السلام عليكم ورحمه الله وبركاته
اخواتى الفاضلات بجد املى فيكوا بعد الله انى الاقى معاكوا حل لمشكلتى ابدأ احكيلكوا
انا من اسره متوسطه يتيمه الاب والام ولى 3 اخوات بنات متزوجات وانا منتقبه وملتزمه جدا تزوجت منذ عام وشهرين وكان عمرى 22 عام وزوجى يكبرنى بعامين فقط
ظهر زوجى فى الاول بمظهر التدين هو وامه لكن وللاسف فوجئت بعد الزواج بالحقيقه انا للاسف تزوجت فى بيت عائله يعنى حماتى وبنتها تحت منى وانا فى الدور اللى فوقهم واجاركم الله من اللى عملوه فيا
اولا انا من المدينه وتزوجت فى ارياف حماتى من اول اسبوع عاوزانى انزلل اكنس لها وامسح لها واقعد معاها يوميا بالساعات والت واعجن واشتغل فى الغيبه والنميمه وعاوزه تعرف كل حاجه عنى بعد زواجى بشهر وجدت زوجى (ألشيخ امام المسجد يدخل على مواقع جنسيه من ورائى )على العلم انى تزوجته على انه طالب للعلم الشرعى وهو امام وخطيب بمسجد وحافظ لكتاب الله وملتحى
انهرت وكدت اموت ولكن وعدنى بعد مااكتشفت فعلته وصارحته انه لن يفعلها ثانى وان الشيطان شاطر سامحته ولم احكى لحد لكن بعدها باسبوعين اكتشفت الامر مجددا ساعتها بقى حاولت انزل غضبانه لاهلى فامه قالتلى ايه اللى حصل فالباشا زوجى حكالها تصوروا رردت قالت ايه قالتلى وايه يعنى تلاقيه بيعمل كده عشان يمتعك وقالتلى لو قلتى لحد هنكد عليكى عيشتك وتتغلطى وهننكر انه عمل كده وتتطلقى فيها
وهكذا استمر الحال كل شويه يبهدلنى ويضربنى وهى كذلك وارجع تانى له البيت يعنى فى خلال سنه جواز غضبت عند اهلى 5 مرات
ادخل بقى فى سبب الخناقه الاخير
زوجى عمل تحليل سائل منوى فوجد نفسه عنده مشاكل كبيره تمنعه من الانجاب وان الموضوع هياخد وقت من العلاج والعمليات وهذا طبعا بعد ان لفيت انا قبله على كل الدكاتره وامه قعدت تقولى نوديكى تتخضى فى الترب عشان تخلفى وعاوزانى اعمل حاجات تغضب الله
المهم جاء عليهم الخبر كالصاعقه ان العيب من ابنهم
وهذا ايضا بجانب انه بخيل جدا يعطينى مصروف بيت 200 جنيه مع العلم ان دخله مع الدروس يتعدى الف جنيه
وانا كان معاش ابى يأتينى قبل زواجى اكتر من الف ايضا
بعدها بدأ زوجى يوميا يضربنى على اتفه الاسباب وطبعا ماكنتش بحكى لحد من اعمامى عشان محسسش زوجى انى بنفر منه بسبب انه مش بيخلف وكنت بستحمله بل بالعكس اظهر له ضعفى اكتر واكتر لحد ما فاض بيا وبدأت انادى ابوه وامه ليروا ما يفعله بى واريهم علامات الزرقان وعلامات الضرب بجسمى واقول لهم انتم ابوى وامى هاتولى حقه منى وامنعوه من ضربى
امه كانت زى ما تقولوا بتفرح مع انى والله وصل الامر ببرى بها الى انى كنت اقعد تحت رجلها و احطلها رجلها فى ميه سخنه وادعكهلها بالحجر
الوليه كانت بتفرحاما بيضربنى من الغل اللى فيها منى
اخر مره بقى شهدتها على ابنها لانه طول اليوم بقى بيلعب جيمز ويدخل على مواقع الكوره والهيافات وكان يجعلنى انام ويفتح المواقع الجنسيه وعشان مااكتشفشش كان ينزل ويندوز جديد مرتين فى الاسبوع
(ناصح اوى
مع العلم انى واخداه على انه طالب للعلم الشرعى وهو امام وخطيب بمسجد وحافظ لكتاب الله وملتحى وقلتلها قوليله عيب متضربش مراتك لانها بنت ناس راحت باصه لابنها وقالتله ما تبقاش تتضربها بس عشان انت محترم وابن ناس شوفتوا قلهه الادب وقعدوا يهرجوا هو وامه واختو ويتريقوا عليا وانا بعيط بعد ما نزلوا قعد يبوس ايدى ويقلى معلش مش هضربك تانى للمره الميه وبرضوا يضربنى
تانى يوم كنت عازمه اخواتى عندى المهم غاروا جدا وقعدوا يقولوله بتعزم اخواتها ليه انت ازاى توافق المهم بعد ما مشيوا زوجى فضل قاعد عند حماتى تحت فرنتله يطلع عشان عاوزاه راح قالى بسسسسسسس يا بنت انتى هطلعلك بعدين مش فاضيلك (ِشوفوا ازاى بيحب يبين قدامهم انه راجل بقى مع انه اعتزرلى امبارح)
طبعا انا كنت هموت من الغيظ بعدها بنص ساعه رنيت له تانى رد بنفس الاسلوب بل افظع
بينى وبينكم انا اتغاظت
المهم جه يطلع بعد ساعتين قلت مش هافتحله على طول هسيبه دقيقتين ع الباب ماهوه مفيش فى ايدى الا الحاجات الهايفه دى
المهم اول ما مفتحتش الباب فى دقيقه قعد يرزع ع الباب وراحت امه شتمتنى من تحت قالتلى انتى مش تربيه رجاله
رحت فتحت فطلع ابوه(ابوه ده بيتضرب من مراته بالشلوت امام عيينى وبتتف عليه وتشتمه)
المهم بقله يا عمى شفت عمل فيا ايه راح زوجى نزل عليا على السلم ضرب بالاقلام امام ابوه وقالى روحى يلا انا هرميكى زى الكلبه روحى اقعدى عند حد من اخواتك واتزلى بلقمتك قلتله انا هقول لعمامى واعرفك انى ليا اهل بقى قالى انا ادوس عليكوا بالجذمه كلكوا
فطلعت الحيزبون امه تجرى تقوله وتصوت متغلطش فى حد رحت قايلالها طب انتى شتمتينى ليه وقلتى انى مش متربيه مع انى شهدتك على ضرب ابنك ليا ومقلتلهوش اتقى الله فيها قالتلى (انا بقى عاوزاه يضربك وانا كمان اضربك ورفعت ايدها على وجهى تريد ضربى لكن زوجها بعدها عنى)
وقعدت تسبنى بافظع الشتائم التى تمس التربيه ولكم ان تتصوروا ما قالته فهو كل ما يخطر ببالكم فقلت انا بقى عشان مش متربيه مش هاغلط فيكى بس انا ليا رب
وقعدت تقولى والله لأعيشك حزينه على حياتك طول عمرك
وتانى يوم ذهبت الى بيت ابى المتوفى لاجلس مع اخت لى هناك وزوجها يسافر ليس موجود معها دائما
ماذا افعل انا الان طالبه شقه بعيد عن اهله لكنى لما استخرت وجدت ان العيب اصلا وسبب المشاكل هو زوجى لانه لا يتقى الله وشخصيته ضعيفه تتصوروا جاى يتكلم مع عمامى يقول لهم عشان بنتكوا تعيش لازم تبوس راس امى وتقلها حقك عليا
انا الان يااخواتى خلاص طالبه الطلاق فهل انا على حق ام لا انا استخير الله وكل يوم اعلم ان الطلاق هو الحل او الخلع
muslima_indeed @muslima_indeed
عضوة نشيطة
يلزم عليك تسجيل الدخول أولًا لكتابة تعليق.
الاكليله
•
انت على حق لكن مشاكلك معاه بسبب قربه من اهله مع الاعتماد عليهم وعادته السيئة وعوامل نفسيه من الجهتين بسبب مشكلة الحمل هذا والله اعلم والله يوفقك يا اختي استخيري الله
جزاكم الله خيرا اختى الاكليله واختى دايت بيبسى
انا والله استخير الله منذ ان جئت هنا فى بيت اهلى بس خوفى هوه الوحده بعد الطلاق
اللى عندها تجربه فى الخلع تحكيلى وهل هياخد كده القايمه والشبكه ولا بياخد المؤخر بس
انا والله استخير الله منذ ان جئت هنا فى بيت اهلى بس خوفى هوه الوحده بعد الطلاق
اللى عندها تجربه فى الخلع تحكيلى وهل هياخد كده القايمه والشبكه ولا بياخد المؤخر بس
الصفحة الأخيرة
والله يعوضك خيير