الدلفين يتنفس حاله حالنا ويحتاج أكسجين، شلون ينام تحت الماي وما يختنق؟ في دلفين أو حوت “يغرق”؟
يعتبرالدلفين من الحيوانات العجيبة اللي دمها خفيف، كل الدلافين تحسهم مقزرينها بالبحر سباحة وسوالف واشكالهم دايما مثل ميتين ضحك الواحد يستانس يشوفهم خخخخخخخخخخ
بس سؤال شلون ينامون تحت الماي ؟؟؟؟
إكتشفو العلماء غن نومهم يختلف عن نوم البشر، غالباً إذا كانوا مجموعة من الدلافين أو مع حيتان مع بعض تلقاهم ينامون “نص نومه” ، يعني نص مخهم ينام والنص الثاني صاحي وبعدين بالدور، النص اللي كان قاعد ينام والنايم يقوم بالتناوب (كل ساعتين تقريباً يتبدل الدور)، عشان يوم يحتاجون يتنفسون يقدرون يسبحون لي سطح الماي يتنفسون بعدين يردون تحت ، هم عشان يكونون منتبهين حق الأسماك المفترسة اللي تبي تهاجم وتاكلهم طبعاً عيون الدلفين بهالحالة تكون وحده مفتوحة والثانية مسكره. نص النومة هذي تخليهم مثل بحالة غفوة خفيفة تلقاهم يسبحون عالبطيء حركتهم قليلة لتقليل استهلاك الاكسجين. يعني النص الصاحي من مخهم هم يكون حد حده شوي وينام بس صاحي عالخفيف لغرض الانتباه وقت اللزوم.
إذا كان الدلفين وحداني ما عنده ربع تلقاه يطفح على سطح الماي وظهره وفتحة التنفس مكشوفة بالهوا يتنفس كثر ما يبي وينام بعمق أكثر نسبياً. يسمون هالنومة logging للشبه بينه وبين قطعة الخشب الطافحة عالماي.
فتحة التنفس – blowhole عند الدلفين هذي مو نفس الخشم عند البشر، الدلفين لازم يكون صاحي عشان يقدر يتنفس من خلالها، يعني حتى لو قاعد فوق سطح الماي ما راح يقدر يتنفس من خلال الفتحة إذا كان نايم مثل نومة البشر نومة كاملة. عملية التنفس عند البشر تلقائية تتحكم بروحها وشغالة بدون ما نستوعب، أما الدلفين كل نفس ياخذه لازم يطلبه بمخه ويتحكم بأخذه والاستفادة منه. باختصار يعني عملية التنفس عند البشر لا إرادية وعند الدلفين والحيتان إرادية.
نفس الشي عند الحيتان بس بطريقة أقوى، يعني كمية الهوا اللي ياخذها أكبر بكثير من الدلفين بسبب الفرق الكبير بحجم الرئة، وكريات الدم الحمراء عند الحيتان تشيل أكسجين أكثر، والحيتان نظامهم غير شوي الأكسجين ما يروح إلا حق الأجزاء اللي يحتاجها حق السباحة: العضلات اللي تتحرك، القلب، والعقل. النظام التنفسي العجيب هذا يخليهم يطولون نص ساعة أو أكثر شوي تحت الماي.
يعني في دلفين أو حوت “يغرق”؟
ممكن إي بس نادر حيل ويوم يغرقون ما يبلعون ماي مثلنا. يعني الأصح انهم “يختنقون” مو يغرقون بسبب نقص الأكسجين. هالشي يصير يوم يتعلقون بشبكة صيد ويخترعون يغوصون أكثر حتى لو ما عندهم أكسجين، وشوي شوي يختنقون.
على كل هالكلام شكثر ينام الدلفين؟ ووين ينام؟
ينام حوالي 8 ساعات في اليوم، يعني ثلث اليوم نوووم تحت الماي. وينام بأي مكان تقريباً بس الأغلب ينام قريب سطح الماي أو قريب الشاطئ
وسلامتكم يا عسسسسسسسسسولات:biggthump