في قلبي الم وضيق ما اسامحهم عليه ليوم الدين

مو طبيعي اللي بيصير ليه وصلنا لحد ان الواحد ماله خلق يتفاهم واللي يسمعه من الناس هو الصح ، ليه صار الظلم منتشر بين الجميع يظلمون بدم بارد ولا كأن وراهم حساب
صار الواحد يخاف من الاهل اكثر من البعاد ماعاد تقدر تأتمن احد ابد لا ام ولا اب ولا اخ ولا اخت ، ما اعمم لكن الاغلب صار سيئ وخصوصا العوائل ، لما تشوفون عائلة متجمعه وامهم وابوهم يحثوهم على التقوى والمخافة من الله وحسن المعامله مع الصغير والكبير تتمنون لو ان عائلتكم مثلهم ، صارو الام والاب هم اللي يفرقون ويقذفون ويفضحون بعيالهم عند الناس ليه ودي اعرف لييه ؟؟
الجنة تحت اقدام الامهات نعم ، ولكن مو معناته ان الام الفاضلة تذل عيالها وتعاملهم اسوء معامله او تفرق بينهم او انها تخلي الصغير يسب الكبير ومنتشرة القذارة وسوء المعامله في منزلها وللاسف الشديد تشوف انها على حق وبكل جبروت تقول ربي ما راح يرضى عنكم ان انا غضبانه عليكم طيب السموحة ي الام !! انتي ماخليتي في قلوب عيالك ذره حب لك فرقتي ما بينهم وكرهتي الاخوان في بعضهم وكرهتيهم فيك وتتكلمين عن البر ؟ ربي لا يرضى بالظلم والافتراء ومثل ما عيالك محاسبين هم انتي محاسبة على افعالك لا تعتقدين انك بتدخلين الجنة من غير حساب ، الله رزقك بذرية فأحسني معاملتها عشان يجي يوم يردون الجميل ولو قليل ويحسنون اليك عشان لو اتوافيتي يدعون لك بالخير مو يقولون الحمدلله ماتت وارتحنا من الهم اللي حطته بقلوبنا ..
لكل ام في هذا الموقع اسألكم بالله تشفقون على عيالكم وتعتنون بهم ، طبيعي ان ولدك يتضايق او يمر بمرحلة مراهقة احتويه افهميه لا تعاملينه على انه نكره وانه كبر وشاف نفسه لاا والله مهما كبروا عيالك بيحتاجون لكم ان احسنتم معاملتهم ، صار منهم غلط وجهيهم لا تفضحين فيهم عند اهلك او قريباتك او صديقاتك والله ان عيالك بيكرهوك لين تموتين ، كوني معهم عاونيهم على برك الاخطاء واردة من الجميع من الكبير والصغير لا تبهدلونهم وتضربونهم ترى فيه فرق كبير بين ضرب التأديب وضرب التعذيب ، لا تخلون بجسمهم علامات ضرب تشوههم وتبقى ذكرى فعقولهم ما تنسي لا تأذونهم بالسب والكلام الغير لائق حتى وان لقيتيه يعاند مو معناته انه ما يحس ولا بيتأثر من كلامك ما تدرين يمكن يحط راسه عالمخدة ولا يقدر ينام من اثر كلامك ويبكي طول الليل ، حبوهم وعاونوهم مرات تلقي بنتك او ولدك يعابطون لكن والله لو كلمتيهم باللين والحب بيسمعون منك وبيمشون معك مثل ما تبي الحياة خليها بسيطة لا تعقدونها على انفسكم وعلى عيالكم ..
اقول لكم كلامي هذا لاني اعاني والله العظيم ما عندي الام اللي لا ضاقت فيني الدنيا جيت لحضنها للاسف لو ضاقت فيني الدنيا هي اخر انسانه افكر اروح لها من سوء معاملتها ، اخاف على نفسي اوصل لمرحلة اني اشوفها تكبر وتحتاج العنايه ومن قسوة القلب اللي خلتها فيني ما ارحمها ولا اعاونها لاني مالقيت منها الا المعاملة السيئة ، كنت اشفع لها بأنها حملتني تسعة اشهر الا ان قالت لي انا اصلا جاني ضيق يوم عرفت اني حامل فيك ولا كنت اتمناك كنت ابي اعيش حياتي وانتي جيتي ثمن غلطة ، شذنبي اسمع الكلام هذا ؟
اسأل الله ان يصرفني عنها ويصرف شرها عني ويبدلني بحياة اكرم من اللي انا فيها معها .