ذكرتيني بفتره صعبه مريت فيها
فجأه صار يجيني خوف من الموت
خاصه لما انام احس بينقطع نفسي واموت وخوفي هذا يسبب لي حالة قلق ودقات قلب سريعه وذعر واذا نمت اصحى مفزوعه
اي تعب احس فيه اقول بموت
اذكر مره كنت بالسياره وكنا بنسافر للبحرين وماهي اول مره نروح البحرين كثير رحنا وجينا من احنا صغار
يومها جاني قلق ورعشه ودقات قلبي سريعه وانا بالسياره مابقى سورة بالقرآن حافظتها ماقرأتها ولا دعاء واستغفار و زاد الخوف لما وصلنا الجسر طول الطريق اتخيل انه بينهدم بأي لحظه او بيهيج البحر علينا ويغرقنا لدرجة انه حتى لما خلصنا الجسر واخذنا شقه طول الليل ماقدرت انام مثل الخلق افكر انه بيصير تسونامي على البحرين ونغرق ونموت واتخيل كيف اختنق وانا تحت المويه
بعدين طلعنا من البحرين ورجعنا السعوديه يوم ومشينا قطر يومها خلاص ابتدا التعب على جسمي وبديت احس بألام في بطني وطول السفره مريضه وطبعاً ماحد يدري عن شي وماطلعت ولا رحت وجيت بحجه بطني
بعد فتره لما رجعنا زاد الخوف لدرجه اني بديت احس بتنميل وتعب بجسمي وضيق نفس والله اني استقبل القبله واتشهد وانا ابكي بمعنى خلاص استسلمت وسلمت امري لربي وبداخلي اقول اذا بيجيني ملك الموت ياخذ روحي خلاص ماراح اقدر اسوي شي ولا امنعه خليه ياخذ روحي
وبعدين هديت واشوف نفسي عايشه فكرت انه كل انسان له يوم وكلنا بنموت واذا انا اعبد ربي واعمل الخير المفروض ما اخاف وتعوذت من الشيطان وتذكرت انه الشيطان يسعد بحزني وهو اللي يوسوس لي وانا ضحيه الوساوس اللي لعبت فيني
من يومها صرت قويه واذا جاني هذا الاحساس احاول اتجاهله وافكر بشي ثاني
وصحيح بين فتره وفتره يجيني خوف من بلع الاكل برضو احاول اتغلب عليه واهدي نفسي من التوتر لانه يزيده
الحل للوساوس والخوف انك تواجهينها وتقنعين نفسك انها من الشيطان وتعوذي منه وتجاهلي الفكره كامله فكري بشي ثاني حلو وسعيد
الاصنصير والطياره والسياره وغيرها توكلي على الله واستغفري وخليك مؤمنه بالله وهو خير الحافظين وتذكري انه ملايين من الناس تركبها وتستخدمها مانتي اول وحده وماصار لهم شي وكل شي مقدر واحنا علينا بس ندعي الله يحفظنا
معليش طولت بس حبيت اشارككم بالحاله اللي مريت فيها وتخطيتها
الصفحة الأخيرة
بس الطيارة واو عذاب يازينها