جبت لكن هالمقلب ,, وبعدين راجعة ان شاء الله للردود ..
الجمعة الي فاتت كنا مخططين نطلع بغدانا للحديقة الي حولنا ..
قام زوجي متأخر ولا أفطر على أساس يبي يروح لصلاة الجمعة ..
رحت أنا مجهزة أغراض الطلعة وملبسة بناتي ..
وأول ما جاء من الصلاة قال جاهزين؟
قلت بثقة : أكيد !! والنية كانت مغشوشة !! :30:
طلعنا للحديقة وراحن بناتي يلعبن .. وأنا طلعت القهوة وجلست اتقهوى أنا واياه ..
بعد فترة بدت عصافير بطنه تزقزق !! فقال : حطي الغداء ,, ماش جعنا !
أنا هاك اللحظة قلت : هاااااااااه ؟ وش غداااااه ؟!
ناظرني بعين مستشكة ! وقال : وشلون وش غداه ؟ غدانا .. حطي غدانا جعنا !!
قلت : هاااه .. طيب .. طيب .. الحين أحطه !
رحت طلعت حافظة من سلة الاغراض .. وفرشت السماط وحطيتها بالوسط ..
قلت له تعال أصب عليك ماء تغسل ايدينك ! وجبت له الصابون ! <<<< كله ترتيب للصدمة المعتبرة !
ويوم غسل ونشف يدينه ما صبر لي لما افتح الحافظة ! فتحها هو من شدة الجوع !!
وانصدم يوم لقاني ماليتها كيك مقطعته شرايح !!!!!! <<<<<<< ما يواطن الكيك بعيشة الله !!! :09:
هو تفاجأ وكع من الصدمة وارجع على ورى !! وظهرت علامات الغضب على سحنته وملامحه الصارمة !!!!! :eek:
وقال بنبرة حادة ( شوي ويكفخني ) !! : وشذا ؟! وين غدانا ؟؟؟؟؟؟؟
رحت أنا عاد تمسكنت وصرت أتكلم بنبرة أسف وصوت منخفض كأني ميته من الفشيله : الوقت كان ضيق بصراحة .. معك علم نهار الجمعة يطير طيران ! ويالله أمدان أسوي كيك !
قال وهو مولع : مكلفة نفسك بالحيل على هالكيك ! كان سويت كيكتين والا ثلاث أحسن شوي !! أنت ما تستحين تقولين هالهرج لرجلك ؟!!!
قلت بأعصااااب بااااردة : ليييييييييه ؟ وش فيه الكيك ؟مو نعمة من ربي؟؟؟
قال : نعمة .. نعمة .. بس مهب غدا ياماااال الغدة !!!
نطيت بحلقه وأنا اقول : استغفر .. استغفر ربك .. تسيف الرجال تسذا ؟ ينسون كل الي نسويه عشانهم بلحظة غضب ما تستاهل !!
ومبالغة في حبكة الدور وضبط التمثيل : سويت نفسي زعلت ومديت البوز وصرت أنتر نتر وأجدع كلام يمين ويسار !! : عاد لهالدرجة ؟ تاصل انك تدعي علي بس عشان ما اعجبك الغداء !!! <<<<< مصرة ان الكيك غداء أبواحنه وأرفع ضغطه !! :hahaha:
حمق زيادة وولع وقال : تهني بغداك لحالك يا متعلمة يالي تعرفين الاصول وحقوق الزوج !!
فقلت له : حقوق الزوج عاد حته وحدة ؟؟ ارفق علينا شوي ! وترانا ما قصرنا معك .. قايمين بحقوقك ومسوين غداك !
قام وهو يقول : الهرج أصلا معك ضايع !
قلت : وين تتروح ؟ <<<< لها وجه تسأل !
قال : ما عليك .. لك عين تسألين بعد ؟!!
قلت : ان كانك تبي تروح المطعم .. جب لنا معك !! <<<< ناويه تجيب له العصبي وتطير أبراج راسه !!!
:hahaha:
قال بتطنز : تغدي كيكتك يا أم كيكة !!
وأول ما عطاني ظهره وأبعد شوي عن الفرشة .. رحت طلعت المستخبي وفليت السماط الحقيقي وطلعت الحافظات الي مخفية معالمهن بوسط شنطة أطفال كبيرة حتى ما يحس أبدا ولا تحدثه نفسه بشيء!!!
وعلى طول دقيت عليه جوال وهو يشغل السيارة وما بعد حرك ..
وقلت له : تعال بسرعة !
قال : وش تبين ؟ <<<< قالها بزعل ونترة !
قلت : تعال شف .. تكفى تعال بسرعة .. وبعدين رح للي تبي !
ما عطيته أي فرصة يسأل ..
وشوي الا هو مقبل علي بالفرشة .. وانصدم بالجديد في الصورة الي ما كان موجود قبل يروح !
كان باين على شكله وهو مقبل على المكان ان الشك بدأ يدخله !!
وأول ما وصل وتفاجأ بالأكل الي يحبه ويفضله على غيره ! نساه الجوع كل ردة الفعل السابقة وتربع بالجلسة وسمى وبدا ياكل من غير ما ينتظرني ! وهو يقول : حسبي الله على عدوك .. ما تجوزين عن سواياك وإجرامك !!!
بصراحة أنا كنت محسة الظن فيه وما تخيلت انه وهو يآكل كان يفكر بمقلب يسويه بي ويرد اعتباره !!
لذلك أخذت الأمر ببساطة وغرني اني دايم آخذ احتياطاتي وانه ما عمره قدر علي !!
كان مواعدني العصرية يوديني السوق .. وفعلا راح بي للسوق ونزلت وراح هو لشغله .. ولأول مرة يحرص قوووة على أنه يحدد لي زمان ومكان العودة !
قال بعد صلاة المغرب مباشرة ألقاك عند هالبوابة ! تراي ماناب متصل .. اطلعي بالدقيقة والثانية !
كنت أبي أغراض كثيرة فركظت ركض حتى يمدين ألحق ..
وأول ما بديت من سوء حظي بستي ماكس ! ( المحل كبير وأنا مسكت لي عربة وأنوااااع التجميع والقشقشة ) !!
ما خلصت ولا عندي نية ! لكن اظطريت أروح أحاسب حتى يمديني ألحق على باقي المحلات الي أبيها ضروري !!
ووقفت عند الكاشير وبدأ يحسب أغراضي ..
وأنا من زين النفس بعد أقول له : اسرع أنا مستعجلة !!
قال لي : 425 ريال ..
طلعت المحفظة أدور فلوس ..... ماكو !!!
رجعت أدور بطاقة الصراف ..... برضه ماكو !!!!
ضاااااع وجهي عند الكاشير !! وقلت له : خلي أغراضي على جنب .. ما حصلت البطاقة .. ابدورها على جنب !!
واروح على جنب وادور أدور بدون فايدة ... !!
جاء في بالي ان زوجي احتاجها وطلعها ونسى يرجعها فقلت لنفسي : دقي بالجوال اسأليه والا خليه ينقذك من الموقف !
دورت الجوال . . . مني منااااك !! ما كو جوااال !!!!
الا وأنا اتذكر بهاللحظة ابتسامته الشيطانية وهو قاعد يتغدى ويسارقني النظر !! كأنه قاعد يتخيل نفسه وهو يتشمت فيني عقب هالموقف !!
ففهمت الوضع !!وأدركت ما أنا فيه من موقف متقفل !!
قلت للمحاسب : خلي أغراضي لبعد المغرب .. وطلعت أدوج بالسوق وعييناتي تبز !!!!! <<<<< توي أحس من جد بمعاناة المحرومين الي يتفرجون ولا بايدهم قرش!!! :(
طبعا مالي حيلة أروح ولا أتصل ولا شي !!
ما لي الا اني أنطق وانتظر لما بعد المغرب حتى يشرف سي السيد !! :arb:
الا وذيك الفكرة الجهنمية الي تطب علي وتفلقني من زينها !!!! :30:
دخلت محل واستأذنت وطلبت التليفون ودقيت على بيت أهلي وقلت لأمي ترسل لي فلوس سلف مع ولد أخوي على وجه السرعة لأني نسيت بطاقتي والوقت ضيق وزوجي مو فاضي يرجعني السوق مرة ثانية !!!
والوالدة ما قصرت خلت ولد اخوي يجيني عند بوابة محددة بسرعة البرق !!
رحت وشريت أضعاف الاغراض الي كنت مجمعتهم من ستي ماكس !! بس حتى أكيد زوجي إذا رجع لي وشاف مقلبه ماله أي أثر !!! خخخخخخخخخخخخخخ كيد نسوان !! :hahaha:
وأول ما جاء بعد المغرب ركبت السيارة ومن زود الكيد قعدت أسولف عاااادي ما كأنه صاير لي موقف !!!
هو كان محتااار قووووة وشلون جمعت هالمقاضي وهو منظف المحفظة تماما حتى يحرجني بالسوق ! لكن ما وده يسأل بشكل مباشر !! بس كان باين بوجهه انه متعجب قوووة !
فقال كأنه يسولف يبي يفتح باب السالفة : عساك شريت كل الي تبين ؟
أنا ما ضاقت علي الحيلة .. فقلت : ايييه .. الحمد لله ما توقعت الوقت يكفي بس ربي مبارك لي فما خليت شي ابيه ما شريته !!! <<<<<< تدق بقوووة على فشل مقلبه من زود المكر !!
هو هنا ما صبر .. قال : وكفت فلوسك ؟ <<<< يبيني أهرج بالتفصيل !
بس أنا حيالة .. قلت : أكييييد ! وسكت !!
هو هنا ما صبر .. فطلع بطاقتي وجوالي .. وقال : وشلون شريت وذولي معي ؟!!
قلت له بكيد : أهل الخير ما يقصرون !!
عيونه طلعت من مكانها وهو يسأل : وشلون ؟ وكيف ؟ ووووو
ويوم طلعت روحه علمته بالسالفة !!!
وقتها ضحك ضحك عمره ما ضحك زييه .. وقال : حسبي الله على عدوك ... دايم دايم متحصنه ضد المقالب !! هو أنت تآخذين مضاد ؟!
بيني وبينكم ودي أحيانا أمرر بعض مقالبه حتى يحس بنشوة النصر علي ..!! بس النفس الشريرة تأبى علي ذلك !!!
جبت لكن هالمقلب ,, وبعدين راجعة ان شاء الله للردود ..
الجمعة الي فاتت كنا مخططين نطلع بغدانا...
تراني اتعلم منك انا على وش زواج ههههههههههههههههه