انا الحين عمري 22 سنه ومتزوجه وهذا زواجي الثاني والزواج الاول تزوجته وعمري 17 يعني بزره بالعربي وحملت علطول وولدت وعمري 18 سنه وفي زواجي الاول كثيره مشاكلي مع زوجي ومو علشانه عصبي بالعكس علشانه بارد جدا يعني ما كان يهتم للبيت ولا للصرفيه علي لدرجة اني كنت بالشهر الثامن كان يطلع يسهر برا والثلاجه فاضيه(انا ما اشكي لكم الحين علشان تكرهون الزواج بالعكس بس اشكي لكم علشان تسمعون كلام الناس عني)المهم وكان يتركني عند اهلي بالاسابيع وبالشهور لدرجة انها توصل 5 شهور متواصله وبدون سبب..زعلت عند اهلي مره ومرتين وثلاث بس ما فيه فايده الين قررت الطلاق بعد موقف صار منه والموقف اني قلت له ابروح ازور اهلي وقال توك جايه من جدتك قلت جدتي مو امي ووداني عند اهلي عادي المهم جلست يومين ثلالث اسبوع ودقيت عليه قلت تعال خذني قال بعدين وادق ثانيه ويسكرها بوجهي وثالثه..
قلت لامي والله مالي رجعه له لو يموت ..وانا اول كنت ارجع علشان دموع امي الله يخليها لي ..هالمره قررت الانفصال ..
تحسبونه دق ولا سال جلس سبع شهور لا اتصال ولا مصروف ولا حتى يسال عن ولده..المهم صار يسال بس ببرود وانا على رايي وطلب يرجعني وهو عارف انه غلطان وجاء يتاسف ..اقنعتني امي ارجع هي وجدتي الله يرحمها ..ووافقت وعيوني ما توقف صياح لاني كارهه ارجع له
ووافقت ارجع بشروطي اني اكون بلحالي وقريبه شقتي عند اهلي ..وافق وراحت امي معه تدور شقه واستقر رايهم على وحده..المهم بعد كم يوم اختفى لا علم ولا خبر ورجع بعد ثلاث شهور ودق الجرس سألتني امي وش اقوله قلت قولي ما تبي ترجع..وامي وافقتني الراي لانها تاكدت ان ما فيه منه فايده..قال لامي كان عندي ظروف.. بالله يا بنات وش هالظروف اللي تخليه ينقطع هالمده بدون ما يرسل لنا مصروف ولا حتى اعتذار ان عنده ظروف خلته ينقطع ثلاث شهور؟؟؟؟
المهم بعد ما كلمته قلت له خلاص انا ما ابغى ارجع وكل واحد يروح في سبيله..
توقعو وش قال..

قال رجعي لي مهري وحق اثاث الشقه ؟؟؟؟؟؟؟تعقل هذي
المهم سكرت الخط
وجلست عند اهلي ثلاث سنوات لاني مطلقه ولا متزوجه
والناس هاك يا كلام
رجعت ولا ما رجعت,,
ليه ماترجع بس ,,
ورا ما تتعوذ من الشيطان ,,
مسيكينه توها صغيره؟؟
وكل ما صار جمعه وين اللي ماخذه من الفلاني.... وليه هو زوجها وش فيه؟؟
واللي يقول لو اني من اخوانها ارجعها غصب!!؟؟؟
الناس يحسبوني اتدلع وما ابيه علشان حالته الماديه .. وانا والله ما تهمني الماديات .. وكل من شافني ورا ماترجعين,, ويقنعون امي الين صرت ما اقابل الناس وصارو في هالوقت يقولون وين فلانه ليه ما تنزل ؟؟
الين طقت كبدي وصرت اروح لابوي واصيح عنده تكفى طلقني منه,, ابوي ما كان معارض من اول بس ما بيده حيله وما قصر كلم ابوه وكلمه اكثر من مره ..وابوي كبير في السن واخواني صغار...الين ابوي كلم ولد عمتي وهو محامي وصار كلام بين الطرفين وطلقني وارتحت نفسيا وانخطبت ثانيه وتزوجت والحمد لله مبسوطه في زواجي الا شي واحد منغص علي وهو بعد ولدي عني هو ساكن مع اهلي بالرياض وانا بالدمام..الله يحفظه ويكبره ويصلحه ....وهذي سالفتي ..اتمنى اني ما ادوشتكم :42:
انا ما قلت سالفتي الا علشان تهون سالفة miss واللي مثلها ويهونون عن نفسهم ويطنشون كلام الناس اللي ما منه فايده..
واسفه على الاطله..

ما شاء الله عليك اخت نونو وبس
صبرتي ونلتي الله يوفقك ويسعدك ويقرب لك ابنك وتقر عينك بشوفته إن شاء الله
ونسالكم الدعاء