فيدوني مع التقديم على التأهيل الشامل .. الله يفرج كرب كل من ترد علي

السلام عليكم ورحمة الله


عندي ولد عمره سنتين ونص معاه ضمور عضلي تام يعني مايتحرك بس على ظهره


يتعب صدره كثير ويتنوم كثير ويحتاج شفط واكسجين وكذا غير العلاج الطبيعي


يعني تقريبا هو اقرب لمرضى ضمور المخ للي مقعدين تماما بس هو سليم عقليا ويفهم ويتكلم زي اي طفل عادي


المستشفى طبعا يرفضون يستقبلونه مرات لان يبون يركبون تنفس صناعي وانا رافضه بحجة انه حرام للامراض التي لا يرجى برئها


نجي للمهم عندي تقرير انجليزي بحالته هل يقبلونه التاهيل او لازم مترجم


ايش المطلوب غير الصور وكرت العائلة وهل هو فعلا مطلوب ملف علاقي اخضر ههههه يستهبلون اذا كذا


وايش يصرفون له ابي امهات مرضى الضمور يخبروني ابي كل شي هل يصرفون سرير وكرسي جلوس وعربية وكرسي سيارة مناسب لان والله حبيبي مرة يتعبني


والمروش يصرفون له لاني اتعب مرة وانا اروشه وهو يبكي لانه يتألم وجته عقدة استغفر الله


اجهزة مولد الاكسجين والشفط وقياس الاكسجين وهذي كلها تصرف ؟


انا مادري ولا عندي خبرة ويقولون البعض ان اذا ما طلبتي مايعطونك وخايفة من هالشي يعني لازم اعدد انا وش ابي ؟؟


وناوية اروح بكرا اقدم ان شائ الله كم يبيله لين تصرف له الاجهزة وكذا ؟


لان المرض عنده يسوء باستمرار وكل ماله يحتاج عناية اكثر والمستشفى حسبي الله عليهم يرفضونه يقولون خلاص مابيدنا شي تبين تنفس صناعي او خليه


لان المرض قاتل بنسة 95%


والحمدلله املي بالله كبير ولا همني كلامهم وابي اساعد ولدي قدر الامكان


الله يرضى عليكم ويرزقكم من حيث لا تحتسبون كل وحدة تقول تجربتها وايش صرفوا ومن هالاشياء تعطيني كل المعلومات


ومن ناحية النفس الشينة واللسان الطويل ما علي منهم لساني اطول :d