت دافعة فيهن اكثر بس لاني مضطرة و هالحبتين بيعيشوا عنا شي اسبوعين زمان مخلاص برتاح من الصابون لوقتها...
و شلت من القائمة: الويند اكس لانه موجود عندي بيكفيني للاسبوع اللي جاي << لحتى اقدر اضيف مكانه من الاضافات اللي كتبتها.
و الاوكسي كلين لقيته فوق ال5 دولار و قلت بلا منه هالاسبوع....