في أمسّ الحاجة إلى مشورتكم!! أرجوكم أعينوني

السلام عليكم بنات
سالفتي طويلة لكن تحمّلوني ولولا أنها ضاقت بي ما أتيت هُنا ولا أحببت ذكر شيء من قصتي إلا اضطرارًا يعلم الله وفقدًا للصواب واحتياجًا للمعونة والمشورة من أخواتي في الله هنا..
موضوعي شائك ومشكلتي كبيرة والحل ما أدري وش ممكن يكون!!
بقولكم نبذة عني يا بنات:
أنا بنت عمري ٢٤ تزوجت قبل ثلاث سنوات، معي ولد والآن حامل -وأتمنى من ربي ما يتمّ هالحمل رحمة به مما سيأتي وليس كرهًا له يعلم الله-، المهم قبل الزواج كنت كالوردة اليانعة الجميلة، كل من رآني قام يمدحني أخلاقي وشكلي ولله الحمد محبوبة وطيبة
وأحب الخير وملتزمة كنت لما أصلي في الجامعة يتذمرون صديقاتي يقولون يوووه صلاتك صلاة تراويح مع أني أحاول أسرع عشان ما يدخل لقلبي شيء من الرياء أو ما شابه..
المهم بعد الزواج بدايته الأشهر الأولى كنت مبسوطة، بعد ثمانية شهور بدت المشاكل، أذكر دق على أمه ويقول دوري لي الثانية وعشت هم وغم وألم لدرجة يا بنات كان وزني ٦٠ قسمًا بالله صرت الحين ٤٦ من الهم
خدودي دخلت جوّا صار وجهي هيكل وكل من شافني ارتاع وانصدم منّي وش فيها وش بلاها ووو هالكلام..
المهم قبل كنت ٢٤ ساعة على المراية وأهم شيء عندي شكلي..
بعد الز واج صرت كأني عمري ٦٠ سنة
جمالي اندفن، ملامحي ذبلت، كل شيء فيني بَهَت!!
في فترة الملكة صار بيننا سوء تفاهم ما كنت أبي أكلمه لكن أخوي عطاه رقمي بدون ما يسألني، وكلمني قبل الزواج بشهر.. وقررنا ننفصل قبل لا نتزوج
وكلمت أمي قلت أنا مو مرتاحة لـ هالشخص وبـ أبيع الذهب ونرجع مهره مع العلم مهري كان قليل جدًا مقارنة بباقي البنات.. بس اللي خلاني أوافق إيماني بحديث الحبيب ﷺ: "أكثرهنّ بركة أيسرهنّ مؤونة" يعني أقلهنّ مهورًا!
المهم قالت أمي بكيفك شيء راجع لك وهذي حياتك ومقدر أجبرك..
وكلمت جدتي وقالت لها.. كلمتني جدتي وهي مليانة زعل وقالت: "تبين تجيبين الفضيحة لأبوتس واخوانتس!! والله ما يطبّ وجهي وجهتس لـ ان سويتيها" بمعنى ستهجرني ولن تسلم عليّ أبدًا لو فعلتها! لغير الناطقين باللهجة السعودية البدوية😂
وتقول أنا تزوجت جدك وأنا ما أبيه.. تحسبنا زي وقتهم الله يسامحها ولّا رجال زمان زي أشباه رجال هالوقت!!
المهم يا بنات:
هو بعد قال لأمه وأمه خافت من الفضيحة وقالت لا ومدري أيش!!
تزوجنا وحبيته والله يا بنات كنت أشوفه يتنفس ولّا لا وهو نايم من كثر خوفي عليه وحبي له .. أووووف بس 💔💔💔
وكنّا في مشاكل بسبب الترتيب والتنظيف والطبخ
أنا أشوفها مشاكل عادية وهو كان يهاوشني وووو
في البداية واجهت صعوبة في تحمل المسؤولية لأني كنت عند أهلي جامعة ودراسة وما أشتغل أبدًا ..!
وتأقلمت بصعوبة وصرت أرتب وكذا بس ما وصلت درجة الكمال يعني لا بد من التقصير !
وبعدين الحمد لله تحسّن الوضع..
المهم المشكلة الكبيرة في رمضان فتحت جواله -وهو سامح لي طبعًا- يعني يدري اني أشّيك عليه ولقيته محمّل برنامج البي بي أم (بلاك بيري ماسنجر)
وهنا الصدمة والطامة لقيته مكلم بنات وبعضهن متزوجات ووحدة له معرفة سابقة بها قبل الزواج ومن ضمن المحادثة: كانوا متفقين على طلعة ويقول لها (ذيك المرة ساعتين بس ما كفّتنا)!!!!! ولقيته مرسل لها صورة xxx وهي مرسلة له xxx وهي xxx بيدها!!! آسفة جدددددًا وأعتذر لبذاءة ما تقرؤون لكن يعلم الله عشان تكونون معي بأبعاد المشكلة كاملة وتعينوني برأيكم!! ويقول بروح عمرة ومدري أيش أثاريه ناوي طلعة معها لو ما كشفته!!
طبعًا غير المكالمات اللي لقيتها مكلمها..
وكنت حامل بولدي في الخامس وحالتي حالة ومن قوة الصدمة زعلت ووو بكيت وقال لي تبين تقولين لأهلك ولا سوي اللي تبينه .. طبعًا كنت جبانة وسكتّ وراضاني بعدها بكلام بس ونسيت وسامحته ووثقت فيه والله .. وندممممممت قد شعر رأسي الحين وبتعرفون ليه!!!
تخيلوا كان يسبني عند اللي يكلمهن ويقول ما تطبخ ومدري أيش .. وكان يكلم وحدة نفس اسمي ومتزوجة وشكّ انها أنا وقال صوري أي شيء قدامك صورت الصالة مدري طاولة قدامها .. وقالت الله يعين زوجتك عليك شكاك أنت ..
المهم قبل تقريبًا ٦ شهور كذا بردت العلاقة بيننا
وعادي شيء طبيعي من الروتين والرتابة
المهم من أيام الملكة مانعني من تويتر لأني رديت على شخص على تغريدته ورد راقي ومثقف ومحترم وكان إختلاف رأي بس ..
وعطيته حسابي وقلت الحين بيفرح يقول زوجتي مثقفة ومحترمة ووو وصدمني انه يقول مو محترمة وليش تكلمين الرجال وتردين قلت والله هذا ريبلَي عادي والكل يشوفه وردي بالعربية الفصحى بعد وما فيه أي تعدي لحدود الله! المهم احترمت رغبته وحذفت تويتري وحسابي وما حمّلته إلا قبل فترة
وليتني ما حمّلته
جتني رسالة على الخاص من شخص وقال لي مساء الخير ويبي يسولف
قلت لو سمحت أنا مرتبطة وأرفض هذا النوع من العلاقات كمبدأ وضد هالشيء فرضًا عن انه شيء محرم شرعًا..
وشهر كامل ما رد
وبعدين بعد شهر رجع كلمني وكان زوجي إجازة وعند أهله أسبوع وأنا معه! المهم يطلع هو كثير أو مع أمه وأنا أطفش لحالي وزيّن لي الشيطان للأسف فكرة الرد عليه وضعفت وقلت خلني أطقطق ويمر الوقت وأشوف وش آخرته.. وكلمته محادثة جدًا كلام عادي وفي داخلي احتقار له وأقول وش جوّه ذا
المهم أرسل رقمه وطبعًا ولا في خياله اني ممكن آخذه ولله الحمد
وأرسل رمز البي بي حقه وقال تويتر معلق نكمل سوالف هناك
قلت وش وراي أروح أشوف وش يقول ذا
وحملت البي بي وضفته!
أنا قبل قد حملت البي بي وضفت زوجي وأرسلت له على اني وحدة وقعدت أسأله عني أشوف وش يقول
وقعد يسبني ويقول ما تطبخ ووو مدري وش
والله انصدمت منه وحذفت البي بي وظليت أحبه وأقول بيعرف قيمتي مع الوقت !
المهم أقسم بالله اني ما قلت كلمة وحدة وصخة للشخص اللي ضفته هو صار يقول كلام مو حلو وأنا بس إقرأ وقلت ب أحذفه وفعلًا
بس قبل لا أحذفه نسيت ونزلت بجوالي وكان زوجي جنبي وقال عطيني جوالك
أنا قلت لا !
وهربت للحمام وحذفت البي بي وطلعت
كنا عند أهله وطلع معي فوق وولدي تحت وأخذ الجوال وقال وش مسويه وووو وش فيك يا يا يا
المهم وضرب وتصفيق وخنق لين طلع الدم من فمي
أنا أدري اني غلطت وشككته بهروبي ويااا ليتني ما سويته بس أنا خوااافة مرررره وعلى رد تويتر بهذلني أجل بي بي وش بيسوي!!؟
المهم وبدت حياة الجحيم والشك والظلم والبهتان
وهالشيء ذا جاء بوقت استخدامه للحشيش
يعني أصلًا بدون شيء راعيه يشك ويتوهم بزوجته
كيف وهو ماسك علي هالشيء!!!!!!؟
آه بس !!!
وبدا يهاوشني ويضربني وطول السفر واللعن والسب ويقول ما أبي ولدي يرضع منك وصخة وووو
يا الله يا بنات لو أقولكم شعوري وقتها كنت أرجف والله العظيم
وقبلها ضربني لأني عاندت ورجعت البيت وهو ما يبيني أرجع شقتي أقصد
ضربني لدرجة رقبتي عورتني يومين وربي
وصار يقول ما كنت أبيك الله يسامح أمي كنت ب أفسخ الخطبة
و سب وشتم وتفاصيل أُخرى يومية والله ما يكفي الموضوع لسردها! المهم مرّت علي ليالي ما أنام
أرجف تحت السرير
وجوالي أخذه مني شهر وعطاني إياه
والله ما سألت عنه ولا قلت جيبه
وفجأة كنت أنظف ناداني بصوت يخوف
قال جيبي الجوال بسرعة قلت طيب
وجبته له ركض وأخذه وفتشه وعندي صور رومانسية عادية ويقول ما شاء الله من متى تحملين هالصور!؟
والله يا بنات كنت أرسل له رومانسيات وما يرد علي أو ما يهتم لهالأمور وصار عندي برود وما عدت أرسل!
المهم أول مرة أخذ الجوال فيها راح مدري وين
وبعدين قال مرسلة صورتك له وصورة جسمك
وهو مرسل لك شيء في الحمام
الله يحرمني عافيتي يا بنات ما سويتها ولا يمكن أسويها
انهبلت وصار يضربني ويبيني أعترف
المهم مر شهرين تقريبًا هدأ الوضع شوي
ويجيكم المهم:
قبل ثلاثة أسابيع ولدي يفتش بوكي وأنا حاطة صورته وطلع بطاقاتي كلها ومن ضمنها صورة أبوه
وشلت بطاقاتي والصورة صغيرة ما انتبهت لها وخليتها
ومع ولدي يبوسها ويقول بابا
المهم رجع من الدوام والصورة مع ولدي
انا استتفهت الموضوع صورة وعندي غيرها عادي
قال ليش رامية الصورة!؟
قلت عادي مو راميتها نسيت أحطها بالبوك وأخذتها من ولدي ورفعتها فوق حافّة الكنب وخلصنا غداء ورفعت الأغراض وغسلتها وكل شيء (طبعًا أمور التنظيف والترتيب صارت تمام وصار كل شيء أوكي)
المهم سويت تحليل حمل وجت النتيجة وطلعت رموز مبدئيًا حامل وقلت حامل
وطالع فيني بسرعة وقال والله؟
ونظرته كانت مُريبة ومُرعبة يُممممه
وقلت خل نرسل النتيجة لأخته عشان هي في مستشفى وتعرف التحاليل وتأكد لنا
طبعًا أنا مابي الحمل وماني مستعدة له أبدًا
وأرسلت لي مبروك بس بدون أي شيء ثاني
وما رديت
طبعًا بقول لكم علاقتي مع أهله: ( أحبهم ويحبوني ويمدحوني وأنا الوحيدة الصافية معهم من بين حـريم عيالهم كلهم، وأذكر لما طلعت من الأربعين شريت لعمتي أم زوجي أسوراتين ذهب غالية ولخواته الثنتين شنط تهبل انهبلوا عليها.. وهذا مني أنا ولا قال لي هو وربي ومن فلوسي (حافز) وهو قايل لي لا تقولين لأحد انك تستلمين وحتى أهله يحسبونها منه .. وكنا متهاوشين وقتها وهو قدم الهدايا بدالي لخواته!!!! ويحسبونها منه وأنا طنشت عادي لله مو لهم وهذا طبع فيني ما أبي شكر ولا مدح أحد .. وأذكر مرة شريت مكياج غالي ولمّحت لي أمه وقالت مو لازم الغالي تحسبه من فلوس ولدها وهي فلوسي!
وآخر مرة جوّ أهله عندي ومعي ٦٠٠٠ آلاف كان دافع الإيجار ومنضغط وعطيته عشان ما يحس بالتقصير وان ما معه فلوس وقلت جيب عشاء لعمتي والبنات ذبيحة يعني يستاهلون..
وراح يشاورهم قالوا له ما يحتاج توك طالع من إيجار وحنا مو ضيوف ووو طبعًا أنا مو مره طبخي ومالي خلق أطبخ يعني أبي شيء حلو يليق ويواجه وبعدين لا تعلمت الطبخ زين يبشرووون باللي يسرهم..!
المهم جاب عشاء وقلت حياكم الله ما ردت أمه وأخته
ردّوا سلفاتي بس !!!!
يحسبونه من ولدهم واني ضاغطته وليه ما طبخت ووو
المهم بعدها سافرنا وما كنت مرتاحة خايفة من زوجي مدري ليه لأنه كان يهز رجله ومتوتر وحالته حالة
وصرت أنام وأقوم من الخوف ويقول لي تراقبيني أنتي ولا وش فيك!!؟
صار يشك فيني وبهذلني وحياتي قلبت جحيم لا يُطاق
المهم رجعنا بعد أسبوع
وفي نفس اليوم اللي سالفة الصورة هاوشني عليها
قلت لكم أرسلت لي أخته مبروك! وما رديت عليها
ما كنت مبسوطة أبدددددد
وعلى العِشاء كذا دقت أمه قالت وش فيها ما ردت على أختك !!؟
وبدأ يهاوش ويسب
أنتي منافقة وكذابة وفتانة وأنانية ووووو وصفات أبعد ما يكون عني !!!!!!!!!!!
قلت لو اني أنانية ما عطيتك فلوسي! وساعدتك ووقفت معك
قال غصبن عنك أصلًا وإلا أنتي ما ودك
وربي اني من طيب خاطر ومن باب الإحسان ومُراعاة العشرة وحُسن المودة واننا زوجين ما بيننا هالكلام
كذا أنا نظرتي للموضوع..
وسكت وراح يدخن وولدي يقوم وينام يقوم وينام
والساعة ١١ دخلت بنام وجاء بينام
وسأل وين الصورة!؟
قلت مدري والله من الخوف قسمًا بالله
ورحت أدورها وأشوف وأقلب الصالة وأدور في الزبالة الله يكرمكم!! ويدور هو ولقاها على الكنب وقال لا واضح انك مهتمة وتحبيني
قلت يا ابن الحلال صورة ذي
وقال لو انك تحبيني كان اهتميتي بصورتي!!! المهم وراح يقول لي كم واحد كنتي تكلمين قبلي!!؟
والصورة حقته اللي مرسلها لك أعجبتك
أعجبك هو!!؟ أقسم بالله مدري عن وش يتكلم
من هول الصدمة جلست ساكتة ودموع وسب وقذف
وضرب يا بنات بوجهي وراسي وطلع دم من فمي
اوففف يا بنات كانت ليلة مرعبة إلى آخر مدى
وصار يقول أنا شاك بشيء أكبر
هو قد دخل الشقة صح؟؟ أنا هِنا انهبلت قلت معليييش ما أسمح لك
قال أنتِ مرسلة لوكيشن لرقمه وأنا متتبع الرقم وجاي حارتنا
يُممممه يا بنات أقسم بربي اللي خلقني ما أدري عن وش يتكلم
قال اعترفي أحسن لك
قلت وربي وأحلف له أيمان مغلّظة واللي يحرمني صحتي وعافيتي وووو كل أنواع الدعاوي
قلت مستحيل
هذا ظلم وبهتان
وقام قفل الشقة قفلتينوصكّ الزرفال (المزلاج) وحط المفاتيح بجيبه وراح المطبخ
أنا هِنا انهبلت وطلع إلا معه سكين
وهربت للحمام أصرخ وبقفله إلا تجي النعلة الله يكرمكم بطرف الباب ويمسكني مع شعري والسكين مسكته لها تخوف يُممممممه المشهد رعب لما أتذكره
المهم أصارخ وأقول تكفى
إلا قام ولدي حبيبي يبكي لو ما قام بعد ربي يمديني في عِداد الموتى الآن!!!
ودخلت أنومه وقفلت علي الغرفة وهو يطق يقول أفتحي والله ما أسوي لك شيء
وأنا من هو الموقف ما عرفت أتصرف ولا كلمت أحد ولا شيء فكرت أصارخ للجيران بس الوقت متأخر ١ الليل الساعة كانت..
المهم يحلف يقول والله ما أسوي لك شيء ويدخل يدينه من تحت الباب يقول شوفي فاضية
يقول أنتي تكلمين مين
تسجلين صوت؟؟ قلت لا وربي
قال أسمع صوت ضغطات جوال
وربي الجوال ع الكومدينه وأنا عند الباب
قلت مستحيل خايفة منك
قال كذا بتخليني أشك أكثر!!
وفتحت ودخل وانسدح جنب ولده
المهم أخذ جوالي وجلس يفتشه
ويهاوشني ووووو
ويا ليلة سوداء كانت مظلمة وقال لي تبين تروحين لأهلك ولّا تعيشين عندي عبدة؟!
قلت لا عبدة
طبعًا عشان ما يسوي لي شيء
وأنا بنفسي أقول اللهم الخلاص بس!
وقلت الحين والله ما يوديني أهلي ويعذبنـي عنده
ومن بكرة العصر قال لي خذي أغراض لك كثيرة بوديك أهلك
وبتطولين عندهم
وأخذت أغراضي وطول الطريق سب وهواش وشيء يهدّ الصخر ويفلق الحجر
ما صدقت أدخل بيت أهلي
وصار يكلمني ويهاوش واتس أب
ويقول أغراضك بحذفها والذهب ببيعه
وما عاد لك رجعة ومدري أيش !!
وقبل كان يقول لي ما كنت أبيك ما كنت مرتاح لك
الله يسامح أمي بس
هو عمره ٢٥ وأنا ٢٤
والفارق الفكري بيننا كبير
وما يحب يحسسني بثقافتي ويحاول يستنقص مني دائمًا ويقلل من قيمتي لدرجة كنت بفقد ثقتي بنفسي !! لأن اللي أشوفه من الناس إعجاب وثناء وإطراء ومديح
واللي أشوفه منه تحطيم وتقليل وإهانة وتجريح!!!
عمومًا أنا عند أهلي الحين وما قلت لأحد إلا خواتي
طبعًا أخاف أقول لإخواني وما يتفهموني لأنهم ضد المرأة ومع الرجل دائمًا ويحسبوني صح مسويه شيء غلط ويصدقونه!! قلت لأمي وخواتي وقالوا لا ترجعين
وأمه دقت على أمي وقالت بنتك مو نظيفة وبنتك مهملة وما تعرف تطبخ وووو
طبعًا هو قال لأنه هذا السبب سبب الانفصال اللي بيصير
وأنا قلت له لو طلعت كلمة شينة عني بقول كل شيء عندي وكل شيء شفته عندك
خاف وقال ماراح ينقال عنك شيء تطمني
وهو خلاص حاط بباله كل الشكوك والأوهام ذي حقيقة ويقول مدري وش ماضيك!!؟
قلت ماضيّ الحمد لله أسأل أهلي وخواتي صوّامة قوّامة ملتزمة بديني وحجابي مرضية لربي
قال كذابة
وأصلًا ما أخذت جوال إلا يوم خلصت الثانوية ودخلت الجامعة رغبة مني وقناعة ذاتية
ومع ذلك ما فيه أي تفهم منه!!!!!!!!!!!!!!!!
المهم يا بنات وش الحل!!!؟ أمه كلمتني وقالت بآخذك عندي أسبوع وأعلمك ما أبيكم تنفصلون عشان ولدكم مسكين واللي ببطنك! يا الله
ما يدرون ان السبب شيء ثاني
ما يدرون انه يشك ويتهمني ويتبلاني بشيء ما سويته
وصار عندي فوبيا بعد سالفة السكين
ما عاد أحس بالأمااااان معه فقدت الأمان
أنا أبي انفصال أريح لي وأريح له
وفي نفس الوقت خااايفة
ولو انفصلت أفكر أتوظف وأبني حياتي وأهتم بولدي فقطططططط
وقدوتي في ذلك أمي عائشة رضي الله عنها مات عنها الرسول ﷺ وعمرها ١٨ وأكلمت حياتها في تعليم النساء وأصبحت مرجعهم الفقهي وكرّست حياتها لهدف سامي وغاية نبيلة
هذا هو الربح وهذه هي الغنيمة الحقّ..
مع زهدي بكل ما في هذه الدنيا
وفي شغلة نسيت أقولها:
في ضائقة مررنا بها بعت طقم لي وساعدته
وفي إحدى المرات دخلت جمعية وساعدته للإيجار المبلغ المتبقي طلبت به من أمازون وآي هِرب وقام بتوبيخي وليش ما تشترين من هِنا وليش لازم من برا وأنتي إمعة تصدقين دعايات السناب
وربي ما شريت ولا شيء من دعاية كلها زيوت وأشياء مهمة !!!!
اللي مخوفني ان اللوم بيطلع عليّ واخواني يهاوشوني من الحين والله يستر بس
وأبوي كبير في السن ويجرحني لكنني لا أعتب عليه وأحتسب الأجر ومؤمنة أن الله سيجازيني على احتمالي وصبري !!!
الله يعلم حجم الأسى والهم والقهر الذي يكتنف قلبي
لكن إيماني بأن أقدار الله تعالى بحكمة لا يشوبها نقص ولا يعتريها خلل أبدًا وأن وراء كل ما حدث حكمة وخير عظيم لا يدركه عقلي البشري القاصر إيماني بهذا الشيء يخفف عن الكثير الحمد لله
من لا تستطيع تقديم المشورة لي فلتدعو لي في ظهر الغيب!