اولا الله يقومك بالسلامه ويفرحك ربي بقدوم مولودك ، نصيحه مني لا تتشرهين على الناس لا قريب ولا بعيد كلن وله ظروفه ، امك يمكن من النوع اللي ما يحب الاطفال والازعاج اعذريها خلاص جابتكم وربتكم وتعبت اول عمرها وتبي ترتاح لا تقولين ماهي مهتمه بس خلاص هذي طاقتها واختك الله يسامحها ، شوفي اذا تقدرين تستأجرين شغاله فتره نفاسك تساعدك ، وانتي تشكين من شغل البيت اقولك الحال من بعضه كلنا والله نتعب الله يعيننا بس مع تنظيم الشغل يسهل علينا

شوفي اللي فيك ترى من الحمل والا وضع اهلك طبيعي انا زيك بس بنص التاسع محد يسأل ولا احد يدق ولا شي بس عادي عندي مع انه عندي عيال يطفشوني زياده على حالتي وبس ابكي ولاني جربت هالوضع قبل عارفه انه من الحمل حده تولدين او بعد اسبوعين من النفاس ترجعين طبيعيه وتحبين الحياة وتنشغلين بنونتك
الناس كلهم مشغولين بانفسهم محد فاضي لاحد
والله يفرجها عليك اليوم قبل بكره وتقومين بالسلامه

ياختي الله يهديك انت من الحمل متحسسه اهلك وامك صدقني لو تجيها وتتنفسي عندها راح تقوم فيك وماراح تخليك...

خاصه انك بكريه بعدين الله وكبر كنتي تنامي عندهم ومرتاحه وش تغير انا اشوف المشكله فيك انت صايره كثير حساسه...

واختك شي طبيعي انخطبت بتنشغل مع خطيبه مثل كل بنت امك لو طلبتيها تجي معاك ماراح تردك ...

تعوذي من بليس اللي غير يحزن الشخص وروحي المستشفى ممكن يعطوك طلق صناعي وخبري امك حتى تدعيلك ...

والله يسهل لك من راي لو رحت لاهلك افضل امك تساعدك وتقوم فيك وخاصه انك بكريه

وانتبهي تحسسي زوجك انو اهلك قلبهم مو عليك الله يسر امورك لااله الا الله

الله يهون عليك يارب ويتمم لك بالعافية وشوفة جنينك بصحة وعافية


طيب ناخذ اللي بخاطرك حبة حبة
تقولين ما خلصت الاغراض هههههههههههههههه ما اتذكر اني ولدت وانا مخلصة اغراضي دايما نواقص سبحان الله خذي الامور ببساطة وجيبي الاهم والاهم والباقي ربك يسهله
كملتي التاسع عادي نكمل التاسع وناخذ اسبوعين من العاشر كمان الله يهون يارب له ساعة مكتوب يطلع فيها ما يقدم ولا يتاخر
بالنسبة لامك حقها عليك مو العكس ولازم ما تشرهين عليها حتى بينك وبين نفسك واذا بدا الشيطان يجيب هذي الافكار تعوذي منه
واختك طنشيها وادفعي السيئة بالحسنة ومع الايام وبكره اذا تزوجت وشافتك بنفس المعاملة بتتغير
والولادة اصلا ما احب ابلغ احد اني بولد حتى ببكري طلعت من عندها معاي طلق وولدت من بكره وهي ما تدري عني جاها الخبر بعد ولادتي
وش بيتغير اذا عرفت ؟ ما احس ان الناس او الام او أي انسان بيعرف او يجي معاي للمستشفى بيغير من ألم الولادة او وضعي شي !
بالعكس اذا كنت لحالي ما اشيل هم يوه تاخرت او باقي او هم ينتظرون مني رسالة
متى ما ولدت وارتحت وتطمنت على نفسي والبيبي نبلغ الناس والحمدلله
توكلي على ربك وحاولي تقوين شخصيتك وتستقلين عن اهلك وامك واختك وتتعاملين معهم بالمعروف وحسب طبيعة كل شخصية منهم بدون ما تتحسسين او تتضايقين
الناس ما انخلقوا زي بعض بنفس الطباع ونفس التصرفات ولازم نتقبلهم اذا ما فيه ضرر مباشر علينا او تعدوا على حرياتنا
كل وحده فيهم حطت حدود وطريقة للتعامل اوك سوي زي ما يبغون واهم شي حياتك وبيتك وزوجك واطفالك اليوم وبكره

الله يهون عليك ويفرج كربتك

انا نفسك كملت شهري وولدتني الدكتوره بطلق صناعي والحمدلله مامن شر وهذا انا بالنفاس

توكلي على ربي وروحي لانه خطر تتاخرين
وادعي ادعي عليك بالدعاء وبندعي لك بظهر الغيب