بلو روز الحمد لله على رجوعك لينا بالسلامة وحشتينا

امبارح بقى عملت عجينة شمس عملت جزء منها فطاير ذى الكرواسون بملبن والجزء التانى يتزا وعملت قرصتين كده بجبنة
والحمد لله طلعت جميلة

بس والله الواحد خايف من قعدت البيت اصلى بينى وبينكوا بدأت اتخن
ربنا يستر

صباح الخير يا بنات

انا دخلت اهو لما لقيت الهزة بتاعتي للموضوع جابت نتيجة انا قلتلكوا هفضل هولد لغاية ما اليوميات ترجع

وطبعا اليوميات لازم تكون معشقة في بعض
يعني حتى لو بينا داعية ربنا يكرمها اكيد بتطبخ لجوزها وبتذاكر لولادها وبتهتم بنفسها

وده اللي انا بدور عليه ولقيته في الملف ده

طريقة تطبيق كل اللي بنقراه على حياتنا

يعني انا بقرا ميت فكرة وفكرة بس اطبقها ازاي وامتى في وسط زحمة الشغل والولاد

ده اللي لقيته هنا وكتير فعلا ببقى مش قادرة واقول لا مهو في اللي بتكون تعبانة اكتر مني وبتعمل اكتر من كده

دنا ساعات او مش ساعات طول اليوم وانتوا على بالي اقول طيب لو معملتش حاجة هدخل اشارك بايه وهقول على تجربه جديدة منين وانا معملتش حاجة

يعني فعلا الموضوع ده بقى محور حياتنا ولما لقيته خمل وبقى واخد ناحية واحدة من نواحي الحياة رغم اهميتها قلت ادخل واقول وجهة نظري
والحمد لله في بنات كتير رجعوا والروح ابتدت ترجع تاني

والحمد لله برضه اننا واعيين وواخدين بالنا من الشيطان ومش هنسمحله يدخل بينا

على فكرة يا بنات احنا عندنا حالة وفاة
خالة زوجي
كانت ست رائعة وخدومة ومعطاءة ومكنش بيختلف عليها اتنين

ربنا يرحمها هي كانت مريضة وربنا اراد ميطولش المرض عليها
يا ريت تدعولها بدون مشاركات بينكوا وبين نفسكوا ربنا يرحمها ويتجاوز عن سيئاتها ويغفر لها

ويجعل كل عمل خير هي عملته في ميزان حسناتها

على فكرة من الفوايد الرهيبة اللي استفدتها منكوا وفارقة معايا في حياتي جدا

استحضار النية في كل حاجة

والاستغفار اثناء العمل في اي شئ
انا بقضي ساعتين سايقة تقريبا كل يوم وانا رايحة الشغل وانا راجعة
وكانوا بيضيعوا في هبل
دلوقتي على قد ما اقدر بفضل استغفر واقول اي ذكر لغاية ما اوصل
والحمد لله بحاول اواظب على السنن بعد كل صلاة وفعلا مبتاخدش اي وقت ربنا يعينا


وعلى فكرة الست اللي اتوفت دي كان خيرها على الجميع انما انا لاحظت ان اللي انا فكراه اوي انها كل فترة صغيرة كانت بتبعتلنا اي هدية مهما كانت بسيطة
يعني سويت شيرت للبيبي
توك لشادن حاجات صغيرة وبسيطة بس كفاية انها فكرانا برغم ان عيلتهم كبيرة ماشاء الله وناس كتير اقربلها منا

يعني فعلا الرسول عليه الصلاة والسلام لما قال تهادوا تحابوا كان على حق
الهدية يا جماعة مش بقيمتها دي ليها معنيين
صلة للرحم
وكمان رسالة محبة للي ريحالة بغض النظر هيا ايه
حتى لو زي ما في حد قال انا مش فكراها اعذروني
(لو بتعملي مربى ابعتي لاهلك كل واحدة برطمان صغير من بتوع الصلصة) والامثلة كتير الواحد مياكلش حاجة لوحدة طبعا قدر المستطاع
لو كيكة نهادي كل مرة واحدة من الجيران
لو اكلة طلعت مظبوطة طبق فويل صغير وتقوليلها انا قلت ادوقك بس
احنا بنحاول نعمل كده في عمارتنا والحمد لله جايبة اثر فعال
دي مرة واحدة دمست فول وبعتتنا كل واحدة طبق صغير بتفرق جدا جدا

ميرو
البقاء لله وربنا يجعل مثواها الجنة ويغفر لها ولجميع المؤمنين والمؤمنات الاحياء منهم والاموات

والحمد لله انك رجعتلنا تانى وعقال باقى البنات يارب

النهاردة بقى الحمد لله عندى حالة نشاط جميلة تحت كل الشبايك وخرجت البطاطين وغيرت ملايات السريروغسلت على الغسالة العادة والاتوماتيك وعايزة اعمل قرص ويارب تنجح وتقى حلوة لان بصراحة حاجة امبارح قضينا عليها ما شاء الله ومش فاضل الا حاجات بسيطة نتعشى بيها النهاردة ان شاء الله

ولسه عايزة اغسل مواعين واطبخ بس مستنية على ما محمد ينام شوية