السلام عليكم و رحمه الله و بركاته على كل البنات يارب بصحة و عافية و سعادة

كلكم ما شاء الله بحس انكم بتحاولوا تطلعوا أفضل ما عندكم عشان الكل يستفيد و حتى ممكن تقولوا حاجات مش بتعملوها و لكن نفسك تتطبقوها و تلاقوا حد يشجعكم عليها

و فعلا أسال الله الذى جمعنا فى دنيا فانية ان يظلنا فى جنة قطوفها دانية آمينننننننننننننننننننننننننننننننننننننننننننننننننن

و ربنا يارب يتقبل منا و منكم صالح الأعمال
الجدول اللى حطاه إيمان ما شاء الله حلو اوى

انا شخصيا مش بحب اتكلم عن يومياتى الدينية خالص و بقول بس الحاجات العادية اللى بعملها

بس احب اقول حاجات كل يوم لازم يومك يتضمن الآتى : قراءة قرءان و طبعا الأولى الحفظ - استغفار و ذكر و أذكار الصباح و المساء او حتى اللى حفظاه منها - اتباع سنه فى اى حاجة و لو كانت حتى فى شرب الميه على ثلاث ( ما انتو كل شويه بتشربوا ميه )
و كمان امر بالمعروف او نهى عن المنكر و ليكن مثلا زمايلك فى الشغل لما الأذان يؤذن قوللهم قوموا صلوا يلا و كمان هتبقى دعوة الى الله
و اى حاجة بتعمليها بتكون لوجه الله و تربية لأولادك شكر للنعمة و جهاد فى سبيل الله انك مش عايزة منهم حاجة عايزاهم يكونوا مسلمين بجد و ينفعوا الأسلام

و طبعا زوجك اى حاجة بتعمليهاله تبقى ابتغاء مرضات الله و حسن التبعل

و طبعا شهريا لازم يكون فيه مبلغ محدد للصدقة بيبقى جميل جدا و اول ما تخدى المرتب او مصروف البيت بعد استئذان زوجك طلعى مبلغ للصدقة و ربنا يبارك فى ارزاقكم

و اوصيكم بالدعاء ثو الدعاء ثم الدعاء بجد يا بنات لازممممممممممممممم تدعوا جدااااااااا و كل صلاة لازم تسالى الله الجنة و تستعيذى من النار و تسالى الصحة و العافية و حسن الخاتمة ديه فرصة لازم مش تفوتيها بعد فترة هتلاقى بقى

الدعاء إدمان
القرءان هواية
و الطاعة أساس

و فى فكرة جميلة بخصوص موضوع الصدقة ده ناس كتير ممكن تعمله و تشارك فيه و يبقى ثوابة كبير
مثلا تعملوا مع اصحابكم او زمايلكم فى الشغل او الجيران أو اى حد تعرفوه جمعية لله و مثلا المبلغ الشهرى لكل فر 20 او 25 جنية و كل شهر تجمعوها و تعملوا بيها حاجة لله
مثلا زواج بنات ايتام - علاج مرضى- كراسى للمعوقين - تحطوا المبلغ فى قرض حسن للمحتاج - بناء مساجد - تجهيز مساجد - اطعام مسلمين - مبردات ميه - بناء مقابر للصدقة - توصيل مياه - شراء مصاحف و كتب لطلبة العلم

و طبعا كل موسم بيجى بتخصص المبلغ للمناسبة بتاعته

مثلا فى عيد الأضحى جزء من المبلغ يبقى افطار صائمين يوم عرفة - و الجزء التانى اضحية للمحتاجين و الفقراء
عيد الفطر بيبقى مثلا لشراء ملابس للايتام و الفقراء
رمضان ............... شنطة رمضان
و هكذا بس بتبقى جميلة يا بنات و مع الوقت بتكبر و ممكن مثلا لو بدئتوها و ليكن بتجميع 120 جنية بعد فترة هتلاقوها بقت فى الشهر بتلم 600 -700 جنية و طبع الدال على الخير كفاعله دون ان ينقص من اجورهم شيئا

اللهم اجعل عملنا كله خالصا لوجهك الكريم

اللهم استخدمنا و لا تستبدلنا يا ارحم الراحمين

السلام عليكم و رحمة الله و بركاتة

ما شاء الله الحماس رائع بجد و بيخلى الواحد يجتهد اكتر معاكم
شكرا لكل اللى رحبوا فيا و انا على فكرة متبعاكم من فترة

بالنسبة لاختى الغالية اللى طلبت منى احكى تفاصيل التزامى هقولك اهو بس اوعوا تزهقوا:27:

انا كنت زى ما قولتلكم بشتغل قبل ما اتجوز و كنت بلبس عادى جدا يعنى مش شيء ملفت و لا حاجة يعنى بنطلون جينز و علية اى قميص او جاكيت و سعات تيورات و بردوا ما تجوزت جبت كل حجاتى بناطيل و حجات دلع كدا
المهم حملت فى بنتى الاولى و كنت فاكرة انى بعد ما اخلف ممكن ارجع الشغل تانى لكن لقيت ان البيت فعلا محتاجنى
و كمان لقيت ان مرتبى مش فارق كتير يعنى دا انا هدخل بنصفة بنتى حضانة تكون كويسة و نصفة التانى مواصلات و فطار
قلت بلاها شغل00 خلينى اعمل اى حاجة خصوصا ان النت دلوقتى فية كل شيء تجارة 00 بيع و شراء 00 الخ
لقيت كتير بنات تاجرات ما شاء الله عليهم قلت احاول اعمل زيهم و الحمد لله قدرت واحدة واحدة اتعلم التجارة الالكترونية و قدرت اعمل منها دخل كويس يغنينى عن الخروج من البيت
و حملت فى ابنتى التانية و لقيت نفسى الحمد لله مواظبة على الصلاة و الدعاء للة عز و جل انوا يسرلى حجات كتير جدا فى حياتى يعنى الدخل اتحسن و جوزى مسك منصب اعلى و الحمد لله زوجى بيعاملنى بما يرضى الله
و كنت كتير جدا بحلم انى بقرا قران و اقوم منشرحة الصدر
قلت انا عايزة اخطو خطوة لله عز و جل تقربنى منة
و الحمد لله استغنييت كليا عن اللبس الضيق او البنطلون و نزلت جبت كدا كام عباية و اللى عجبونى كان لونهم اسود
و لما رحت لماما و بابا بيهم زعلوا قوى و قالولى يا بنتى لية السودا كنتى ممكن تاخدى الوان تانية
بس قلتلهم دول اللى عجبونى و كمان اللون الاسود مش ملفت للنظر و انا عايزة حاجة تبعد عنى ا لعيون المريضة
المهم اخوات فى موقع عمرو خالد قعدوا يكلمونى عن النقاب و جمالة و الادلة بتاعتة لكن الصراحة بالكلام كدا ما كنتش مقتنعة و قلت دا هيخلينى احتجب عن الدنيا
و مرض ابى حبيبى و كنت اصلى و ادعوا الله عز و جل ان يمد فى عمرة فهو الصديق و الاب و الوفى و كل ما تتخيلوة
و دخل ابى المستشفى لعمل قسطرة فى القلب و كان خائف جدااا و من كتر خوفة توقف القلب و هو بالعمليات و عملولة صدمات و الحمد لله رجع القلب يعمل بكفاءة
و رحت ازور بابا و اليوم دا الوحيد اللى غيرت العباية قبل ما ارحلوا جبت واحدة لون فاتح قلت عشان ما ادخلهوش باللون الاسود
و نظرت فى عين بابا و هو متعلق اجهزة كتير جدااا فى جسمة و تمعنت فى عينية و اةةةةةةةةة من تلك النظرة دمرتنى و الا الان و ما حييت ابدا مش هنساها

لمعة فى عينة غريبة حتى انا قلت و انا خارجة بابا هيموت مش هيعيش حتى اختى قلتلى اية اللى بتقولية دا
و فعلا بابا توفى تانى يوم نتيجة هبوط فى الدورة الدموية و الحمد لله قال التشهد قبل ما يموت و حمد الله

الموضوع دا اثر فى نفسيتى كتير قوى
العباية ما لبستها الا اليوم دا بسسسسس
و رجعت للسواد تانى

اتعلقت اكتر بالقران و تعلم كل شيء جديد عليا يعنى زمان كنت اقراء القران و كتير من معانية مش عرفاة فابتديت اطلع اكتر
و صادفنى موضوع للاخت عن النقاب و كاتبة كتير جدا من احاديث و ايات عنة
و قعدت سنة بحالها ادور و ابحث عشان لو لبستة ما اخلعة ابداااااااا و ما فيش اى كلام يهزنى
و الحمد لله صليت فى السنة دى اكتر من 200 مرة صلاة اسخارة و كانت ايجابية و مرتاحة جدااا
و لبستة اول يوم رمضان قبل اللى فات و الحمد لله ملتزمة بية
يعنى الجوانتى ما بيتخلع من ايدى ابدااا 000 العيون طيقة جدااااا و سعات انزل الغشوة000 و العباية فضفاضة (انا قلت النقطة دى لان اللى بشوفة من بعض المنقبات اليوم حاجة تحرق الدم الصراحة)
و مش معنى دا ان الواحدة تكون مبهدلة فى نفسها لا طبعا
كل شيء شيك و مرتب و بسيط و فى نفس الوقت مش ملفت



حكتلكم قصة حياتى بس بجد حستكم اخوة لى
و اسمحولى على الاطالة
دمتم بامان الله

لا إله إلا أنت سبحانك اني كنت من الظالمين

الله يبارك لنا في أبناءنا ويهديلنا أزواجنا ويفك كرب كل محتاج ويرزق كل انسان باللي يرضيه

أنا دايما بدعي في كل صلاة ( يارب ألّف بين قلبي وقلب زوجي واجعل ذريتي ذرية صالحة وافتح لنا أبواب الرزق الحلال برحمتك )


ربنا يبارك لكم جميعا على الصحبة الحلوة دي ويجمعنا على الخير وفي الخير دايما :)


أم وائل انا برض مش مشجعة حكاية شحن العفش دي وربنا ييسرلي اللي فيه الخير شكرا على اهتمامك

السلام عليكم ورحمة الله وبركاته
ماشاء الله ف همه ونشاط وروح جميله فى التجمع ربنا يارب يظلنا جميعا تحت ظله
وطبعا ايمان عامله جو جميل حا يشجع كل الغايبين انهم يرجعوا
النت كان فاصل طول اليوم وشعرت بقيمته جداوطول ما هو فاصل قلت الحمد لله على نعمة النت
لانه بجد نعمه بتواصل مع ناس بحبهم وفعلا زى ما قالت زوجه مصريه ان فى ناس كتير مش بعفهم
معرفه شخصيه لكن فى جو جميل بينا
محبة الرسول ما شاء الله قصة هدايتك جميله ومؤثره ربنا يثبتك ويثبتنا جميعا
كلامك شجعنى انى اشجع البنات على لبس البطلون لازم تنزلى من بيتك وانتى لابسه بنطلون
القصتين دول حدثوا فى وقت قريب من بعض ومن بعدها الحمد لله لايمكن انزل من بيتى غير بالبنطلون
القصه الاولى جارتى ذهبت اعزيها فى وفاة سلفها وبناته فى حادثة سياره
جارتى بتقولى سلفتى قبل السفر صممت تلبس بنطلون تحت العابايه كلنا اقنعناها بلاش الجو حر
وانتى داخل سيارتك لكنها صممت وبتقول لى فعلا كأن قلبها حاسس وفعلا السياره اتقلبت والبنطلون سترها
تماما والقصه التانيه فى رحلتنا للحج اسره نعرفها عملوا حادثه والزوجه توفت وكل من شاهدها
بقى يقول البنطلون ده نعمه لانه سترها تماما فنصيحه لنا كلنا لازم بنطلون وانتى بترفعى رجلك تركبى تاكسى
او باص البنطلون بيستر وانتى خارجه من بيتك مش ضامنه ظروف الطريق
لكن بنطلون ازاى طبعا كل اخت لها حرية الاختيار فى لبسها لكن كان فى حلقه جميله جدا لمصطفى حسنى
اتكلم فيها عن اللبس مع الحجاب ومشروعية لبس البنطلون حتى لو البلورزه لحد الركبه
انصحكو تشوفوها لكن انا بلبس بنطلون تحت العبايه

دى حلقة الحجاب لمصطفى حسنى حملوها بجد ممتعه جدا
http://rapidshare.com/files/157312656/Khadaouk_Fakalou_2_EP3.rmvb