في بيتنا جنيه ... بنات إلحقو علي

صباح / مساء الخير بنات
من فتره تقريبا شهرين رسلت لكم موضوع ابي مساعدتكم فيه يخص حالتي الصحية وامور كنت اعاني منها مثل الحرارة الشديدة في الفؤاد والتعب والاكتئاب ووسواس الموت والخوف الشديد من كل شي وكنت بحاله ما يعلم فيها الا ربي
لفيت على كل العيادات والمستشفيات وسافرت برا للعلاج والحمدلله النتائج كلها سليمه وما زالت الاعراض والآلام قائمه




تطورت الحاله وزادت سوء يوم عن يوم صرت كأن أحد يبي يسحب روحي سحب مع خفقان شديد خصوصا عند النوم وخوف من كل صوت وكل همس
لو اوصفلكم الحاله والله بتستغربون كأن أحد جالس بصدري ويتحكم فيه مره يسحب روحي وأمرات يزيد حرارة فؤادي ومره خفقان وتعب وحرارة مفاجأة بالجسم وضعف شديد وعدم راحة في منطقة الصدر نهائي لا ليل ولا نهار





سبق ومشيت عند أكثر من مطوع واعطوني ماي ولبان مقرى عليه واستمريت ولا فائده





الصدمه الكبيره

من أسبوعين تقريبا سمعت عن مركز شاطر للتداوي بالأعشاب ويكشف اذا فيك حسد أو مضره
دخلنا انا وزوجي عند المطوع وبدأ يسألني أسئله عن بعض الأسماء وويش يقربولي وكنت أرد عليه
بعدها سألني عن البيت وهل فيه بئر قديم أو جانب من البيت فيه دورات مياه - وانتو بكرامه - قديمه أو مخازن قديمه ومكان للتغسيل واشجار جنبهم




والله يا بنات كأنه يوصف بيتنا بالضبط
خبرني ان فيني مضره من البيت لان البيت تسكن فيه جنية مو مسلمه يعني ( شر وتبي الأذية )
وفوق هذا بعد محسوده من حرمه عجوز من أهل زوجي والمصيبه أنها جدته والكل يعرف ماضيها الأسود وياما أذت ناس وفرقت زوجين ودمرت حياة ناس كثير
وهم ساكتين طوال اربع سنوات هذي ما خبروني


وأكبر مثال زوجة أخو زوجي كانت مريضه كثير من لما تزوجت وجات البيت وصار لها 7 سنوات ما حملت ودوم العلاقه مع زوجها نار وشرار وهي عارفه ان هالحرمه هي السبب ف كل هذا _راحت عند مطوع وخبرها-




على ما اظن وعلى حسب فهمي ان هالحرمة متعاونه ف الشر مع هالجنية أو هي راسلتنها ((( ما كثير أعرف ف هالأمور )))
وياما صار إلتباس مع كذا حد من أهل زوجي .. أخته وزوج أخته وزوجة أخوه وتعذبو كثير ف حياتهم لين ما عالجو وارتاحو





حتى ان زوج أخته ما يقدر نهائيا يدخل المنطقة اللي ساكنين احنا فيها ويزور أهل زوجته لأن هالعجوز ( عجوز النار ) عاملتله عمل




المهم بنات واسمحولي على الاطاله
انا تعالجت معاهم بالمركز واعطوني أتبخر واشرب ماي مقري عشان الفؤاد ومحو
وعملولي برنامج للرقيه لمدة 5 أيام




واللي وصلني ان ف الوقت اللي كانو يقرو علي كانت هي تتعذب بنفس الوقت




وخلصت فترة العلاج ولا زالت الألام موجوده من تعب وحراره وخفقان وضيقه والنوووووووم أخخخخخخخخخخ يالنووووووم
بنات النوم هجرني
كل ما حطيت راسي فزيت واحس روحي تنسحب وخفقان شديد واحتاج وقت لين ما ارد لوضعي الطبيعي
يوميا على هالحال




نصحوني بالمركز اني أطلع من البيت وقالو هالاشياء كلها رح تروح اذا طلعتي لانك ما مرغوب فيك ف البيت بسبب هالجنية والشيطان المتآمر معها
وزوجة أخو زوجي اضطرت تطلع بعد ما تعبت كثير والحين ساكنين ف شقه بعيد وتقول مرتاحه وما تحس بالأشياء اللي كانت تحس فيها




بنات ويش اسوي احنا اخذنا بيت الحمدلله وننتظر نأثث ونطلع يعني يبيلنا شهرين بالكثير
اللي عندها خلفية بالموضوع تفيدني جزاكم الله الجنه




وهل اللي احس فيه من روح تنسحب وخفقان وخوف شديد وهجر النوم كله بسبب هالجنية ؟؟؟ لاني بديت اشك انه ممكن يكون سبب ثاني خصوصا ان العلاج خلص ولسه الأعراض موجوده
أو محتاج أطلع من البيت





وهل فعلا البيت المسكون بجنية مو مسلمه ممكن تأثر هالتأثير بالجسم ؟؟؟
تلعب بالجسم لعبه




وعلى فكره بنات هالاعراض تجيني سوا كنت بالبيت أو بيت أهلي أو أي مكان يعني مو بس بالبيت
طبيعي هالشي يعني
خلاص هالشي متمكن فيني عشان كذا يجيني بكل مكان





اسمحولي على الاطاله