فيني ضيقه مايعلم فيها الا الله سبحانه

:(
السلام عليكم
خواتي العزيزات حاسه بضيق مايعلم فيه الا الله سبحانه وشوي بصيح من الضيقه اللي بصدري :icon33:
مادري ليش هالايام كلها ملل ومشاكل حاسه ان الناس كلهم مافيهم خير والله يابنات تعبت مالي غير الله ثم انتو خواتي اشكيلكم حتى زوجي مع انه يحبني وطيب وحنون الا انه رغم كل هالسنين اللي عشناها مع بعض مب راضي يفهمني ولا يعرف كيف يتفاهم معاي ويسعدني
زوجي طيب وملتزم وماعليه قاصر بس ساعات كثيره يصير اناني واللي في راسه لازم ينفذه حتى لو عرف انه يضايقني دايما ينظر لكل شي ابغيه ونفسي فيه على انه ترف وتكلف وماله داعي رغم اني عمري ماطلبتت منه اي شي اعتمد على نفسي واشتري كل شي من فلوسي لي ولاولادي وله وحتى ابخل على نفسي واشتري له ولعياله اذا حسيت نفسهم في شي او شفت شي في السوق على طول اشتريه لهم بدون تردد اما انا ماحد حاس فيني :(
ولا اجي على بال اي حد وقليل جدا اذا حد افتكرني بهديه او حس فيني مثلا هالايام انا في ضائقه ماليه وماعندي فلوس وبنفس الوقت في اجازه والسايق مسافر ولا عندي حد يوديني ويردني واضطر اغلب الاحيان اني اروح بتكسي رغم ان خواني الشباب موجودين بس كل ماكلمهم يتعذرون لي باي شي وحتى لما درو اني بحاجه لفلوس لاني لمحت قدامهم والله يابنات قام كل واحد يتعذر بشي رغم ان واحد منهم كان قبلها بيومين بس يحسب لي كم عنده هو وزوجته وانا يعرفوني عدل عمري ماخذت فلس واحد من اي احد بالعكس تماما اساعدهم واصرف عليهم لين يشتغلون واعينهم في عرسهم بس شقول خلوها على الله وانا ماكنت ابغي المبلغ صدقه كنت برده اول هالشهر بس سلف لين اول الشهر وهم ياخذون عني بالاف ولا عمرهم ردو لي شي
وانا لو باخذ عشر دراهم ارجعها بنفس الوقت
حتى عمتي ام زوجي تسلف العيله كلها ولما لمحت لها اني ابغي سلف لين اول الشهر قالت لي ماعندي شي وهي تسلف الغريب وانا ياما ساعدتها وياما عطيتها ولما ترد لي فلوسي احلف ما خذهم وشوفو اللحين ماحد نفعني ولا حد وقف يمي ودايما يطلعون ويروحون السوق والزيارات ويعرفون اني ماعندي حد يوديني والله يمرون من قدامي ولا يقولون لي مع اني دايما اعزم عليهم واقولهم اذا يبون شي
انا عشان احل ازمتي الماليه وحاجتي والله يابنات بعت ذهبي وقدام زوجي واهله واهلي يدرون ولا حتى زوجي ولو مجامله قالي لا تبيعين ذهبك انا بتصرف وبجيب لج فلوس رغم انه يقدر يجيب لي المبلغ اللي محتاجتنه بس ماقال لي ولا عاني في حاجتي :icon33:
الظاهر الطيب في هالزمن ياكلون حقه وما يسون له سالفه الا اذا يبون منه شي
تصدقون عاد احس قلبي شوي بدا يقسى ومن اليوم ورايح ماراح اسوي لحد سالفه ولا بساعد حد لانهم كلهم مايستاهلون وكلهم مافيهم خير

ادعو لي يابنات ان الله يفك ضيقتي ولا يحوجني حق حد غيره ويرزقني ويعيني لاني امر بظروف صعبه ومالي الا الله ثم دعواتكم