فيتامينات البشرة

اتكلمنا قبل كده عن أفضل الفيتامينات لمنع حب الشباب :
فيتامين A ، فيتامين E ، فيتامين D ، فيتامين C ، فيتامين B12
النهاردة بقي هنتكلم عن كل فيتامين بالتفصيل وأهميته .. يلا بينا :
فيتامين A : ده بقى مهم جدا لأنه بيساعد على تقليل افراز الدهون اللى بتسد مسام البشرة وبتسبب البحبو .. ده كمان بيساعد للوقاية من التجاعيد .
طيب ده بقى نلاقيه فين ؟؟
تلاقيه يا قمر فى الجزر والبطاطا والمانجو والسمك وكمان فى اللحمة الحمرا والجبنة والقرع .
فيتامين E : ده برضه مهم جدا لأنه من مضادات الأكسدة .. اللى بتساعد على شفاء البشرة بسرعة .. وده بقى نلاقيه فى : اللوز والبندق والافوكادو والسبانخ والفول والفول السوداني و عسل النحل وزيت عباد الشمس .
فيتامين D : ده بقى مهم جدا جدا جدا سواء لشعرك أو لبشرتك أو حتى لجسمك .. وموضوعنا بيخص البشرة فنركز فى اهميته للبشرة : ده بقى بيساعد على منع حب الشباب وكمان بيخلى بشرتك صافية
وصحية وبيقوى جهاز مناعتك مش بس كده كمان بيمنع شيخوخة الجلد وبينظم الكالسيوم وكمان بيعالج تجاعيد بشرتك .
ده بقى تلاقيه فين ؟؟؟
الشمس .. أيوه الشمس : كل يوم الصبح كده قبل الساعة 10 تتعرضى للشمس ولو نصف ساعة .. عندك كمان السلمون والزبادى والبيض والجبنة وكمان اللبن وعصير البرتقال والخضروات الورقية الخضرا .
فيتامين C : ده بقى بيصلح بشرتك وبيقلل احمرار الجلد وكمان بيحافظ على مستوى الكولاجين فى بشرتك .. ومضاد قوى للأكسدة وبيساعد على تجديد الجلد مش بس كده .. ده كمان بيعالج الندبات والتصبغات .
ده بقى موجودة فى البرتقال والليمون واليوسفى والفلفل الرومى والبروكلى والفراولة .
فيتامين B12 : ده بقى اصلا موجود فى كريمات الريتينويد اللى بتعالج حب الشباب .. وده اللى بيخلى بشرتك تنور .. وكمان بيحسن الرطوبة فى الجلد وناعمة زى بشرة الأطفال وبيحارب كمان التجاعيد وبيمنع
تصبغات البشرة والبقع الداكنة .. ده بقى نلاقيه فى اللحوم الحمرا والمكسرات زى اللوز والجوز والبقوليات وصفار البيض وكمان الأسماك والحليب ومشتقاته .
خلاصة الموضوع إن الفيتامينات مهمة جدا لجسمك علشان يشتغل بشكل طبيعى .. أى نقص للفيتامينات أكيد هيأثر عليكى فلازم تكملى النقص اللى موجود عندك علشان جسمك يشتغل مظبوط .
وبكده يكون خلصنا حلقة النهاردة واتمنى تكونوا استفدتم منها واى استفسار فى اى وقت كلمونى فوراا ..