ام توني%

ام توني% @am_tony_4

عضوة نشيطة

في بيتنا نفاس _ _دعوة للضحك

الحمل والإنجاب

من جد ضحكتني هالبنت المسكينة تحكي معاناتها وقت نفاس اختها عندهم
::::::::::::::
طيب وين تروح يعني!!
وبعدين مصيرك اتكوني نفاس وتعذريها هههه

::::::::::::::::::


:

:

:
هل أنتِ عزوبيه تعيشي في وسط عائلتك ؟

2- هل أنتِ موظفه أو طالبه ؟

3-هل لديكِ أخوات متزوجات ؟

4- هل حصل في يوم من الأيام وعدتي من الدوام تعبانه وتافلـتن العافيه
وراسك يرجك لـ تتفاجئ بأصوات ضجيج صادره من بيتكم...تصل إلى مسامعك قبل أن توطوطي عتبة الباب ؟

5- هل حصل وجيتي لبيتكم لـ تستقبلك رائحة الحلبه المنتشره في كل دعاسيق البيت في الداخل ؟

6 -هل استيقظتي مذعورة من نومك الهادئ ذات ليلة على زعاق بزر توهـ
لحمه حمرا مابعد تعلم وشلون يصيح بإحترام ؟

7 - هل زد رأيتي تجمهراً أمام باب حمام بيتكم - الله يعزكم - ويوم قربتي
شوي بالقوة تشوفي وش السالفه وبالطق والطقاق دخلتي راسك من بين حشود المتجمهرين ولاهاي أمك واختك ماسكين نفس قطعة اللحمة الآنفة الذكر وجالسين يسبحونها ؟

8- هل سبق أن رجعتـي من الدوام لتجدين بيتكم مزدحم بالزوار

ومن لمحت أمك طرف خشتك ....مدت لك الدله بدون تفاهم وقالت قهوي العالم ؟

إن كانت أغلب اجوبتك عزيز تـي القارئـ/هـ بـ نعم ..



فـ مبروووووووووووووووك








في بيتكم نفاس


:
:


يعني الواحد يقول اللهم لا إعتراض

بس ولو للصبر قالوا حدود

ويا مصبر الموعود

كل يوم اقول بيجي رجلها ويقشعها هي وذريتها من عندنا

بس ماش ماحولك أحد ..

الله العالم الولد بيصير عمره سنه وهي توها نفاس ماقضت

يا جماعة الخير لا تفهموني غلط ..

انا احب اختي واقدّرها والود ودي ما تفارقني ..

بس احبها لحالها بدون الفوائد الي طلعت فيها من زواجها

ذا القرود الي معها
منيب اواطنهم !
عيال اختي ايه ما قلنا شي !

بس فيهم ازعاج يوازي بلد .. !
لا واذا تحملناهم وقلنا معليش توهم صغار والحشمه لأمهم مهيب لهم ..
ونبلع هالغثا الي يصير على شرف ذا النتفه الجديده الي جابتها ..
تحسبونه يثمر والا يبين فيهم ؟


الي غابني صدق هالـ 40 يوم الي اشوفهم ..
سبحان الله عمر الحريم ما احترموا مواعيد والا وقت الا بـذي !

يتحروون الدقه بالحسبه .. 40 يوم بالضبط

مستحيل تنقص بس ممكن تزيد
40 يوم وانحن ما عندنا غير فاتحين باب و راديّن باب..

مستقبلين زوار ومودعين زوار ..

مدخلين فلانه وبناتها ومطلعين فلانه وحريم عيالها ..
لا وكله كوم

واذا جت وحده الله يجزاها خير بزعمها راعية واجب ...وتبلط من عقب المغرب إلى 9 عندكم ....وانتي يا حيل الله مالك الا تدورين بهالقهوه والشواهي ..
واذا خلاص تكرمت و لبست عباتها وطلعت .. ترجع بسرعه وترفع نقابها وتزف لك الخبر العذب....معليش ترا بناتي ماقدروا يجون اليوم ....بلاهم منشغلين شوي بس بكرة بحيل الله بيجون كلهم


<-- ماودكم تشوفون تعابير خشتي ساعتها


الله يجزاك خير راعية واجب !
الحين بناتك عندهم التزامات ومشاغل .........وبيسوون الواجب حسب فضوتهم .. !

بس اصحاب البيت عطّاليه ما وراهم شغل والتزامات ابد ..

على حسابكم هم ؟

نعبنو ابليسكم ترا فينا الطالب ...وفينا الموظف مايرجع الا على حروة المغرب وفينا المتزوج وعنده بيت يصاليه .. !,,والأم ماهي بكل الأحوال بصحتها وفيها حيل تهابد ...وتراكض لكم انتم وزياراتكم !

ياخي خلوا جيتكم وحده وموعدها واحد .. ماهو كل القبيله تجي تزور وكل يوم وحده داخله لحالها ..!

ماورانا الا انتم ؟

<---- حولكم شي تخافون عليه ابعدوه عنها ترا عصبت بقوووة

ماخليت شي عن امي:

يمه حددي يومين بالاسبوع يجون العالم فيه !

يمه مالها سنع تاركين الدعوه سايبه


يمه ارحميني ارجع من الدوام ما اشوف

مالي خلق اغير ملابسي وش عاد اقابل هالأمم !

بس ابــــد ! كان ذا الجدارن الي وراكم تنطق فـ هي ترد علي ..

اول كانت تقول:
يا كبرها عند ربي ! تبيني اقول للعالم لا تجونا.. انهبلتي انتي

الحين انا قلت قولي لهم لا تجون ؟ قلت حددي لهم يومين وفكينا من هالقلق !

تقول امي :" لا يا خزياه .. قولة لا تجون الا هاليومين ... زي قولة لا تجون ابد ..افرضي هاليومين ما ناسبوا العالم ! "


اجل مناسبنا حنا الاسبوع كامل يمه ؟!
انا ماعرف من الاسبوع الا الجمعه ولا هوب يصفى لي ؟!

هالكلام اول ..

الحين ابشركم ما ترد علي خير شر ..

مقتطفات من أحاديث تدور في مجلس نفاس
:
:



" عسى ما تعبتي بس يا فلانه ؟ "
" لا الحمدلله تيسرت "

" الحمدلله .. بس لا تعلمين احد لـ انسألتي

بسم الله عليك !

ترا عيون الناس مهيب ترحم وانا خالتك ! "

تعقيب /

اول شي يـ الخاله الملقوفه ترا هالسؤال ماهو كلـن يسأله

يومك توصينها ع الإجابه !

يعني ولاده وش ظنك ؟

اكيد بتتعب بوقتها وعقب
خلاص .. المشكله ما يسأل الا ناس مجربينها ..

ابو التناحه ياشيخ !


ثاني شي .. ترا حتى القطاوه تحمل وتولد !

حلى كل شي تلزقون فيه سالفة العين والحسد ..

ياررربيه بس
:
::
:

:
::
:



"
ما شاء الله وش سميتّوا الصغيره ؟ "
" دانه "
الحرمه الي تسأل وخشتها مايله و ما عجبها

اييه .. مدري كن الأسم مهنا زود !

يا بنيتي مدري وش ذا الاسماء الجديده الي طايحين بها العالم !

تعقيب /

ترا اصغر بنات الحرمه الي سألت .. اسمها مزنه !!

:
::
:




" الا يا فلانه ما قلتي لي وين ولدتي بأي مستشفى ؟ "
" المستشفى الفلاني "
" اييه زي اختي *** ! عند اي دكتوره ؟ دكتوره هبه ؟ "
" لا والله .. عند الدكتور خالد "
الحرمه الي تسأل تنغز الي جنبها بكوعها

وتعض على براطمها وتمتم "

يا خزيييياه .. كابتّن عفشها عند رجال

ياختي خلاص هالحريم ماعاد فيهم حيا
وراها ما ولدت عند حرمه .. وش حيث الرجال تولد عنده ؟ "

تعقيب /

يقولون والعهده ع الراوي ..

ان خويتنا الي ماعجبها موضوع الولاده عند دكتور ..

جايها الطلق وهي بسيارة ابو جيرانهم

لان رجلها كان كاشت في البر ..

ومالقت الا جارتها تستفزع فيها ..

وما كان بين الولد والنور الا شوي
لولا ان ربكم ستر والشوارع كانت فاضيه

والا كان صار مكان الميلاد
في شهادة الولد .. " سيارة ابو جيرانا "

:
:

طيب الحين فيه سؤال يراودني عن نفسي

ومضطره اسدحه بس رجاءاً صيروا متحضرين شوي

وماله داعي ترجموني بنعالكم <--- يا حياة الشقا متعوده
وجه إهانات

الحين الوحده اذا ولدت وش تجيب ؟

لا اشوف احد مستظرف وقايل تجيب آدمي
! ادري اننا مانجيب قطاوه ..
بس قصدي هالآدمي الي هي تجيبه من هو حقه ؟

حق ابوه صح والا لا ؟
طاايب .. اسم الولد يلحق مين ؟

يلحق اسم ابوه صح والا لا ؟
طااايب .. دام الدعوه كذا ..

ودام النفاس اصلا بسبب هالولد ..

ممكن احد يفهمني وش دخل مندوب اهل البنت يبحلون بها ؟

وراهم اهل رجلها مايستقبلونها؟!
ياخي الولد ولدكم انحن وش دخلنا ؟

والله ما خرب بناتنا الا امهاتهم !
تجي الام مطفيه النور
وطايره مليون بالحماس من تدري ان بنتها حامل ..

ماتخلي عطّار ما تزوره
ما تخلي شنق وداعوس ماتدخل فيه ..

كل شي ينشرب والا يوكل والا يلهم تجيبه ..

وتفضي للبنت غرفه

وتبلشنا نزلوا سرير وروقوا طاوله وجيبوا
مفرش ورجعوا ستاره ..

تقل اول مره يولد عندها احد ؟

واذا هي اول مره
وشو له هالحمااس .. تراه نتفة بزر وطلع من بطنها

مهب اختراع الله يصلحكم
هذا انتم قبلنا حملتوا وجبتونا

وش حيثكم ما سوا فيكم اهلكم كذا ولا ضركم ؟

بالعكس الوحده من اول لا اله الا الله صحتها فُل

وهي والده في البيت ..

ما ولدت بمستشفى وخذت لها سويت كامل اسبوع

وماغير تبطح وبلع بهالحلى والقهوه


حتى ولدها مهيب ترضعه


ومن عجائب قدرة الله في خلقه

ان الحرمة ما تحلى بعين رجلها الا لاصارت في بيت اهلها
يالهيس وهي عندك في بيتك ماانتب تناظر خشتها ..

ويوم صارت نفاس عندنا
.. 24تبن ناشب لنا !

ما عندنا شغله غيرك انت وحرمتك وعيالك !
ياخي تحبهم وفاقدهم ضفهم ورح بيتك الله لايهينك ...

وابشر بلي يجي يشقر عليكم كل يوم ..

بس اعتقونا لوجه الله
ولا يرفع ضغطي الا لا صار جالس مع حرمته يسولفون في غرفتها

وانا بالصاله الي جنبهم اهجّد فروخ ابليس

الي يفترض انهم اطفال و الارجح انهم عيال اختي ..

يقوم واحد منهم يدخل على ابوه وامه ويزعجهم ..

ويجي ابوه الله يطول في عمره يكرشه بكل حنان ويقول له "

رح رح يا بابا لخاله ندى شفها تناديك "
خير!
اول شي يا سبع البرومبا تراك ماكل في عيالك مقلب كبر راسك !

اجل تبيهم
ينادوني خاله ؟

عساهم ينادوني بإسمي مهب بشيـن ثاني ويسد !
ثاني شي وش قالوا لك انا ؟ حاضنة ولا مربية ؟!

كل ما طق عود بعصى رميتوا بزارينكم علي ؟

انتم تدشرون وانا اتحمل نتايج دشرتكم ؟

نفسيتي تعورني .. !




كل ما ذكرت ياخي هالأجانب طقتني غلقه



وش زودهم عنا يا جماعة الخير
يوم ان الوحده فيهم تولد من هنا وتصك الجينز من هنا ..

ما توفي لها يومين الا وهي تقامز وتسوي رياضه


ورا ها للي عندنا ماهي كذا
وراهم 40 يوم ما عندهم غير فرم بهالمرقوق والجريش !

قال ايش .. ترمم جسمها قال ،

مهب ترميم ذا ردم الله يحييكم
!
الوحده منهن ما تطلع لبيت رجلها عقب الاربعين الا على شيول
لا والكمخه اختي اقول لها ذاك اليوم

شوفي ترا ذا الصور عقب ولادتها باسبوعين -

أأشر لها على صور لزوجة توم كروز -

قالت .. واذا ؟
لا تقارنين حبيبتي عيالهم هذولي عيال حرام !
<--------
يالكمخه يالفاهيه ..

الحين نفاس ولد الحرام يفرق عن نفاس ولد الحلال !

ياربيه بس !
اسعفوني .. أريد حلاً ؟
عموما انا بقوم الحين اصلي المغرب

وانزل استقبل الوفد الجديد

بس اتوقع اني ارجع اكمل تهزيء
والله يافي تعصيب ماهو صاحي ..

كاني مفارقة الضيوف لين افرك فنجان بجبهة وحده من هالزايرات !
يع اشم ريحة حلبه >ههههههه


::::

منقول
35
4K

يلزم عليك تسجيل الدخول أولًا لكتابة تعليق.

تسجيل دخول

عبير الورده
عبير الورده
ههههههههههههههههههههههههههههههههههههههههههههههه صادقه بكلامها جربنا مثل ماجربت

الحمدلله بس بكري عند اهلي وباقي عيالي ببيتي
شمعة الإيمان
شمعة الإيمان
هههههههههههههههههه
BARSHEED
BARSHEED
هههههههههههههههههههه

ياحلوة والله انها تونس هالاخت وياحلو اسلوبها وهي تهاوش

الله يجزاك خير على نقل الموضوع عجببببببببني
ههههههههههه
فتاة لطيفة
فتاة لطيفة
ههههههههههههههههههههه رووووعه انا معاها بكل كلمه قالتها واحنا الحمدلله ماعندنا العادات هذي ابدا حتى النفاس مايكون لها غرفه خاصه ولاتشرب اعشاب وخرابيط بالعكس تسوي رياضه وتاكل اكل صخي والحندلله كامورنا تمام
ام الجووود 44
ام الجووود 44
هههههههه