في طريق عودتنا من السفارة النيوزلندية بالرياض... ماحفظنا الا الحافظ الحفيظ الكريم

السلام عليكم ورحمة الله وبركاته
الحمد لله حمدا كثيرا طيب
الحمد الله للعظيم الكريم كما ينبغى لجلال وجهه وعظيم سلطانه
الحمد الله الرحمن الرحيم

خواتي راح اسرد عليكم اللي حصل لنا بالتفصيل... وبيان قدرة الله ورحمته وحفظة لنا ( سبحانك ياحافظ ياحفيظ )

قبل اسبوعين
جات لزوجي دعوى من السفارة النيوزلندية في الرياض لحضور تجمع الطلاب المبتعثين لنيوزلند اللي كانوا مبتعثين واللي الى الان يدرسوا....وراح يجي السفير النيوزلندي لحضور التجمع.
طبعا مكان الاجتماع وين ... في الرياض / حي السفراء/ سفارة نيوزلند/ يوم الاثنين /تاريخ: 11 أبريل 2012/ الساعه 8 مساءا.
خبرني قبل اسبوعين بهالدعوى
رحت تليقفت وقلت له طبعا انا معك ( سعودية تدروون)
قال ماذكروا في الدعوى حضور حرمك
قلت له مو مشكلة راح اروح معك حتى لو اجلس بالسيارة اذا ماسمحو لي بالدخول
وبما ان زوجي يعشق شي اسمة ( مايروح مكان الا انا معاه ... حتى لو بيروح الحلاق يقول لي قومي معي انزلك لاقرب مستوصف للحلاق اللي بروح له او اخليك بالسيارة الى ان اخلص ...المهم ابغاك تجين معي)
ارسل خطاب اني برضو كنت مبتعثة وهل يوافقو حضوري او لا !
على طول جاء الرد بالترحيب بي .

خلال هلاسبوعين اكتشفنا ( راجعنا جدول التزاماتنا )وان ورانا اللتزامات كثيييييرة ومن ضمنها زوجي مسوي عزيمة للأهل والاقارب كلهم
ومتى !؟
يوم الاثنين
بنفس تاريخ الدعوى
وان يوم الثلاثاء موعد عندي للعيون ( مسوية الأخت ليزك)
ويوم الاربعاء عندة اجتماع ضروري
ويوم الخميس الى السبت لازم نكون بالقصيم نشوف وشو صار على متابعتنا ومحاولاتنا لانجاب طفل ( ياربي رحمتك

شفت جدول هالمواعيد وقلت له
خلاص انا مو رايحه الجدول مزحوم ...وانا من طبعي احب الاستقرار ، ااذا يومين ورى بعض طلعت من البيت احس بعدم الاستقرار وتخترب نفسيتي !
قال لي : بتروحين معي
قلت مااروح
وشدينا شوية بالكلام واني راح انضغط نفسيا ....عصب الرجال وقال انتي اللي طلبتي
دائما تطلبين وتأمليني وارتب الى ان تكون الامور تمام وبعدين تنسحبين وترفضين
قلت له ماكنت ادري ان جدولنا مزحوم
تعوذ من ابليس وسكت وتابع مشاهدة التلفزيون

المهم
ليلة الاثنين مانام الا متأخر على الساعه 11 ونص ( دائما ينام متاخر الله يهدية ويتعب / والساعه 11 ونص عنده هذي بدري ماينام الا 12 أو 1 او 1 ونص ويجلس بالصباح متبهذل وتعبان )

راح الدووام طبيعي يوم الاثنين على الساعه 7
وعلى بريك الصلاة طلع واستاذن باقي اليوم مشان يمدينا نروح للرياض ونوصل بالوقت المحدد على الساعه 8
المهم
بينا وبين الرياض 350-400 كيلو يعني من 3 إلى 4 ساعات بسرعه معقولة
طلعنا الساعه 3 ونص
مسكنا خط وبدا زوجي يقرا بعض الايات والادعية ويكررها لمده تققريبا من ربع ساعه الى نص ساعه


جاء وقت صلاة المغرب واحنا ماوصلنا للرياض
( من طبع زوجي انه اذا كنت معه مايوقف في اي محطة للصلاة ... يقول محطة معروفة ونظيفة على قولته لان يخاف علي / يقول لو اني لحالي كان عادي :: اقولة الحافظ الله هذي بعض الناس يوقفو في البر ، يقول ما اخاطر وانتي معي)( الوالدة ربي يطول بعمرها تقول لاتوقفوا للصلاة في محطات ...خطرة يهجم عليك احد وزوجك مو معك بالمصلى او بالحمامات لان لمكان مقطوع .. صلوو اذا وصلتو . تبغينا نأجل الصلاة الله يهديها خوفا علينا )
نرجع لرحتنا
اختار زوجي محطة معروفة وقفنا بنصلي
وكانت الموية مقطوعة ...وكان معنا علبة موية كبيرة ...وكان زوجي على الطريق وقف وشرا خرابيط اكل ومن ضمنها الموية علبة صغيرة لذلك خذتها انا

صلينا ولله الحمد والمنه وطلعنا
واحنا بنركب السيارة جنب المصلى وقفنا واحد بسيارته ومعه حرمة
وقل لزوجي انه يبغى يروح لمدينه معينه لكن ما معه حق بنزين ووووووووووو
كانت محفظة زوجي بالسيارة
وجا قال عطييني من الفلوس المخصصة للنا اثنينا
قلت له ليش؟؟
قال هذا الشخص محتاج وبننويها صدقة
اخذ مبلغ وقال جيبي بعد .....
قلت له خلاص اكيد هذ1 بيكفى ( مالت علي اغصان الجنة ياارب ليتني زودت المبلغ لوجهه الله تعالى ...بس الشيطان ربي ياخذه)
المهم زين زوجي ماسمع كلامي وعطاه زوجي المقسوم
وقال لي تبغين حاجه تاكلينها
قلت له راسي مصدع ومالي خلق للاكل كلت حبتين هالبنادول ومو جاي يركد

المهم وصلنا بالسلامة لمقر السفارة النيوزلندية الساعه 7:36
يعني لسة مابعد ( وجلسنا بالسيارة الى ان جات الساعه 8
لبس زوجي الشماغ وضبط نفسة ونزلنا ( على فكرة كانت الرياض ممطرة البارح ربي يغسل ذنوبنا ويغفر لنا ويرحمنا بحبات هالمطر )

عطيناهم الدعوى وخذوو جوالاتنا وعطونا مظلة الى ان وصلنا لمكان التجمع الرسمي
اغلبية اللي هناك اجانب والموضفين اكيد اجانب
وشفنا لنا كم سعودي هناك لان احنا دخلنا بالوقت المحدد ( وتدرون اغلبيتنا يالسعوديين صفر على الشمال بمواعيدنا )
جا المسؤل عن الارشاد وين نروح ويين نجي يقول لي بالانجليزي ( علقي عبايتك هناك ويأشر على مكان تعليق عبايات الحريم :eek: ،،، قلت له ثنكس ايام فاين ( شكرا انا اوكى)
المهم مالنا بالطويلة
بعد ماخلص السفير كلمته
طلعنا على طول على الساعه 9 وربع بالضبط طلعنا
ماحضرنا الاكل

وتوككلنا على الله ومسكنا خط ( ماخبرتكم زوجي ولله الحمد في السياقة حدودة اذا بيسرع 120 مايتعاداها ابدا .. بس اغلبية سياقته 100 أو 110 )

وبما اني اجلس دائما بدري
فما جات الساعه 10 الا عيوني قامت تشاخط وتقفل ... وانا اقاوم وخايفة ينعس لانه كان نايم متاخر وجالس بدري ومسكنا طريق وهو مرهق
قلت لزوجي مو قادرة عيوني بتقفل
قال لا خلك معي ركزي لان اخاف يعبر بعير ولا انتبة له
من قال هالكلام ظليت معه بس ربع سعه مو قادرة
قلت له تبغى شي تاكله مشان الايجيك النوم
قال اوكى لان النوم جاني
جات الساعه 11 خلاص انا حطيت راسي ونمت
وصحيت على صوت راديو السيارة لان الصوت كان مرتفع كانت الساعه 12 ونص تقريبا ، وكنت برضو نعسانه
وهو ياكل فصفص مشان يطير النوم منه
قلت له الله يعطيك العافية
قال يعافيك / تصدقين غفيت ولا انتبهت ان عبرنا من تحت الكوبري :icon810:
قلت نعم !!!!!!!!!!!!!!!!!النوم اللي فيني طااااااااار
قال الحمد الله رب العالمين
وجلس طول الطريق يحمد الله ويثني علية ويشكرة
وانا اطالع في السماء واقول
الحمد لك ياحافظ ياحفيظ
الحمد الله
الحمد الله كما ينبغى لجلال وجهك وعظيم سلطانك ياربي / نعمك علينا كثيرة كثيرة ونتجرا ونعصيك
المغفرة ياربي الرحمة يارب .

اعرف فية قصص واحداث اكثر عبرة من قصتي لكن اللي حصل لنا
هذا اللي حصل لنا اتمنى ان مانبخل في عمل الخير
يارب نكون من المسرفين المبذرين في عمل الخير يااارب من دعاء وذكر وصلاة وقيام وصدقة ووووو
والاهم انها تكون مقبولة عندك يا الله
يارب
دعواتكم :26: