في العشرين،،وخطيبني أربعيني،،بتشجعوني ولا بتقولون لي اعقلي يا بنت؟؟؟

السلام عليكم ورحمة الله وبركاته ،،،



أخواتي العزيزات ،، ياللي عمركم ما بخلتوا على حد بالنصيحة ،، وعلى كثر الأعضاء المسجلين ما شالله ،، اعتبر نفسي محظوظة اني لقيت هالمساحة اللي تتيح لي فرصة التعبير عن مشاعري ،، مرات تنصحون بعض بطريقة خواتي ما ينصحوني فيها :(
الله يوفقكم ويسعدكم دنيا وآخرة يا رب ،،،،،،،،،،



بسم الله نبدأ ،،



مثل ما قريتوا في العنوان ،، أنا وحدة في منتصف العشرينات من عمري ،، مخلصة دراسة وأشتغل الحمد لله ،، تقدمولي وايد ناس ،، بس دايما أصلي استخارة وما أرتاح ،، ومرات تجي منهم وما أعجبهم :)


مؤخرا تقدم لي شخص في الأربعينات (بس ما يبين عليه) ،، عنده دكتوراه ،، أنيق ،، وسييييم (يمكن أحلى واحد خطبني) ،، خلووق ،، من عايلة محترمة وميسورة ،، ناجح في شغله ،، شافني واختارني بنفسه ،،،

عنده 3 عيوب فقط: مطلق،،عنده ولدين،،وأكبر عني بعشرين سنة!!!

مختصر مفيد ،، أنا طاير عقلي عليه ،،،،،،،،،،،،،،،،، ولكن .......



أهلي رافضين رفض قطعي ويقولون لي انتي أكيد جنيتي ،،، خصوصا ان للحين يتقدمون لي شباب من عمري ،،،


وأنا مب متمسكة فيه لدرجة تخليني أوقف في ويه أهلي واقنعهم غصب ،، ما أبي اخسر دعمهم وأبيهم يكونون سند لي إذا لا سمح الله صار شي بيننا في المستقبل ،،،



وبيني وبينكم ،، مسألة العمر مؤثرة فيني شوي ،،، طول اليوم قاعدة أفكر ،، لما بيكون عمري 40 هو بيكون عمره 60 ،، لما بيكون عمري 55 هو بيكون منتهي وعمره 75 ><

مرات اقول يا بنت ،، شيليه من راسج ،، وخذيلج واحد من عمرج مثل باقي صديقاتج ،،، انتي مب اقل منهم عشان تصيرين مرت أبو وتاخذين واحد يقول (اللي باقي من العمر مب قد اللي مضى)!!!!


وفي نفس الوقت ،،، أنا حاسة انه راح يسعدني ،، ويدللني ،، وهذا بالذات انجذبت له انجذاب مو طبيعي لما خطبني ،، ونادرا ما يصير لي جي :(

ووصلني ان البنات في الشغل متخبلات عليه ،، وأي وحدة تتحرش فيه يحتقرها ويمسح فيها الأرض ،،

هذا الشخص اختارني بنفسه ،، يعني مب امه يت واتطالعتني من فوق لين تحت بعدين قالت تصلح أو ما تصلح لولدنا الغالي ،،:44:


هل عنده من السلبيات مايكفي عشان أرفضه ،،


تعرفون زيجات مماثلة وناجحة؟؟؟


أفيدونا أفادكم الله ،،


والله يجزيكم الفردوس الأعلى ان شالله ،،