فيلم مرعب .. ( الولادة موب سهلة )

السلام عليكم و رحمة الله و بركاته
كيفكم خواتي المكرشات و المفقسات ؟؟
طبعاً زي ما بلغتكم مليكة القلم .. اني ولدت و لله الحمد .. و بصحة و عافية ..
جبت احلى ولد ( طبعاً القرد بعين امه غزال ) هههههه
وعدتكم ارجع بقصة الفيلم المرعب اللي اسمه ( الولادة موب سهلة )


طبعاً كان موعد ولادتي هو ( 4 ) اغسطس ..
و بيوم 2 اغسطس وصلني خبر موب زين ابد عن ولد اختي انه عمل حادث ... و لازال بالمستشفى لليوم ..
ادعوله يا بنات ربي يفكه من هالمشكلة على خير .. لانه مقرر له عمليه لرجله و له 15 يوم و ما عملوها له بسبب التهاب مكان الكسر بالرجل .. ادعوله يا بنات ربي يشفيه و يفك رجله ...

المهم .. انا ضاق صدري ذاك اليوم .. و قمت طلعت للسوق اخذت لي مدس للبيبي و قلت امشي شوي .. و انا بالسوق احس بمغص و تقلصات بس ماكانت شي يذكر .. رجعت من السوق لبيت اهلي و سهرت عندهم .. و لما جاء زوجي بالليل يتعشى قلت له احس اني قربت ... وصلت لخط النهاية ..
و على فكرة .. تراني كنت مررة مابي اولد .. عكس البناات اللي هنا كلهم يدورون شي يعجل الولادة و انا ما ابغى .. يوم مابقى الا اسبوع صرت اتمنى اعيد التسع شهور مرة ثانية و ابعد عن لحظة الولادة ..
و كنت صادقة و الله .. الولادة مرعبة .. و علاقتي بولدي كانت احلى قبل ما ينولد ههههههههههه


و رجعنا للبيت .. و نام زوجي .. و انا ماااش ماقدرت انام من التقلصات .. مع انها ماهيب توجع .. بس كانت تضايقني .. سهرت لين الساعة خمس الفجر على النت .. و عقبها صحيت زوجي يصلي و صليت و نمت ..
صحيت الساعة ثمان و نص .. و الاقي زوجي حبيبي جايب لي فطيرة لوزين و عصير .. قمت اكلتها و انا على السرير .. و رجعت انام .. لاني بالليل ما تعشيت زين من التقلصات ..
الساعة حدعش و نص الصباح .. قمت من النوم عادي .. لا الم ولا شي .. و لما جيت اقوم من السرير حسيت بالمنطقة الحساسة بلل و رطوبة .. قرفت و حسبتها افرازات عادية .. و لما تحركت حسيت بموية تجري على فخوذي .. و اقوم اركض للحمام و لما وقفت قامت الموية تصبصب بين رجولي و انا مرتاااعة .. قمت اخذت الجوال و جلست على كرسي الحمام على بالي بتخلص الموية .. و اتصل على اختي ولا ترد .. و ترد شغالتها و اقول لها صحي المدام بسرررعة تكلمني ..
بعد خمس دقايق كلمتني و قلت لها . قالت لي بسررعة روحي للمستشفى .. قلت لها مافيني الم .. قالت عادي .. قمت توضيت و صليت .. و اللي كان يقرفني اني كل ما توضيت و وصلت لرجولي نزلت موية .. اقوم اعيد الوضوء .. اخر شي قلت خلاص بتوضى و خلي الموية تنزل .. حطيت منشفة و جلست على كرسي و صليت الظهر قبل ما نطلع ..

رحنا للتخصصي الطبي و دخلنا طوارئ الولادة .. و استقبلوني احلى استقبال .. حتى ملابسك يشيلونها لك ويلبسونك الفوطة الصحية ... و كان فيه دكتورة سودانية رائعة للاسف نسيت اسمها .. هي اللي باشرت حالتي .. و لان دكتورتي كانت مسافرة .. حولت على الدكتور جون شلهوب. . و انا كان معي موعد معاه الساعة ثمان و نص المساء .. طلبت منهم ان المناوبة تولدني ولا يولدني هو .. من رداه حظي مالت علي :mad:


الدكتورة قاست الرحم .. الصراحة يعور شوي .. بس على حسب حنية الدكتورة .. لقت الرحم مفتوح ثنين سنتي بس .. و المويات تصبصب .. قالت لي روحي امشي ساعة و اذا ماحسيتي بطلق بنعمل لك طلق صناعي .. قلت لهم معليش .. و اقوم امشي امشي امشي نص ساعة و مليت ... رحت انسدحت و من الانبساط على بالي الامر هين جالسة اسولف مع زوجي و اصوره و يصورني هههههههه
بعد ساعة جت الدكتورة و حطت لي تحميلة طلق .. و اخذوا تحليل عشان ابره الظهر .. و اجلس من الساعة ثلاث الين الساعة خمس تقريباً و بالعافية بدا الطلق .. و يبدا العذاااب .. صار البيبي يضغط على المستقيم و احس فيني غازات ولا اقدر اتحرك ... اخر شي راحت الدكتورة اللي باشرتني .. و جت وحدة هندية .. شكلها ما يريح .. الظاهر اسمها كيشنا او شي زي كذا .. تجيب الضغط .. زوجي لما دخل علي الدكتور جون يشيك علي و يتطمن ... قال لي قولي له هو يولدك لان شكلها ماعندها ماعند جدتي
قلت له لا .. خلني بحتسب الاجر و اخلي الحرمة تولدني لغدي ربي يخفف عني .. و ياليتني طعت كلامه بس
هي ماهيب شينة .. بس نفسها خايسة و انا حساسة ولا اتحمل احد ينفخ علي.. لدرجة اني مرة عييت ادفع و بغيت اموت الولد ببطني عشانها نفخت علي
جلست اصيح عليهم ولدوني قيصري و زوجي يقول لي تحملي معليش
قمت طلعت حرتي فيه و اجلس اسبسب فيه و ادعي عليه و يوم قام يمزح يقول لي معليش بكرة تنسين و تقولين ابي ولد ثاني انفجرت عليه و قلت له مااابي بزرااان
اذا تبي عيال ثانين روح تزوج و فكني هههههههه
عاد هو فرح قام يقول للممرضات شاهدين .؟؟

لما فتح الرحم ثلاثة سنتي الى اربعة جاء اخصائي التخدير و عمل لي ابره الظهر
الصراحة ما توجع كثير .. بس ريحتني ساعتين و وقف الم الطلق عندي
لكن لما جاء يطلع الراس رجع الالم و بديت كل شوي اصيح و اقول لهم نادوه خلوه يزيد الجرعة و الدكتور حسبي الله عليها رافضة تقول لو زدنا الجرعة انتي ماراح تعرفين تدفعين
قلت لهم ياناس الابره اصلاً ما اشتغلت ولا اصلاً احس بخدر ولا شي .. حتى هاللي يقولون عليه الكمامة ماغير متعلقة فيها و اشفط و ريحتها تسد النفس من انفاس الناس اللي قبل ههههههههه
و يقولون لي اشفطي فيها .. و اقول لهم ماحس بدوخة زي ماتقولون يقولون الا
جابو لي كمامة ثانية شكلها غير و برضو الالم مايخف .. و هات يا تصريخ من الالم ...
زوجي كان معاي بنفس الغرفة بس بالجهة الثانية و يراقب الوضع و مسكين من كثر ما شافني اتعذب قام يبكي من ورا الستارة بس ماشفته لاحظت صوته
شكله يقول وش سويت ببنت الناس ههههههههه

و كل شوي يجي مساعد اخصائي التخدير يشيك على الابره و برضو الالم ما يوقف .. شكلي من كثر ما حكيت للناس اني باخذها احد عطاني عين
:(
طبعاً عملوا لي توسعة و البيبي ما قصر عمل لي توسعة
لما طلع البيبي ماصدقت و هم يقولون خلاص البيبي جاء .. حطوه على بطني للحين ما اتذكر ذيك اللحظة
كانها حلم
على طول اخذوه و بدو يدهرون عليه
الصراحة يا بنات انصحكم ازواجكم يصيرون معكم بالغرفة عشان يحسون بمعاناتكم ..
لا تقولون قرف او ماقرف
لانه ماراح يشوف المنطقة هذيك ابد ولا يشوف اي شي ماتبينه يشوفه .. و احلى لحظة لما يصور البيبي اول مايطلع على الدنيا
تحتفظون فيها لين يكبر و يشوف نفسه
<--- مدمنة ذكريات
بس انتم انتبهوا ان الغرفة يصير فيها ستارة ما تكشفك
يعني انا من حظي طحت بغرفة السرير كان على جنب والستارة على يميني .. و صار زوجي واقف من برا الستارة يعني ماوقف من عند كتوفي
لاني اصلاً كنت ابيه يصير معي بس خفت اجلس اعضعض فيه و اقطع له اصبع
و ساعتها ماعاد حسيت بشئ اصلاً ..
لكن لقيت غرفة ثانية الستارة تجي من قدامك يعني لو يطل احد من ورا الستارة يشوف البلاوي كلها
كل الحريم اللي كانوا موجودين ذيك الساعة ازواجهم معهم .. اللي واقف برا الغرفة عند الباب و اللي داخل معها و اللي واقف عند راسها
و هذا الشئ الصح .. عشان يعرف انه طلع منه وناسة و طلع مني تعب و يعرف ان الامر مو سهل و الامومة صعبة


طبعاً البيبي شرف الساعة عشرة ونص مساءً بعد ما شافوني مافيني حيل ادفع قاموا ممرضتين بكوعهم يضغطون على بطني لين طلع و تزحلق البيبي
و الخياطة عااااااااد امرها غييير .. يا سلام عليها
تطلع روحك منها .. و المجرمة ماحطت لي بنج موضعي لانها تقول انتي حاطة ابره ظهر و انتي متنبنجة و يحسبوني اتدلع
تقول لي الشق صار على تحت بالمهبل و جلسوا ساعة يخيطون و انا اتوجع و اصيح و يقولون لي ريلاكس و انا اقول عطوني بنج و اصير ريلاكس لاني اتألم و مو راضين يصدقوني
وش جابرني على الالم اذا فيه مسكنات ؟؟
و جلست بعد الخياطة ساعة بالغرفة لمراقبة الحالة .. و طلعوني لغرفتي و طلبت البيبي و جابوه .. كان يهبل دبدوب و حلو
بس عاد اللحين انفشت خدوده .. اثاريه كله تنفخ بس هههههههه


و هذي قصة ولادتي

اكيد تبون تعليقي على المستشفى
الصراحة التعامل قمة .. و نادراً ما تطلع لك ممرضة نفسها خايسة غير اللي طحت فيها مع الدكتورة الهندية
مع ان الطاقم الي قبلها كان روعة سواء فلبينيات او هنديات

كل شوي يجيون يشيكون عليك بالغرفة .. احياناً يدخلون ثلاث اربع ممرضات عليك اللي تقيس الضغط و اللي تقيس الحرارة و اللي تشوف الخيوط
الصراحة صار وجهي مغسول بمرق من كثر ما دخلوا علي يطلون على الجرح و يشيكون عليه .. و يضغطون على بطني يشوفون فيه نزيف ولا لا
اختي تقول ان الحرمة لما تتزوج تفقد ثلث حياءها .. و لما تولد تفقد الثلث الثاني
بالنسبة لي انا فقدت الثلثين يوم ولدت هههههههههه

و حتى تطلع لي دكتورة هندية اسمها نجمة مرة حبوبة جت و شيكت على العملية بس المجرمة اللي خيطتني ولا عبرتني اصلاً حسبي الله عليها
حتى الدكتورة السودانية اللي بدت بحالتي طلبت تشوفني و جت لغرفتي و شيكت على خيوطي اكتشفت ان فيه خيط طاح
قالت انا بخيط لك من جديد و نزلتني و تفرغت لي و خيطتني من جديد
يعني مررة قمة بالاخلاق .. بس للاسف نسيت اسمها .. و ترا فيه دكتورة سودانية ثانية بالطوارئ لها نفس الاسم هههههههه


اذا تذكرت اسمها ارجع لكم فيه

و حتى دكتور الاطفال اللي شيّك على ولدي طلع لي بالغرفة بنفسه و دخل عندي و يطمني على حالة البيبي
يعني مررة خدمتهم حلوة ..

و دكتوري جاء عندي كذا مرة يسلم .. بس ماخليته يكشف قلت يكفي عاد ما انكشف علي

و لما جيت اطلع سألوني تبين تعملين له تطهير .؟ قلت ايه
طهروه و طعموه و شالوا البكلة اللي يحطونها بالسرة و جابو لي شهادة ميلادة و دفتر التطعيمات و موعده مع طبيب الاطفال بعد اسبوع
و موعدي مع دكتوري
هذا كله و انا جالسة بغرفتي و اصلاً يعملون لك المواعيد و التطعيمات من غير ما تطلبين
ما استأذنوا الا بالتطهير فقط يخافون ان فيه ناس عندهم عادات و تقاليد بهالامر
ارسلوا لي ورقة و قالوا وقعيها عشان نطهره

و الحمدلله و الشكر لله على كل شئ
صح تعب .. بس شوفة هالمزيون بجنبي تغنيني عن كل شي
مع انه اتعبني بالولادة و بعدها
بس الشكوى لله .. العيال مب ببلاش



:)