عروس

سلامتك انا جوزى عنده جفاف العين دة برده وبياخد قطرة الدموع الصناعية والدكتور قاله ان البلاد الحارة اللى احنا فيها دى هى السبب ربنا يشفيكي ويشفيه يارب

ممكن بقى ماسك الكاكاو تانى بليز للبشرة

السلام عليكم ورحمة الله وبركاته

طبعا انتوا عارفين ان انا بحبكم كلكم بس برضه هقولكم تاني ( اشهد الله أني احببتكم كلكم في الله )

يبقي الوضع كما هو عليه لسه عامله اضراب كل واحد في حاله وعلي فكره انا حاسه كده أني مرتاحه اكتر

كل اخواتي وحبايبي ألي ردوا عليه والله انا جربت كل الي قولتوا عليه بس ممكن يكون جوزي عايز طولة صبر شويه ربنا يعين

المهم أني اخدت قرار أني اروح مصر اجازه اسبوعين اخلص فيهم ورق معين واظبط حاجات كتير وهفضل كده لحد مايوافق ادعولي

علي فكره انا جربت معاه التفاهم في الموضوع ده اكتر من مية مره يبقي مافيش غير الاسلوب ده

عروس يا حبيبتي الف سلامه عليكي شفاكي الله وعافاكي المعلومات الي روشانا كتبتهالك ان شاء الله تفيدك وقللي يا روحي من قعدة الكمبيوتر شويه علي الاقل مؤقتا لحد ما تتحسنس شويه ابقي طمنينا عليكي يا عروس المنتدي

ايمان ( ام سهيله ) بصي يا قمر البنات ما شاء الله قالولك ماوفي وكفي بس بحب ازيد واقولك ان احتسبي كل حاجه لوجه الله ولو كلمه زعلتك استقبليها ببرود وتحسسيها بده علشان ماتحسش انها بتعكنن عليكي وتعرف ان انتي واثقه في نفسك وكمان لما تروحي هناك خليكي هاديه وودوده وواثقه من نفسك جدا وساعدي في كل حاجه بسسسسسسس ماتتكلميش كتير ده ضروري وخليكي دايما مبتسمه علشان مايقولوش انك رايحه مبوزه وولا يهمك ياما بيحصل اكتر من كده تصدقي اني قريت مره في المنتدي ان واحده حماتها بتقرف جوزها منها والراجل فعلا اتأثر يعني يا بنتي الدنيا ياما فيها ... الحمد لله علي كل حال ربنا يصلحلك الحال يارب

ناهد .... اولا واحشاني ياقمر فينك.. انا عارفه موضوع الورق والروتين والبيروقراطيه السخيفه معلش استخيري اولا وبعدين شوفي اقتراح لميا يارب يكون مناسب ليكي وينفع ولازم تطمنينا .... ربنا ييسرلك الامور يارب

مي ...... حبيبتي خلي بالك تحاميل الجلسرين اكبر غلط وممكن تنفع في الضروره القصوي بس هقولك انا جربت شاي البابونج بتاع ميلوبا فظييييع تعملي كل يوم رضعتين حتي لو مافيش امساك حلو اوي للهضم وملين طبيعي ... وميرسي يا قمر علي كلامك الحلو

كتكوته ... اولا استخيري وبعدين رأيي ان لو الايجار معقول يعني مش كتير كل شهر ماتسيبهاش وكملي محدش عارف الظروف لكن لو كتير لا شيلي عفشك في اي مكان مناسب واعملي جمعيه بتمن الايجار وتحويش لحد ماربنا يعين وتدفعي مقدم شقه ويبقي كده احسن .... ربنا يوسع علينا كلنا يارب ويخلي غربتنا بفايده ويصلحلنا الحال يارب كلنا

كنزي ... شكرا ياقمر ربنا يكرمك علي كلامك والف سلامه علي كوكي ابقي طمنينا عليها

امن سوسو ... والله يا ام سوسو بحبك وعل رأي رشا اسم علي مسمي طبعا كلامك بيساعدني كتير ربنا يكرمك يارب في جوزك وبناتك قوليلي مينا اخبارها ايه مع السنان رووما عندي يادوبك سنه ولسه ربنا يعينا

لميا ...... الصوره جامده موت انا حاسه أني انا الي في الصوره والايد الكبيره دي ايد جوزي هههههههههههههههه جت في وقتها

ام مريم ....... طبعا الحمد لله فكيت معاكي كتير النهارده يارب تكوني خلصتي المكواه الممله بيني وبينك انا بودي للمكوجي يعني كفايه أني بغسلهم ........ بصراحه مش بحب المكواه بتخنق

نانسي .... اهلا بيكي يا قمر مي بتقول انك مكسوف وعايزه تشجيع وانا اول واحده نانسيييييييي نانسييييييييييييييي اوه اوه

مين تاني خايفه اكون ناسيه حد اصلي الاب توب عندي لو قلبت الصفحه الكلام كله بيتمسح علي العموم بسلم علي كل البنات المختفيه واحده واحده
علي فكره بكره ان شاء الله هنكمل حفظ من بعد الايه 57 + الصفحتين الي بعدها وقدامنا الاسبوع كله وشكلي هسمعلكم بجد عشان الكسل والتزويغ

رشا ......... بصي ياقمر انا والله كل مره اعاتبه بهدوء ويسمع وبعدين ولا كأني قلت حاجه يعني كله تحصيل حاصل سيبك انا بحاول اجرب طريقه تانيه ادعيلي ... اخبار اللمض ألي عندك ايه وروان بوسيهملي

ميرو الف سلامه ياقمر علي الكتكوته ربنا يشفيها يارب وخلي بالك التطعيم ضروري لأخوها علشان العدوي ربنا يحفظهملك ويصلح الحال يارب

توته انتي مختفيه بقالك كتير طيب حتي سلمي وخلاص مش لازم رغي زي حالاتنا لو مش فاضيه

عطر الف سلامه عليكي عقبالي احسن كده بقالها اكتر من شهرين لا حس ولا خبر شكلي لازم اروح للدكتوره ... عليكي وعلي القرفه بالحليب

سبحانك اللهم وبحمدك اشهد ان لا اله الا انت استغفرك واتنوب اليك

السلام عليكم و رحمة الله و بركاته

ازيكم يا أحلى ستات بيوت شاطرين؟ وحشتوني من هنا لحد سنغافورة رايح جاي :32: معلش شاركت معاكم شوية و بعدين معرفتش اتابع بسبب ظروف كتير بس الحمد لله اني عرفت ادخل اطمن عليكم تاني

سامحوني معرفتش اقرا كل اللي فات و لا اتابع كل التطورات بس عالسريع كده لاحظت كام حاجة:

ميمزي ميوية السكرة، انتي بنتك لسه شهرين و نصف زي ما فهمت و طبيعي عند بعض الاطفال في السن ده حالة الامساك و الغازات و المغص. انا ابني مروان كان كده و كان مجنني و كنا مش بنتسغنى عن لبوس الجلسرين ده و لحد دلوقت عندي في التلاجة للطوارئ. بس فيه حاجة اكتر من دكتور اطفال قالوهالي و كمان موسوعة الفراشة منبهة عليها ان الطفل ميقعدش عنده امساك اكتر من 48 ساعة. و متقلقيش هي مش حتتعود على الاخراج بيها و لا حاجة لان هي فترة و بتعدي لما بتبدأ تاكل عادي. بالنسبة لعصير الببرتقال المخفف انا بدأته مع مروان من سن 3 شهور و مكنش في اي مشاكل و طالما الدكتور محدد لك كمية محددة متخافيش دي بتبقى بالمللي و محسوبة و كمان مخففة و ان شاء الله مفيش ضرر. صدقيني انا عديت بنفس اللي بتوصفيه مع مروان و كان عندي انهيار عصبي منه بس الحمد لله فعلا هي فترات كل شوية تشوفي حاجة و بعد كده كله بيعدي و يبقى تمام. و ان شاء الله تفرحي بيها عروسة زي القمر




شوفي يا ستي، انتي جيتي عالجرح لان انا حاعمل الشغلانة دي كمان كام يوم و شايلة همها. انا باخرن شوية في شنط فوق الدولاب و لو فيه حاجات حجمها كبير و تاخد حيز باكيسها كويس و احط معاها قطع صابون لوكس او كاماي او اي صابون ريحته حلوة او وحدات قرنفل و احطها في السندرة اللي تحت السرير

ام يوسف ، مش قادرة اقولك غير انك تبصي للحاجات الحلوة اللي في جوزك و اللي تعوضك عن اي تقصير بيعمله او اي اهمال او تجاهل غير مقصود لمشاعرك. و دايما عامليه بمبدأ انك تبدأي بالاحسان و تختمي برضه بالاحسان و دوري دايما على ثواب السماح و البدء بالصلح طالما مفيش لا قدر الله موقف كبير يستاهل وقفة جادة. ربنا يخليكم لبعض و يسخر قلبه ليكي و يحنن قلبه عليكي و على ولادكم و يهديكم

عروس النيل و شيماء و ام سوسو و منى و ميرو و كنزي و سما و ماما زوزو و ايمان كل البنات اسما اسما يا ريت محدش يزعل مني لو نسيت اسم، كلكم وحشتوني اوي اوي

تعالوا اقولكم يومياتي:

لاي واحدة عندها شوية رز ابيض بايت و مش بتفكر تعمله فتة او تكمل بيه على رز جديد، جربت حاجة النهارده مع ابني و الحمد لله عجبته و ناوية اعتمدها

سلقت نص كوباية صغيرة عدس بجبة و بعدين صفيته من المية و اخدت شوية في طاسة و حطيت عليهم شوية ملح و كمون و زيت زيتون و نقطتين عصير ليمون و بعدين قلبت معاهم نصف طماطماية مقطعة صغير اوي و علبها معلقتين من الرز البايت ده و قلبتهم كويس بقى طعمهم احلى من الكشري كمان و الحمد لله عجبوا مارو افندي :cook:

اسيبكم بقى لان الاستاذ مارو مزرجن و عاوزني العب معاه :04:

اشوفكم على خير